ជាតិ
ក្រុមហ៊ុនចិនមួយវិនិយោគលើការបង្កើតរោងចក្រដុតសំរាមដើម្បីផលិតអគ្គិសនីនៅខេត្តសៀមរាប លោក ទៀ សីហា អភិបាលខេត្តសៀមរាប(រូបសាំ្ត)កំពុងប្រជុំបច្ចេកទេស ជាមួយ លោក Zhang Xiaozhong ប្រធានការិយាល័យតំណាងខាងភាគីក្រុមហ៊ុន MIZUDA ស្តីពីការវិនិយោគបង្កើតរោងចក្រដុតសំរាមឱ្យបាន២១ម៉ឺនតោនក្នុងមួយឆ្នាំ ដោយផលិតថាមពលអគ្គីសនីជាង៧៥ម៉ឺនគីឡូវ៉ាត់ ក្នុងខេត្តសៀមរាប នៅសាលារដ្ឋខេត្ត កាលពីថ្ងៃទី២១កក្កដា ឆ្នាំ២០២០។ រូបថត៖ រដ្ឋបាលខេត្តសៀមរាប
× ក្រុមហ៊ុន MIZUDA របស់ប្រទេសចិន គ្រោងបង្កើតរោចក្រដុតសំរាមឱ្យបាន២១ម៉ឺនតោនក្នុងមួយឆ្នាំ ដោយផលិតថាមពលអគ្គីសនីជាង៧៥ម៉ឺនគីឡូវ៉ាត់ម៉ោង នៅខេត្តសៀមរាប។ ការផលិតអគ្គិសនីពីសំរាមរបស់ក្រុមហ៊ុនចិននេះ អាចចូលរួមផ្គត់ផ្គង់ថាមពលអគ្គិសនីក្នុងក្រុងសៀមរាបបាន១០ភាគរយ។ បើតាមលោក លី សំរិទ្ធ អភិបាលរងខេត្តសៀមរាប ក្រុមហ៊ុនចិនមួយនេះ នឹងវិនិយោគបង្កើតរោងចក្រដុតសំរាម ដើម្បីផលិតថាមពលអគ្គិសនីនេះឡើងនៅឆ្នាំ២០២១។
បច្ចុប្បន្នក្រុមហ៊ុនចិនមួយនេះ កំពុងសិក្សានិងវាយតម្លៃអំពីលទ្ធភាពនូវគម្រោងវិនិយោគខាងលើ ដោយគ្រោងបញ្ចប់នៅចុងឆ្នាំ២០២០។ នេះជាការលើកឡើងរបស់លោក លី សំរិទ្ធ ប្រាប់សារព័ត៌មានថ្មីៗ(Thmey Thmey)តាមទូរសព្ទនៅថ្ងៃទី២២ ខែកក្កដា ដោយបន្តថា ការសាងសង់រោងចក្រដុតសំរាមដើម្បីផលិតនិងផ្គត់ផ្គង់ថាមពលអគ្គីសនីនេះ គឺជាការរួមចំណែកអភិវឌ្ឍខេត្តសៀមរាបឱ្យកាន់តែល្អប្រសើរ តាមរយៈការសម្អាត និងថែរក្សា ការពារបរិសា្ថន។
ក្នុងមួយៗថ្ងៃ សំរាមនៅក្រុងសៀមរាប មានប្រមាណ៤៨០តោន ហើយអាចកើនដល់៦០០តោនក្នុងឆ្នាំ២០២២ នឹងឈានរហូតដល់ជាង១០០០តោន នៅក្នុងឆ្នាំ២០៣៥។ នេះបើយោងតាមរបាយការណ៍ដែលរដ្ឋបាលខេត្តសៀមរាបបង្ហាញក្នុងកិច្ចប្រជុំបច្ចេកទេសរវាងលោក ទៀ សីហា អភិបាលខេត្តសៀមរាបជាមួយ លោក Zhang Xiaozhong ប្រធានការិយាល័យតំណាងខាងភាគីក្រុមហ៊ុន MIZUDA ប្រចាំនៅកម្ពុជានិងសហការី កាលពីថ្ងៃទី២១កក្កដា ឆ្នាំ២០២០៕
Tag:
សំរាម
អគ្គិសនី
សៀបរាម
© រក្សាសិទ្ធិដោយ thmeythmey.com