COVID-19
កីឡាអន្តរជាតិ
អន្តរជាតិ
La Liga៖ រដ្ឋមន្ត្រីសុខាភិបាលអេស្ប៉ាញមិនចង់ឲ្យមានអ្នកគាំទ្រ តែអ្នករៀបចំចង់បានខ្លះ
×![]()
ដោយ: ទេព ពិទូរ្យ
រដ្ឋមន្ត្រីក្រសួងសុខាភិបាលអេស្ប៉ាញលោក Santiago Illa មិនទាន់ចង់ឲ្យអ្នកគាំទ្រចូលកីឡដ្ឋានក្នុងការប្រកួតបាល់ទាត់ទេ នៅពេលរដូវកាលថ្មី ២០២០-២១ ចាប់ផ្តើមឡើងវិញនៅខែកញ្ញាខាងមុខ។ ស្របពេលគ្នានេះ នាយកដ្ឋានកីឡារបស់រដ្ឋាភិបាលអេស្ប៉ាញ និង La Liga សង្ឃឹមថាអ្នកគាំទ្រនឹងវិលត្រឡប់វិញ ដោយកាត់បន្ថយចំនួនអ្នកទស្សនា។
បើទោះបីការគំរាមកំហែងនៃការកើនឡើងជំងឺ COVID-19 ក្នុងប្រទេសអេស្ប៉ាញ ត្រូវបានទប់ស្កាត់ និងការពារបានមួយកម្រិតធំក្នុងរយៈពេលចុងក្រោយនេះក្តី តែរដ្ឋមន្ត្រីក្រសួងសុខាភិបាលមិនចង់ឲ្យមានការប្រមូលផ្តុំហ្វូងមនុស្សក្នុងកីឡដ្ឋានបាល់ទាត់ឡើយ។
លោក Illa បានប្រាប់វិទ្យុ Cadena Ser ថា៖ «និយាយដោយស្មោះត្រង់ទៅ ខ្ញុំមិនបានឃើញស្ថានភាពប្រសើរឡើងនៃ COVID-19 នោះទេ។ យើងបានឃើញការឆ្លងជាសហគមន៍ បើទោះបីយើងអាចគ្រប់គ្រងវាបានដែលខ្ញុំគិតថាដោយសំណាងនោះ ក៏ខ្ញុំនៅតែមិនទាន់ចង់ឲ្យមានអ្នកគាំទ្រវិលត្រឡប់មកវិញដែរ»។
La Liga បានបន្តរដូវកាលឡើងវិញ បន្ទាប់ពីផ្អាកអស់ជិត៣ខែដោយសារ COVID-19 ថ្ងៃទី ១១ ខែមិថុនាដើម្បីបញ្ចប់រដូវកាល ២០១៩-២០នេះ ហើយគ្រោងនឹងចាប់ផ្តើមយុទ្ធនាការថ្មី ២០២០-២១ នៅថ្ងៃទី១២ ខែកញ្ញា។
ផ្ទុយពីលោក Illa នាយកដ្ឋានកីឡារបស់រដ្ឋាភិបាលអេស្ប៉ាញ និងស្ថាប័ន La Liga ចង់ឲ្យមានអ្នកទស្សនាផ្ទាល់មានវត្តមានឡើងវិញ ដោយកម្រិតចំនួនអ្នកគាំទ្រក្នុងកីឡដ្ឋាន នៅរដូវកាលថ្មីខាងមុខ។
គិតត្រឹមថ្ងៃទី១៧ ខែកក្កដា អេស្ប៉ាញមានអ្នកឆ្លង COVID-19 ជាង៣សែននាក់ ក្នុងនោះស្លាប់ជាង២៨០០០នាក់៕
Tag:
Santiago Illa
La Liga
COVID-19
© រក្សាសិទ្ធិដោយ thmeythmey.com
