ជាតិ
សង្គមជាតិ
២៥ខេត្ត/រាជធានី
រដ្ឋមន្ត្រីកសិកម្មអះអាងថា ក្នុង១ឆ្នាំ កសិករអាចដាំបន្លែក្នុងផ្ទះសំណាញ់ពី៧ទៅ៨ដង
× ភ្នំពេញ៖ ក្នុងបរិបទថ្មីលើវិស័យកសិកម្ម ដើម្បីឆ្លើយតបទៅនឹងភាពខ្វះខាតកម្លាំងពលកម្ម និងកាត់បន្ថយផលប៉ះពាល់ពីការរំខានរបស់សត្វចង្រៃ និងងាយស្រួលថែទាំ វិធីសាស្ត្រដាំបន្លែក្នុងផ្ទះសំណាញ់ កំពុងក្លាយជាគោលដៅពេញនិយម។ កសិករ អាចមានលទ្ធភាពដាំដុះពី ៧-៨ ដងក្នុងមួយឆ្នាំ និងមានតម្លៃចាប់ពី ៣ពាន់រៀល ទៅ ៦ពាន់រៀលក្នុងមួយគីឡូ។ នេះបើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោក វេង សាខុន បន្តទៀតថា កសិករ បានផ្លាស់ប្ដូរទម្លាប់ពីការដាំដុះនៅទីវាលស្រែ ឫចំការ ប្រែមកដាំដុះបន្លែក្នុងផ្ទះសំណាញ់វិញ។ បើប្រៀបធៀបជាមួយការដាំបន្លែធម្មតា ការដាំបន្លែក្នុងផ្ទះសំណាញ់មានសុវត្ថិភាពខ្ពស់ កាត់បន្ថយការ លើការចំណាយទិញថ្នាំគីមី និងជាតម្រូវការខ្ពស់លើទីផ្សារ។
ជាមួយគ្នានេះ រដ្ឋាភិបាលកម្ពុជា បានជំរុញឲ្យកសិករបង្កើនការដាំដុះ ការចិញ្ចឹមសត្វ ដើម្បីផ្គត់ផ្គង់ទីផ្សារក្នុងស្រុក និងឈានដល់ការកាត់បន្ថយការនាំចូលពីក្រៅក្នុងដំណាក់កាលនៃការរីករាលដាលជាសាកលនៃមេរោគកូវីដ១៩។
រដ្ឋមន្ត្រីក្រសួងកសិកម្មរូបនេះ ស្នើសុំឲ្យប្រជាពលរដ្ឋខិតខំប្រឹងប្រែងបន្ថែមទៀតលើការងារបង្កបង្កើនផល បង្កើនបរិមាណផលិត ធានាគុណភាព លើកកម្ពស់សមត្ថភាពកែច្នៃវេចខ្ចប់ ដើម្បីធ្វើការប្រកួតប្រជែង។
ឆ្លើយតបតាមតម្រូវការទីផ្សារ និងចំណង់ចំណូលចិត្តអ្នកបរិភោគ កំណើនចំណូលគ្រួសារ និងកាត់បន្ថយភាពក្រីក្រ និងជាពិសេសកាត់បន្ថយការនាំចូល ដោយផ្តោតជាសំខាន់លើការប្រើប្រាស់ផ្ទះសំណាញ់ និងប្រព័ន្ធស្រោចស្រពបន្លែ ធ្វើយ៉ាងណាបង្កើនការជឿទុកចិត្តពីអតិថិជន តាមរយ:គុណភាព និងសុវត្ថិភាពនៃផលិតផល៕
Tag:
កសិកម្ម
បន្លែសុវត្ថិភាព
© រក្សាសិទ្ធិដោយ thmeythmey.com