មនុស្សជិត៩០នាក់ ពាក់ព័ន្ធបទល្មើសធនធានធម្មជាតិនៅតំបន់ជួរភ្នំក្រវាញ ត្រូវបានបញ្ជូនទៅតុលាការ

ជាតិ

មនុស្សជិត៩០នាក់ ពាក់ព័ន្ធបទល្មើសធនធានធម្មជាតិនៅតំបន់ជួរភ្នំក្រវាញ ត្រូវបានបញ្ជូនទៅតុលាការ

14, Jul 2020 , 8:59 am

រូបភាព

សកម្មភាពមន្ត្រីឧទ្យានុរក្សរបស់ក្រសួងបរិស្ថាននិងមន្ត្រីនៃអង្គការសម្ព័ន្ធមិត្តសត្វព្រៃ ចុះល្បាតបទល្មើសព្រៃឈើនិងសត្វព្រៃ នៅតំបន់ការពារធម្មជាតិជួរភ្នំក្រវាញ។

ដោយ: អ៊ូ សុខមាន (OU Sokmean)

ភ្នំពេញ៖ អាជ្ញាធរបានបញ្ជូនមនុស្សចំនួន៨៧នាក់ទៅតុលាការ ដែលពាក់ព័ន្ធនឹងបទល្មើសព្រៃឈើនៅតំបន់ការពារធម្មជាតិជួរភ្នំក្រវាញ ក្នុងរយៈពេលជាង១ឆ្នាំមក។ ជនល្មើសដែលបានបញ្ជូនទៅតុលាការនេះ គឺជាប់បទចោទពីការលួចចូលកាប់ឈើ បរបាញ់សត្វ និងទន្ទ្រានដីព្រៃក្នុងតំបន់ការពារធម្មជាតិ។នេះបើរបាយការណ៍របស់លោក នេត្រ ភក្ត្រា រដ្ឋលេខាធិការក្រសួងបរិស្ថានដែលផ្តល់ឱ្យក្រុមអ្នកសារព័ត៌មាន ។

អត្ថបទទាក់ទង

អាជ្ញាធររឹបអូសបានរណាអារឈើ និងអន្ទាក់សត្វរាប់ម៉ឺននៅព្រៃក្នុងខេត្តកោះកុង ពោធិ៍សាត់ និង កំពង់ស្ពឺ

ក្នុងរបាយការណ៍ដដែល បានអះអាងថា ក្រៅពីមានជនល្មើសជាង៨០បានបញ្ជូនទៅតុលាការនោះ អាជ្ញាធរនៃមន្ត្រីឧទ្យានុរក្សរបស់ក្រសួងបរិស្ថាន បានសហការជាមួយមន្ត្រីនៃអង្គការសម្ព័ន្ធមិត្តសត្វព្រៃ និងស្ថាប័នពាក់ព័ន្ធ បានចុះល្បាតទប់ស្កាត់ការកាត់បំផ្លាញព្រៃឈើ និងបង្ក្រាបបទល្មើសធនធានធម្មជាតិសរុប៦៥៣ករណីទៀតផងដែរ។ ក្នុងនោះមានការបញ្ឈប់សកម្មភាពទន្ទ្រានដីខុសច្បាប់ចំនួន១៧១ករណី, ដាក់ពាក្យបណ្តឹងទៅតុលាការចំនួន ២០៥ករណី និងពិន័យអន្តរកាលចំនួន ២៧៧ករណី។

លើសពីនេះទៅទៀត អាជ្ញាធរ បានរុះរើខ្ទមខុសច្បាប់ជិត១ពាន់កន្លែង ដកហូតឈើបានជាង២ពាន់ម៉ែត្រគូប ព្រមទាំងរឹបអូសរណាយន្តបាន ១,៩៥៤គ្រឿង, រថយន្តដឹកឈើបាន១៦៩គ្រឿង, ត្រាក់ទ័រនិងរថយន្តប៊ុលដូហ្សែរ៤៣គ្រឿង, ម៉ូតូ១៧៣គ្រឿង គោយន្ត២៧១គ្រឿង និងដោះអន្ទាក់ចាប់សត្វព្រៃបានជាង ៣,២ ម៉ឺនអន្ទាក់។

ការបង្ក្រាបបទល្មើស និងរឹបអូស បានវត្ថុតាងបំផ្លាញសម្បត្តិធម្មជាតិនៅកន្លែងកើតហេតុជាក់ស្តែងនេះ ដោយសារកិច្ចសហប្រតិបត្តិការ និងការអនុវត្តច្បាប់យ៉ាងល្អរបស់អាជ្ញាធរដែនដី និងភាគី ដែលពាក់ព័ន្ធក្នុងតំបន់ការពារធម្មជាតិជួរភ្នំក្រវាញនេះ។ ពិសេសអង្គការសម្ព័ន្ធមិត្តសត្វព្រៃ ដែលបានផ្តោតការងារលើការពារសក្តានុពលបរិស្ថាន និងធនធានធម្មជាតិក្នុងតំបន់ជួរភ្នំក្រវាញ នៅក្នុងទឹកដីខេត្តកោះកុង ពោធិ៍សាត់ និងកំពង់ស្ពឺ ក្នុងទំហំផ្ទៃដីទំហំ ១,៤ លានហិកតា។ ក្រសួងបរិស្ថាន និងអង្គការសមព័ន្ធមិត្តសត្វព្រៃ បានចុះអនុស្សរណៈយោគយល់((MOU)លើកិច្ចសហប្រតិបត្តិការការពារនិងអភិរក្សតំបន់ជួរភ្នំក្រវាញ តាំងឆ្នាំ២០០១មក។

កម្ពុជាមានតំបន់ការពារធម្មជាតិចំនួន៦៩កន្លែង គ្រប់ដណ្តប់លើផ្ទៃដីទំហំ៧,៣លានហិកតា។ ទំហំផ្ទៃដីដ៏ធំនេះ គឺមានកិច្ចសហការយ៉ាងល្អពីគ្រប់ភាគីដែលពាក់ព័ន្ធនានា ក្នុងការធានាបាននូវនិរន្តភាពការពារសក្តានុពលបរិស្ថាន និងអភិរក្សធនធានធម្មជាតិ សម្រាប់តម្កល់ជូនឧត្តមប្រយោជន៍ដល់ជំនាន់ក្រោយ៕