ជាតិ
រនាលពណ៌។ រូបភាព៖ ស៊ុន វិសាល
×![]()
រនាលពណ៌ ជាបក្សីដែលមានសម្រស់ស្រស់ស្អាត រស់នៅតាមតំបន់ដីសើម។ រនាលពណ៌រស់នៅពាសពេញឧបទ្វីបឥណ្ឌា។ វាមានរបាយរីកសាយភាយមកដល់ស្រីលង្កា ឥណ្ឌូចិន និងភាគខាងត្បូងប្រទេសចិន។ រនាលពណ៌មិនមែនជាប្រភេទអន្តោប្រវេសន៍ទេ (មានវត្តមានពេញមួយឆ្នាំ) និងភាគច្រើនគឺធ្វើចរាចរនៅតែក្នុងតំបន់មួយជាក់លាក់។ ប៉ុន្តែ ក៏មានប្រភេទសត្វនេះមួយចំនួន ដែលបានធ្វើចរាចរទៅប្រទេសភូមាភាគខាងលិច។ នៅកម្ពុជា គេប្រទះឃើញវត្តមានរបស់វានៅតំបន់រ៉ាមសារព្រែកទាល់ ចាប់ពីខែវិច្ឆិកា រហូតដល់រដូវទឹកឡើង ខែកក្កដា ឬសីហា វាបានផ្លាស់ទីចេញពីជម្រក ទៅរកស៊ីតាមវាលស្រែ ឬវាលទំនាបលិចទឹក តាមបឹង និងនៅតំបន់ឆ្នេរ។
ជម្រក៖ រនាលពណ៌ រស់នៅក្នុងតំបន់ដីសើមទឹកសាប និងវាលទំនាបលិចទឹក តំបន់វាលស្រែលិចទឹក និង បឹង។ នៅកម្ពុជា គេឃើញវត្តមាននៅតំបន់ព្រែកទាល់ និងធ្វើចរាចរចេញទៅអាងត្រពាំងថ្ម ខេត្តបន្ទាយមានជ័យ និងបឹងពារាំង ទំនាបលិចទឹកបឹងទន្លេសាប ក្នុងសង្កាត់ជ្រាវ ខេត្តសៀមរាប ។ បន្ថែមពីនេះ មានសត្វរនាលពណ៌មួយចំនួន បានបង្ហាញវត្តមាននៅតំបន់ឆ្នេរដែរ ដូចជាឧទ្យានជាតិរាមជាដើម។
រូបរាង៖ សត្វរនាលពណ៌ មានកម្ពស់ ៩៣ ទៅ១០២សង់ទីម៉ែត្រ និងទម្ងន់ ២ ទៅ៥គីឡូក្រាម។ រនាលពណ៌ មានឈ្មោះវិទ្យាសាស្ត្រ Mycteria leucocephala ។ ជាសត្វមានវ័ណ្ឌខ្មៅលើដើមទ្រូង ។ សត្វប្រភេទនេះ មានចំពុះវែងពណ៌លឿងចាស់ និងមុខពណ៌លឿង។ វាមានរោមពណ៌ស និងចុងកន្ទុយរោមពណ៌ផ្កាឈូក នៅពេលវាពេញវ័យ។ នៅក្នុងរដូវកាលបន្តពូជ វាមានរោមពណ៌ភ្លឺជាងពេលធម្មតា។ ពេលវានៅតូច មានសម្បុរពណ៌ត្នោតខ្ចី លើកលែងតែរោមវ័ណ្ណដើមទ្រូង។ រវាងសត្វញី និងសត្វឈ្មោលពេលពេញវ័យបន្តពូជ មិនមានបង្ហាញចរិតលក្ខណៈខុសប្លែកពីគ្នាទេ ប៉ុន្តែសត្វរនាលពណ៌ឈ្មោលមានរូបរាងធំជាងសត្វញីបន្តិច។ ទំហំខ្លួនរបស់វា គឺជាសូចនាករមួយសម្រាប់បង្ហាញពីភេទរបស់សត្វ ។
© រក្សាសិទ្ធិដោយ thmeythmey.com
