COVID-19
កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
Real Madrid បានក្លាយជាម្ចាស់ពានរង្វាន់លីគកំពូលអេស្ប៉ាញ La Liga រដូវកាល ២០១៩-២០ នេះ និងជាការឈ្នះលើកទី៣៤របស់ខ្លួន ក្រោយគូប្រជែង Barcelona ភ្លាត់ស្នៀតចាញ់ Osasuna ក្នុងលទ្ធផល ២-១។ Real មាន៧ពិន្ទុនាំមុខដាច់ Barca ខណៈការប្រកួតសល់១លើកទៀតប៉ុណ្ណោះ។
Real Madrid អបអរពិធីលើកពាននេះនៅលើទឹកដីខ្លួន Alfredo Di Stefano តែម្តង នៅក្រោយពេលពួកគេយកឈ្នះ Villarreal ២-១ នាការប្រកួតសប្តាហ៍ទី ៣៧ នៅយប់ថ្ងៃទី១៦ ខែកក្កដា។
អ្វីដែលពិសេសដែលនាំឲ្យក្រុមដែលដឹកនាំដោយអ្នកចាត់ការទូទៅលោក Zinedine Zidane អាចលើកពានរដូវកាលនេះ គឺតាមរយៈជ័យជម្នះ១០លើកជាប់គ្នា ចាប់តាំងពីលីគត្រូវបានអនុញ្ញាតឲ្យបន្តការប្រកួតឡើងវិញ ក្រោយពន្យារពេលមួយរយៈដោយសារជំងឺ COVID-19 ។
ក្រុមស្តេចសអាចរកបាន៨៦ពិន្ទុ ពីការប្រកួត៣៧លើក ដោយមានពិន្ទុនាំមុខដាច់លើក្រុមលេខ២ Barcelona ដល់ទៅ៧ពិន្ទុ បន្ទាប់ពីក្រុមរហស្សនាមអ្នកមានបុណ្យរងភាពអាម៉ាស់តាមរយៈបរាជ័យក្រោមថ្វីជើង Osasuna ២-១ ក្នុងដីខ្លួនឯង។
នេះជាការលើកពានលីគក្របខណ្ឌកំពូលអេស្ប៉ាញទី៣៤ក្នុងប្រវត្តិសាស្ត្រក្លិបរហស្សនាមស្តេចស ក្រោយអាក់ខានពីររដូវកាលចុងក្រោយជាប់គ្នា (២០១៧-១៨, ២០១៨-១៩)។
ក្រោយជួយក្រុមលើកពាន La Liga លោក Zidane អ្នកចាត់ការសញ្ជាតិបារាំង បានបង្ហាញការពេញចិត្តយ៉ាងខ្លាំងលើកូនក្រុមរបស់លោក បើទោះជាពួកគេត្រូវសម្រាកអស់ពេល៣ខែក្តី។
«យើងបានឈ្នះលីគ ពីព្រោះយើងឈ្នះពិន្ទុច្រើនបំផុត។ ថ្ងៃនេះជាថ្ងៃល្អបំផុតសម្រាប់ខ្ញុំក្នុងនាមជាអ្នកអាជីពក្នុងវិស័យកីឡាបាល់ទាត់ បន្ទាប់ពីយើងសម្រាកអស់ ៣ ខែ ហើយវាពិតជាអស្ចារ្យណាស់ដែលយើងអាចសម្រេចវាបាន»។ នេះជាការអះអាងរបស់អ្នកចាត់ការវ័យ ៤៨ឆ្នាំ៕
© រក្សាសិទ្ធិដោយ thmeythmey.com
