កីឡាជាតិ
ជាតិ
លោក ហែម លំផាត់ គ្រូបង្វឹកក្រុមជម្រើសជាតិកីឡាហែលទឹកទទួលមរណភាពនៅអាយុ៤៤ឆ្នាំ
× លោក ហែម លំផាត់ គ្រូបង្វឹកក្រុមកីឡាករជម្រើសជាតិកីឡាហែលទឹកនៃសហព័ន្ធខ្មែរកីឡាហែលទឹកបានទទួលមរណភាពនៅអាយុ៤៤ឆ្នាំ ម៉ោង១រំលងអធ្រាត្រថ្ងៃទី១៥ ខែកក្កដា ឆ្នាំ២០២០ ដោយសារជំងឺប្រចាំកាយ។ សពគ្រូបង្វឹករូបនេះ កំពុងតម្កល់ធ្វើបុណ្យនៅគេហដ្ឋានរបស់លោក នៅម្តុំពោធិ៍ចិនតុង ខណ្ឌពោធិ៍សែនជ័យ រាជធានីភ្នំពេញ។
លោក ហែម លំផាត់ សមាជិកប្រតិបត្តិ និងប្រធានក្រុមបច្ចេកទេសគ្រូបង្វឹកនៃសហព័ន្ធខ្មែរកីឡាហែលទឹក ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យកាល់ម៉ែតភ្លាមៗកាលពីថ្ងៃទី១៣ ខែកក្កដា ឆ្នាំ២០២០ ក្រោយលោកមានអាការចុកពោះ ហើយក្អួតឈាម។ តាមរយៈលទ្ធផលពិនិត្យរបស់ក្រុមគ្រូពេទ្យ លោក ហែម ផាត់ មានបញ្ហាធ្លាយក្រពះ។ នេះបើតាមការឲ្យដឹងពីលោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា។
លោកបានបន្ថែមទៀតថា ក្រោយពិនិត្យឃើញបែបនេះក្រុមគ្រូពេទ្យ ក៏បានចងត្រង់មុខរបួសដែលធ្លាយ ដើម្បីកុំឲ្យហូរឈាម។ តែយ៉ាងណាឈាមនៅតែបន្តដដែល រហូតដល់យប់ថ្ងៃទី១៤ ខែកក្កដា ឆ្នាំ២០២០ ស្ថានភាពជំងឺរបស់លោក ហែម លំផាត់ បានធ្វើទុក្ខខ្លាំង រហូតធ្វើឲ្យលោកមិនអាចទ្រាំទ្របាន ក៏បានទទួលមរណភាពនៅម៉ោង១រំលងអាធ្រាត្រថ្ងៃទី១៥ ខែកក្កដា នេះតែម្តង។
សម្រាប់លោក យី វាសនា មរណភាពរបស់លោក ហែម លំផាត់ ជាការបាត់បង់ធនធានគ្រូបង្វឹក ដ៏មានស្នាដៃ និងគុណភាពខ្ពស់ ដ្បិតលោកធ្លាប់បង្វឹកក្រុមកីឡាករកីឡាការិនីជនពិការ ឲ្យទទួលបានមេដាយជាច្រើននៅលើឆាកអន្តរជាតិ។
លោកបានបង្ហាញការសោកស្តាយយ៉ាងដូច្នេះថា៖«យើងទាំងអស់គ្នាមានការសោកស្តាយ និងរន្ធត់ចិត្តជាខ្លាំងដោយលោកគ្រូ ហែម លំផាត់ ដែលជាគ្រូដ៏មានស្នាដៃ ពិសេសបានបង្ហាត់សិស្សអូឡាំពិក និងប៉ារ៉ាឡាំពិកយើង និងធ្លាប់ដឹកនាំកីឡាករចូលរួមប្រកួតជាច្រើនលើកច្រើនសារនិងទទួលបានមេដាយជាច្រើនសម្រាប់កីឡាករ កីឡាការិនីជនពិការយើង បានទទួលមរណភាពហើយ»៕
Tag:
ហែលទឹក
ហែម លំផាត់
ហែម គីរី
© រក្សាសិទ្ធិដោយ thmeythmey.com