កីឡាអន្តរជាតិ
អន្តរជាតិ
Ballon d'Or ផ្អាកផ្តល់ពានឲ្យកីឡាករលើកដំបូងក្នុងរយៈពេល៦៤ឆ្នាំ ដោយសារ COVID-19
× ពាន Ballon d'Or ឆ្នាំ២០២០ មិនត្រូវផ្តល់ឲ្យកីឡាករបាល់ទាត់រូបណាឡើយ ដែលនេះជាការផ្អាកលើកដំបូងបំផុតក្នុងប្រវត្តិសាស្ត្រ ៦៤ ឆ្នាំរបស់ខ្លួន ដោយសារតែមានការរំខានយ៉ាងខ្លាំងពីការរីករាលដាលជំងឺ COVID-19។ នេះបើតាមការប្រកាសរបស់ទស្សនាវដ្តីបារាំង France Football ដែលជាអ្នករៀបចំផ្តល់ពានពិភពលោកនេះ នៅថ្ងៃទី២០ ខែកក្កដា។
Ballon d'Or ជាពានរង្វាន់ប្រចាំឆ្នាំសម្រាប់ផ្តល់ជូនដល់កីឡាករបាល់ទាត់ឆ្នើមបំផុតលើលោក ក្រោយពួកគេបង្ហាញសកម្មភាពលេចធ្លោពេញមួយរដូវកាលរួចមក ហើយពានដែលផ្តួចផ្តើមឡើងដោយទស្សនាវដ្តីបារាំង France Football រៀបចំសម្រាប់កីឡាករជារៀងរាល់ឆ្នាំចាប់តាំងពីឆ្នាំ ១៩៥៦មក។ ឯ Ballon d’Or សម្រាប់ស្ត្រីត្រូវបានផ្តល់ជូនជាលើកដំបូងនៅឆ្នាំ ២០១៨។
ជារឿងមួយគួរឲ្យសោកស្តាយបំផុតសម្រាប់រដូវកាល ២០១៩-២០ នេះ ដោយសារតែជំងឺរាតត្បាតសកលបានធ្វើឲ្យប៉ះពាល់ដល់ដំណើរការប្រកួតយ៉ាងខ្លាំងក្នុងលីគធំៗនៅតំបន់អឺរ៉ុបរហូតត្រូវផ្អាកសកម្មភាពជាង៣ខែ។ មិនត្រឹមតែកីឡាបាល់ទាត់ឡើយ សូម្បីកីឡាល្បីៗផ្សេងទៀតបានផ្អាក រួមទាំងអូឡាំពិកក្រុងតូក្យូឆ្នាំ២០២០ ផងក៏ត្រូវពន្យាពេលដល់ឆ្នាំ២០២១ដែរ។
ដោយសារតែមូលហេតុ COVID-19 នេះហើយទើប France Football ដែលទទួលសិទ្ធិរៀបចំផ្តល់ពាន Ballon d'Or ទៅឲ្យកីឡាករសម្រាប់សមិទ្ធផលឆ្នាំ២០១៩ ត្រូវផ្អាកជាលើកដំបូងក្នុងប្រវត្តិសាស្ត្រផងដែរ។
លោក Pascal Ferre និពន្ធនាយកស្សនាវដ្តីបារាំង France Football បាននិយាយនៅក្នុងសេចក្តីប្រកាសរបស់ខ្លួនថាការសម្រេចចិត្តផ្អាកមិនផ្តល់ពានទៅឲ្យកីឡាករនេះដោយសារមានការពិបាកក្នុងការវិនិច្ឆ័យទៅលើសមត្ថភាពកីឡាកររូបណាមួយដែលគួរទទួលបានពានកម្រិតពិភពលោកនេះ ដ្បិតពួកគេត្រួវសម្រាកមួយរយៈពេលយូរ ហើយបើទោះការប្រកួតបានត្រឡប់វិញក្តី តែវាហាក់មិនទាន់ពេញលេញ១០០ភាគរយឡើយ។
ពាន Ballon d’Or កាលពីឆ្នាំមុន ក្រោមការបោះឆ្នោតជ្រើសរើសពីសំណាក់អ្នកសារព័ត៌មានកីឡាទូទាំងពិភពលោក Lionel Messi ទទួលបានពាននេះជាលើកទី៦ ដោយនាំមុខគូប្រជែង Cristiano Ronaldo ដែលឈ្នះ៥លើក៕
Tag:
Ballon d\'Or
France Football
© រក្សាសិទ្ធិដោយ thmeythmey.com