COVID-19
ជាតិ
សង្គមជាតិ
មនុស្ស១០នាក់ ប៉ះពាល់ស្ត្រីខ្មែរ-អាមេរិក ដែលរត់ពីកន្លែងចត្តាឡីស័ក តេស្តឃើញអវិជ្ជមានកូវីដ-១៩ ស្ត្រីដែលរត់ចេញពីកន្លែងធ្វើចត្តាឡីស័ក ដែលសមត្ថកិច្ចបានរកឃើញនៅខេត្តកំពង់ចាម។ រូបភាពពីអគ្គស្នងការនគរបាលជាតិ
× ភ្នំពេញ៖ មនុស្ស១០នាក់ ដែលបានប៉ះពាល់នឹងស្ត្រីខ្មែរ-អាមេរិក ដែលរត់ពីកន្លែងចត្តាឡីស័កនៅរាជធានីភ្នំពេញ ទៅខេត្តកំពង់ចាមនោះ ត្រូវបានត្រួតពិនិត្យសុខភាពហើយ។ ពួកគេទាំងនោះ គ្មានរោគសញ្ញាកូវីដ-១៩ នោះទេ។
លោក អ៊ុន ចាន់ដា អភិបាលខេត្តកំពង់ចាមបានបញ្ជាក់ថា ស្ត្រីដែលរត់ពីសណ្ឋាគារដាក់ចត្តាឡីស័កនោះ ត្រូវបានអាជ្ញាធរ ដាក់ឱ្យនៅដោយឡែក នៅសណ្ឋាគារមួយកន្លែង ក្នុងខេត្តកំពង់ចាម ក្រោយធ្វើតេស្តជាលើកទី២ ហើយអវិជ្ជមាន ជំងឺកូវីដ-១៩។ ក្រៅពីស្ត្រីខ្មែរ-អាមេរិករូបនេះ អាជ្ញាធរក៏បានចុះស្វែងរកឃើញមនុស្ស១០នាក់ ដែលបានប៉ះពាល់នឹងស្ត្រីរូបនោះ ដោយបានយកទៅត្រួតពិនិត្យសុខភាពរួចរាល់ហើយ។ បើតាមលោក អ៊ុន ចាន់ដា មនុស្សទាំង១០នាក់នោះ ពុំមានចេញនូវរោគសញ្ញាសង្ស័យទាក់ទងនឹងជំងឺកូវីដ-១៩ឡើយ។
ពាក់ព័ន្ធនឹងចំណាត់លើស្ត្រីខ្មែរ-អាមេរិក ដែលលួចចេញពីកន្លែងចត្តាឡីស័កនេះ ក្រសួងសុខាភិបាល មិនទាន់អាចបង្ហើបបានទេ។ ថ្លែងប្រាប់សារព័ត៌មានថ្មីៗ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានបញ្ជាក់ថា ក្រសួងសម្រេចឱ្យស្ត្រីរូបនេះ រស់នៅដោយឡែក១៤ថ្ងៃសិន បន្ទាប់មកទើបពិភាក្សាគ្នាលើចំណាត់ការតាមក្រោយ។
«ករណីដែលបានចាក ចេញពីកន្លែងធ្វើចត្តាឡីស័ក ដោយមិនបានស្នើសុំត្រឹមត្រូវ ដែលជាទង្វើលួចចេញដោយមិនគោរពតាមវិធានការចត្តាឡីស័កសម្រាប់គ្រប់គ្រងប្រទេសក្នុងគ្រាមានការរាតត្បាតជំងឺឆ្លងជាអន្តរជាតិនេះ។ ករណីនេះ ទាមទារពេលវេលាបន្តិចសិន ដើម្បីក្រុមការងារ ថ្នាក់ក្រោមជាតិដែលមានអាជ្ញាធរខេត្តដឹកនាំ កំពុងធ្វើការងារបន្តទៀតសិន»។ នេះជាការបញ្ជាក់របស់លោកស្រី ឱ វណ្ណឌីន។
ដ្បិតមិនទាន់ឈានដល់ការដាក់ពិន័យ តែលោកស្រី ឱ វណ្ណឌីន ក៏បានព្រលយពីវិធានការច្បាប់ដែលត្រូវអនុត្តលើអ្នកអនុវត្តផ្ទុយពីសេចក្តីណែនាំរបស់ក្រសួងដែរ។ រដ្ឋលេខាធិការក្រសួងសុខាភិបាលរូបនេះ បានលើកឡើងដូច្នេះថា៖«ប្រសិនបើមិនប្រតិបត្តិតាមវិធានការដែលក្រសួងសុខាភិបាលដាក់ចេញឲ្យអនុវត្តនោះទេ បុគ្គលដែលមិនគោរព និងមិនប្រតិបត្តិតាមវិធានការសុខាភិបាល ឫរត់គេចវេស ពីការអនុវត្តវិធានការនេះ ដោយចេតនា ឫអចេតនាក្តី នឹងត្រូវទទួលទោស ឫទទួលការផាកពិន័យ ស្របតាមផ្លូវច្បាប់មានជាធរមាននៅកម្ពុជា ដូចជាអនុក្រឹត្យលេខ១២៩ អនក្រ.បក ចុះថ្ងៃទី១៧ ខែកញ្ញា ឆ្នាំ២០១៥ ស្តីពី វិធានការសុខាភិបាល ដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិ នៃជំងឺនៅតាមច្រកចេញចូល ជាដើម»។
កន្លងមក ក៏មានការគេចវេសក្នុងការធ្វើតេស្តរកវីរុសកូវីដ-១៩ ក្នុងចំនួនតិចតួចណាស់ តែមិនមានការគេចវេសធ្វើចត្តាឡីស័ក បែបដូចករណីស្ត្រីខ្មែរ-អាមេរិកនេះទេ។ នេះជាការបញ្ជាក់របស់លោកស្រី ឱ វណ្ណឌីន ដែលបានបន្ថែមថា ក្រសួងក៏បានអប់រំណែនាំអ្នកគេចវេសធ្វើតេស្តនោះដែរ។
គិតត្រឹមថ្ងៃទី១៩ កក្កដានេះ កម្ពុជាមានអ្នកឆ្លងជំងឺកូវីដ-១៩ សរុប ១៧១នាក់ ក្នុងនោះព្យាបាលជាសះស្បើយ ១៣៦ នាក់ និងកំពុងព្យាបាលមាន ៣៥នាក់ (២នាក់ជាមន្ត្រីស្ថាតទូតអាមេរិក)។
© រក្សាសិទ្ធិដោយ thmeythmey.com