សណ្ឋាគារមួយរៀបចំព្រឹត្តិការណ៍ជិះកង់សប្បុរសធម៌ រៃអង្គាសជំនួយជួយជនក្រីក្រដែលជួបវិបត្តិដោយសារជំងឺកូវីដ ១៩

អត្ថបទពាណិជ្ជកម្ម

សណ្ឋាគារមួយរៀបចំព្រឹត្តិការណ៍ជិះកង់សប្បុរសធម៌ រៃអង្គាសជំនួយជួយជនក្រីក្រដែលជួបវិបត្តិដោយសារជំងឺកូវីដ ១៩

16, Jul 2020 , 10:18 am

រូបភាព

ដោយ: សារព័ត៌មានថ្មីៗ

វិបត្តិជំងឺកូវីដ១៩ ធ្វើឱ្យប៉ះពាល់ដល់សេដ្ឋកិច្ចប្រជាពលរដ្ឋមួយផ្នែកធំនៅក្នុងខេត្តសៀមរាប ដែលជាខេត្តមួយពឹងអាស្រ័យធំលើវិស័យទេសចរណ៍។ ប្រជាពលរដ្ឋដែលធ្លាប់ទទួលផលពីវិស័យនេះ បានបាត់បង់ចំណូល និងគ្មានថវិកាសងថ្លៃធនាគារជាដើម។ កត្តានេះ ធ្វើឱ្យស្ថានភាពក្នុងគ្រួសារពួកគេមានភាពលំបាក ហើយគ្រួសារខ្លះគ្មានម្ហូបអាហារគ្រប់គ្រាន់ ដោយសារសមាជិកគ្រួសារបាត់បង់ការងារធ្វើ។

ដោយមើលឃើញស្ថានភាពដ៏លំបាកនេះ សណ្ឋាគារមួយក្នុងក្រុងសៀមរាប គឺសណ្ឋាគារ The Sanctuary Residence បានរិះរកគ្រប់មធ្យោបាយ និងបានសហការជាមួយអង្គការ Life Cycle Cambodia ដើម្បីរកជំនួយ ធ្វើយ៉ាងណាជួយពួកគាត់ឱ្យបានទាន់ពេលវេលាទៅតាមលទ្ធភាពដែលអាចជួយទៅបាន។ ព្រឹត្តិការណ៍ជិះកង់សប្បុរសធម៌ ពីភ្នំពេញ-សៀមរាប ដើម្បីរៃអង្គាសថវិកាជួយជនក្រីក្រក្នុងខេត្តសៀមរាប នឹងរៀបចំឡើងពីថ្ងៃទី១៦ ដល់ថ្ងៃទី១៩ កក្កដា នេះ នៅលើចំងាយផ្លូវ ២៥១គីឡូម៉ែត្រ។ អ្នកជិះកង់នីមួយៗ សង្ឃឹមថានឹងមិនមានការស្រេកឃ្លានទៀតឡើយក្នុងរយៈពេលយ៉ាងហោចណាស់ ៦ខែទៀត សម្រាប់គ្រួសារអ្នកជិះកង់ផ្ទាល់ និង គ្រួសារផ្សេងៗ សរុប១០០គ្រួសារ ( អ្នកជិះកងម្នាក់រកជំនួយសម្រាប់ ១០ គ្រួសារ) ដែលកំពុងត្រូវការគាំទ្រផ្នែកអាហារតាមរយៈការរៃអង្គាសទៅកាន់ធនាគារអាហារសៀមរាប ( Food Bank Siem Reap ) ដោយការជិះកង់នេះ ។

កាលពី២សប្ដាហ៍មុន ក្រុមការងារទទួលបានព័ត៌មានអំពីការសុំជំនួយដល់គ្រួសារដ៏លំបាកមួយដែលមានតែឪពុកពិការ ( គ្រោះថ្នាក់ការងារ ) និងកូនស្រីអាយុ៧ឆ្នាំម្នាក់ ។ គាត់ត្រូវបានប្រពន្ធបោះបង់ចោល ។ គាត់មិនមានលទ្ធភាពធ្វើការព្រោះគាត់ពិការមួយកំណាត់ខ្លួន បន្ទុកទាំងអស់ត្រូវធ្លាក់លើកូនស្រី។ នាងមានតែខោអាវ១សម្រាប់ជាប់នឹងខ្លួន គ្មានទាំងស្បែកជើង ហើយពួកគេគ្មានអាហាររយៈពេល ២ ថ្ងៃមកហើយ។ ទិដ្ឋភាពនេះធ្វើឱ្យយើងទប់ចិត្តមិនបាន និងរិះរកគ្រប់មធ្យោបាយដើម្បីជួយដល់ពួកគាត់។ ទីបំផុតយើងបានបញ្ជូនអាហារ និងសម្ភារប្រើប្រាស់មួយចំនួនឱ្យពួកគាត់បានទាន់ពេលវេលា អំឡុងពេលដែលគាត់ត្រូវការជំនួយបំផុត និងបានបញ្ជូនឪពុកទៅមន្ទីពេទ្យដើម្បីពិនិត្យ និងរកវិធីព្យាបាលគាត់បានប្រសើរឡើង សង្ឃឹមថាគាត់នឹងអាចមានលទ្ធភាពជួយខ្លួនគាត់បាននៅពេលអនាគត ។

អ្វីដែលយើងកំពុងធ្វើបច្ចុប្បន្ននេះ គឺធ្វើការវៃអង្គាសការឧបត្ថមពីអ្នកទាំងអស់គ្នា ដើម្បីយកទៅជួយដល់គ្រួសារដែលក្រីក្រ ខ្វះលទ្ធភាព លំបាកវេទនា ដោយផ្ដល់ជាអាហារដូចជា៖ អង្ករ ទឹកស៊ីអ៊ីវ ទឹកត្រី ស្ករ អំបិល មី ស៊ុត ខ្លាញ់ ខ្ទឹម ប្រភេទត្រីក្រៀម នឹងសាប៊ូ ១ ដុំ ដែលក្នុងមួយកញ្ចប់មានតម្លៃ ៣០ដុល្លារ។ ដូចនេះ រាល់ការរៃអង្គាសបាន ៣០ដុល្លារ យើងអាចជួយបានមួយគ្រួសារក្នុងរយៈពេល ១ ខែ ។ ដោយសារតែមានជំនួយពេលនេះយើងទទួលបាន ១០០គ្រួសារហើយ ហើយនៅសល់ ២០០ គ្រួសារទៀតស្ថិតក្នុងបញ្ជីរង់ចាំ តែយើងសង្ឃឹមថាយ៉ាងហោចអាចជួយបាន ១០០ គ្រួសារបន្ថែមទៀត ។

តាមរយៈព្រិត្តិការណ៍ជិះកង់សប្បុរសធ៌មដែលកើតចេញពីឆន្ទៈនិងបេះដូងពិតៗនេះ យើងសង្ឃឹមយ៉ាងមុតមាំថាបងប្អូនប្រជាពលរដ្ធនឹងចូលរួមគាំទ្រ និងឧបត្ថម្ភទៅតាមសទ្ធាជ្រះថ្លារៀងៗខ្លួន ដើម្បីចូលរួមជួយក្នុងន័យមនុស្សធម៌ទៅដល់បងប្អូនទីទ័លក្រដែលត្រូវការជំនួយពីពួកយើងជាបន្ទាន់៕