ជាតិ
សេដ្ឋកិច្ច
សមាគមមីក្រូ ថា ការស្ទង់មតិរបស់ស្ថាប័ន៣ លើវិស័យមីក្រូហិរញ្ញវត្ថុ មានភាពលម្អៀង
×![]()
ភ្នំពេញ៖ សមាគមមីក្រូហិរញ្ញវត្ថុនៅកម្ពុជា បានច្រានចោលរបាយការណ៍របស់ស្ថាប័នចំនួន៣ ដែលបានសិក្សាលើវិស័យមីក្រូហិរញ្ញវត្ថុ ស្របពេលដែលវិបត្តិកូវីដ-១៩ កំពុងរាតត្បាតនៅកម្ពុជា និងក្នុងពិភពលោក។ សមាគម ចាត់ទុកការស្ទង់មតិរបស់ស្ថាប័នទាំងនោះ ខ្វះលក្ខខណ្ឌបែបវិទ្យាសាស្ត្រ និងមានភាពលម្អៀង។
ស្ថាប័នទាំង៣ ដែលសមាគមមីក្រូហិរញ្ញវត្ថុ ច្រានចោលរបាយការណ៍ស្ទង់មតិនោះ រួមមានសម្ព័ន្ធសហជីពកម្ពុជា (CATU) មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) និងសម្ព័ន្ធខ្មែរជំរឿន និងការពារសិទ្ធិមនុស្ស (LICADHO) ពាក់ព័ន្ធនឹងការចេញផ្សាយនូវរបាយការណ៍មួយ មានចំណងជើងថា៖ «ធ្វើការងាររហូតជំពាក់បំណុលវ័ណ្ឌក» ដោយបានស្ទង់មតិកម្មករចំនួន១៦២នាក់ មកពីរោងចក្រចំនួន៣ ដែលបានព្យួរការងារទាំងស្រុង ចន្លោះខែមីនា និងឧសភា ឆ្នាំ២០២០ ហើយស្របពេលដែលជំងឺកូវីដ-១៩ កំពុងរាតត្បាត ។
របាយការណ៍រួម ដែលចេញផ្សាយនៅថ្ងៃទី៣០ មិថុនានោះ បានផ្តោតការសិក្សាពីផលលំបាកនៃការជាប់ជំពាក់បំណុលរបស់កម្មករទាំងនោះ បានទាញសេចក្តីសន្និដ្ឋានថា៖ «បញ្ហានេះបង្កើតឱ្យមានវិបត្តិរំលោភសិទ្ធិមនុស្សជាច្រើន ដែលនាំឱ្យពួកគាត់ជួបការលំបាកខ្លាំងក្នុងការផ្គត់ផ្គង់ជីវភាពគ្រួសារនិងធ្វើឱ្យការកាន់កាប់ដីធ្លីរបស់ពួកគាត់ត្រូវរងសម្ពាធយ៉ាងខ្លាំងពីសំណាក់គ្រឹះស្ថានមីក្រូហិរញ្ញវត្ថុ ។ ប្រសិនបើគ្មានកម្មវិធីសម្រាលបន្ទុកបំណុលភ្លាមៗទេ នោះកម្មករ កម្មការិនីទាំងនេះ នឹងត្រូវប្រឈមនឹងការលក់ដីឬផ្ទះ កាត់បន្ថយការបរិភោគអាហារ ឬខ្ចីប្រាក់កម្ចីកាន់តែច្រើនឡើង ដើម្បីយកទៅសងបំណុលដែលមានស្រាប់»។
សមាគមមីក្រូហិរញ្ញវត្ថុ ចាត់ទុកវិធីសាស្ត្រនៃការស្ទង់មតិនេះ ខ្វះលក្ខខណ្ឌបែបវិទ្យាសាស្ត្រ ហើយមានភាពលម្អៀង និងខ្វះការយល់ដឹងពីវិស័យមីក្រូហិរញ្ញវត្ថុ ជាពិសេសគ្មានព័ត៌មានគ្រប់គ្រាន់ដែលអាចផ្ទៀងផ្ទាត់ឡើងវិញបាន។
សមាគមមីក្រូហិរញ្ញវត្ថុ បានចេញសេចក្តីថ្លែងការណ៍ នៅថ្ងៃទី១៣ កក្កដានេះថា៖«ដូចដែលបានបញ្ជាក់ស្រាប់ក្នុងរបាយការណ៍នេះ ការស្ទង់មតិនេះ គ្រាន់តែប្រមូលយកព័ត៌មានពីមនុស្សចំនួន ១៦២ នាក់ពីរោងចក្រចំនួន៣ ក្នុងចំណោមរោងចក្ររាប់រយពាន់ និងកម្មកររាប់សែននាក់។ អ្នកចូលរួមសម្ភាសទៀតសោត ក៏ត្រូវបានជ្រើសរើសតាមរយៈប្រធានសហជីពក្នុងរោងចក្រនីមួយៗ ពោលគឺមិនមែនរើសដោយចៃដន្យ(random) ដែលនេះមិនមែនជាវិធីសាស្ត្រដែលអាចទុកចិត្តបានឡើយ ដោយសារតែអាចមានភាពលម្អៀងនៃអ្នកជ្រើសរើសស្រាប់»។
របាយការណ៍រួមរបស់សង្គមស៊ីវិល និងសហជីព ស្តីពី«ធ្វើការរហូតដល់ជំពាក់បំណុលវ័ណ្ឌក» នេះ បានអះអាងថា បញ្ហាបំណុល បានបង្ខំឱ្យកម្មករលក់ទ្រព្យសម្បត្តិនិងខ្ចីគេបន្ថែម ដើម្បីសងបំណុលដល់ស្ថាប័នហិរញ្ញវត្ថុ។ របាយការណ៍ដដែល បានបញ្ជាក់ថា កម្មកររាប់ម៉ឺននាក់នឹងប្រឈមការលំបាកកាន់តែខ្លាំង ក្នុងជីវភាពរស់នៅ និងការសង់ប្រាក់ត្រឡប់ទៅស្ថាប័នហិរញ្ញវត្ថុវិញ ខណៈមានរោងចក្រព្យួរការងារជាបន្តបន្ទាប់។
អ្នកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា បានបញ្ជាក់ថា កម្មករ កម្មការិនីរោងចក្រកាត់ដេរ ខិតខំធ្វើការងារយ៉ាងខ្លាំង ដើម្បីមានលទ្ធភាពផ្គត់ផ្គង់អាហារបរិភោគដល់ក្រុមគ្រួសាររបស់ពួកគាត់។ អ្នកស្រី យ៉ាង សុភ័ណ្ឌ បន្ថែមថា ៖«ពេលនេះ ពួកគាត់ស្ទើរតែមិនអាចមានលទ្ធភាពចិញ្ចឹមខ្លួនឯង ។ ប្រសិនបើគ្មានកម្មវិធីសម្រាលបន្ទុកបំណុល ឬកិច្ចគាំពារផ្នែកសង្គមទេ ខ្ញុំព្រួយបារម្ភថា បញ្ហាទាំងនេះ នឹងនាំឱ្យពួកគាត់ជួបការលំបាកកាន់តែខ្លាំងឡើងៗ» ។
តែយ៉ាងណាសមាគមមីក្រូហិរញ្ញវត្ថុ អះអាងថា ទិន្នន័យរបាយការណ៍នេះ គ្មានភាពស៊ីចង្វាក់ជាមួយទិន្នន័យលម្អិតរបស់សមាគម ការិយាល័យឥណទានកម្ពុជា និងធនាគារជាតិនៃកម្ពុជានោះទេ។ «របាយការណ៍(សង្គមស៊ីវិល និងសហជីព)នេះ ក៏មិនបានបញ្ចេញនូវទំហំឥណទាន ប្រភពចំណូលផ្សេងទៀតក្រៅតែពីប្រាក់បៀវត្សរោងចក្រ ដែលទិន្នន័យទាំងនេះមានភាពចាំបាច់ក្នុងការវាយតម្លៃផលប៉ះពាល់ពិតប្រាកដ។ការស្ទង់មតិនេះក៏ត្រូវបានធ្វើក្នុងពេលរងផលប៉ះពាល់ពីជំងឺកូវីដ១៩ រួមផ្សំនឹងអ្នកចូលរួមឆ្លើយទាំងអស់សុទ្ធតែត្រូវបានរោងចក្រព្យួការងារ ដូចនេះជាកត្តាសន្យានុម័ត ប្រាក់ចំណូលរបស់ពួកគាត់នឹងធ្លាក់ចុះ ដែលនាំឱ្យប៉ះពាល់ជីវភាពរស់នៅ ក៏ដូចលទ្ធភាពក្នុងការសងត្រលប់ទៅកាន់គ្រឹះស្ថាន ហើយរឹតតែមិនមានអារម្មណ៍ល្អចំពោះស្ថានភាពទូទៅឡើយ»។ នេះជាការបញ្ជាក់របស់សមាគមមីក្រូហិរញ្ញវត្ថុ។
សមាគមមីក្រូហិរញ្ញវត្ថុកម្ពុជា អះអាងថា ខ្លួននឹងបន្តសិក្សាតាមដានបន្ថែមទៅលើស្ថានភាពវិវត្តនៃវិស័យកាត់ដេរ ព្រមទាំងជំរុញដល់សមាជិកខ្លួនទាំងអស់ ឱ្យបន្តការជួយសម្រាលដល់អតិថិជនដែលរងផលប៉ះពាល់ដោយជំងឺកូវីដ១៩ តាមរយៈការរៀបចំឥណទានឡើងវិញ និងតាមលទ្ធភាពផ្សេងៗទៀត។ គ្រឹះស្ថានមីក្រូហិរញ្ញវត្ថុ បានរៀបចំឥណទានឡើងវិញ ដល់អតិថជនជាងពីរសែននាក់ ក្នុងទំហំឥណទានជាង១ពាន់លានដុល្លារសហរដ្ឋអាមេរិក ក្នុងអំឡុងពេលវិបត្តិកូវីដ-១៩នេះ។
អត្ថបទទាក់ទង
មួយរយៈពេលចុងក្រោយនេះ សង្គមស៊ីវិល និងសហជីព ជាពិសេសអង្គសម្ព័ន្ធខ្មែរជំរឿន និងការពារសិទ្ធិមនុស្ស (LICADHO) តែងតែចេញរបាយការណ៍ពាក់ព័ន្ធនឹងបំណុលពលរដ្ឋ ជំពាក់គ្រឹះស្ថានហិរញ្ញវត្ថុជាបន្តបន្ទាប់ ដើម្បីរកវិធីដោះស្រាយ និងសម្រាលបន្ទុករបស់ពលរដ្ឋ។ ប៉ុន្តែសមាគមធនាគារនៅកម្ពុជា និងសមាគមមីក្រូហិរញ្ញវត្ថុនៅកម្ពុជា សុទ្ធតែប្រតិកម្មតបថា ការស្ទង់មតិចេញផ្សាយរបាយការណ៍នេះ ភាគច្រើនគ្មានមូលដ្ឋាន និងមិនយល់ពីវិស័យមីក្រូហិរញ្ញវត្ថុ។
បើតាមសមាគមមីក្រូ ការអនុម័តផ្តល់ប្រាក់កម្ចីរបស់គ្រឹះស្ថានមីក្រូហិរញ្ញវត្ថុនៅកម្ពុជា ទៅអតិថិជន ក៏ត្រូវឆ្លងកាត់ការវាយតម្លៃច្រើន រួមមានគោលបំណងប្រាក់កម្ចី សមត្ថភាពសងត្រលប់ដោយផ្ទៀងផ្ទាត់ប្រវត្តិកម្ចីជាមួយការិយាល័យឥណទានកម្ពុជា និងហានិភ័យនានា ដែលជាផ្នែកមួយនៃគោលការណ៍ការពារអតិថិជន។
គិតត្រឹមដំណាច់ខែមេសា ឆ្នាំ២០២០ គ្រឹះស្ថានមីក្រូហិរញ្ញវត្ថុ នៃសមាជិករបស់សមាគម បានបញ្ចេញប្រាក់កម្ចីដល់ប្រជាជនកម្ពុជា ជាង២,១លាននាក់ ដែលមានទំហំឥណទានសរុប ជាង៣០ទ្រីលានរៀល (៧,៤ប៊ីលានដុល្លា) ខណៈអតិថិជនបញ្ញើសរុបមានជាង២,៨លាននាក់ និងមានប្រាក់បញ្ញើសរុប ជាង១៥ទ្រីលានរៀល (៣,៧ប៊ីលានដុល្លា) ៕
Tag:
មីក្រូហិរញ្ញវត្ថុ
សេដ្ឋកិច្ច
© រក្សាសិទ្ធិដោយ thmeythmey.com
