សង្គមអន្តរជាតិ
អន្តរជាតិ
អង់គ្លេស បន្ធូរលក្ខខណ្ឌសុំទិដ្ឋាការសម្រាប់ប្រជាជនហុងកុង លោកស្រីPriti Patel រដ្ឋមន្រ្តីមហាផ្ទៃអង់គ្លេស។ រូបភាព៖ Reuters
× រដ្ឋមន្ត្រីមហាផ្ទៃអង់គ្លេស លោកស្រី Priti Patel នៅថ្ងៃទី២២ ខែកក្កដា បានលើកឡើងថា អង់គ្លេស នឹងបើកពាក្យស្នើសុំទិដ្ឋាការដល់ប្រជាជនហុងកុងជិត ៣លាននាក់នៅក្នុងខែមករា ឆ្នាំ២០២១ ខាងមុខ ដើម្បីមានសិទ្ធិមកតាំងលំនៅក្នុងប្រទេសអង់គ្លេស។ ចិនប្រតិកម្មរឿងនេះ និងបានចោទថា ការអនុញ្ញាតឲ្យប្រជាជនហុងកុងមានសិទ្ធិទៅតាំងលំនៅពីសំណាក់អង់គ្លេស ជាការខុសនឹងច្បាប់អន្តរជាតិ។
បញ្ហាច្បាប់សន្តិសុខជាតិហុងកុង ត្រូវបានអង់គ្លេស ដែលជាអតីតម្ចាស់អាណានិគមហុងកុង រិះគន់យ៉ាងខ្លាំងថា បំពាននឹងសេចក្តីប្រកាសរួមរវាងចិន-អង់គ្លេស ឆ្នាំ១៩៨៤ និងបំផ្លាញគោលការណ៍ «ប្រទេសមួយ ប្រព័ន្ធពីរ»។ នាពេលកន្លងមក អង់គ្លេស បានបញ្ជាក់ថា ខ្លួននឹងចាត់វិធានការមួយ ដែលអនុញ្ញាតឲ្យប្រជាជនហុងកុង មានសិទ្ធិមករស់នៅអង់គ្លេសជាអចិន្ត្រៃយ៍ និងអាចក្លាយជាពលរដ្ឋអង់គ្លេស តាមរយៈលិខិតឆ្លងដែនសម្រាប់ពលរដ្ឋចក្រភពអង់គ្លេសនៅបរទេស (BNO)។
លោកស្រី Priti Patel រដ្ឋមន្ត្រីមហាផ្ទៃអង់គ្លេស នៅថ្ងៃទី២២ ខែកក្កដា បានបង្ហាញលក្ខខណ្ឌសម្រាប់ពលរដ្ឋហុងកុងដែលកាន់ BNO ។ ថ្លែងទៅកាន់កិច្ចប្រជុំសភា លោកស្រី Patel បានលើកឡើងយ៉ាងដូច្នេះថា៖ «យើងគ្រោងបើកពាក្យស្នើសុំទិដ្ឋាការ លើលិខិតឆ្លងដែនសម្រាប់ពលរដ្ឋចក្រភពអង់គ្លេសនៅបរទេស ចាប់ពីខែមករា ឆ្នាំ២០២១ ខាងមុខ»។
សម្រាប់ការស្នើសុំនេះ អង់គ្លេសមិនតម្រូវលក្ខខណ្ឌអ្វីទេ ពោល គឺអ្នកដែលកាន់លិខិតឆ្លងដែន BNO ហើយគ្មានជំនាញ ប្រាក់ចំណូលកម្រិតទាប ឬតម្រូវការផ្នែកសេដ្ឋកិច្ចបែបណា គឺអាចដាក់ពាក្យស្នើសុំបានទាំងអស់។ ពាក្យស្នើសុំ នឹងធ្វើឡើងតាមប្រព័ន្ធអនឡាញ។
បើតាមការបញ្ជាក់របស់លោកស្រីPatel អង់គ្លេសផ្តល់ឱកាសឲ្យប្រជាជន ដែលកាន់លិខិតឆ្លងដែន BNO ដើម្បីទទួលបានសិទ្ធិជាប្រជាជនរបស់អង់គ្លេសផងដែរ។ ទន្ទឹមនេះ អ្នកដែលកាន់លិខិតឆ្លងដែន BNO ក៏អាចនាំអ្នកដែលស្ថិតក្នុងបន្ទុកទៅជាមួយផងដែរ ដូចជាកូនជាដើម។ យ៉ាងណាក៏ដោយ អ្នកទាំងនោះ ត្រូវតែជួយ ឬចិញ្ចឹមជីវិតដោយខ្លួនឯងបាន ក្នុងរយៈពេល ៥ទៅ ៧ឆ្នាំ មុនពក្លាយជាប្រជាជនអង់គ្លេស។ នេះបើតាមការចុះផ្សាយរបស់កាសែត South China Morning Post។
ជាការឆ្លើយតបទៅនឹងសេចក្តីសម្រេចនេះ ស្ថានទូតចិនប្រចាំនៅទីក្រុងឡុងដ៍ បានរិះគន់ថា អង់គ្លេស ជ្រែតជ្រែកកិច្ចការផ្ទៃក្នុងរបស់ចិនយ៉ាងធ្ងន់ធ្ងរ បំពានច្បាប់អន្តរជាតិ និងមិនគោរពលិខិតបទដ្ឋាននៃទំនាក់ទំនងអន្តរជាតិ។
សូមបញ្ជាក់ថា តាមរយៈលិខិតឆ្លងដែនសម្រាប់ពលរដ្ឋចក្រភពអង់គ្លេសនៅបរទេស ប្រជាជនហុងកុងប្រមាណជា ២,៩លាននាក់ អាចដាក់ពាក្យស្នើសុំមករស់នៅអង់គ្លេសបាន ប៉ុន្តែប្រជាជនហុងកុង ត្រូវតែមាន សៀវភៅស្នាក់នៅក្នុងទីក្រុងហុងកុង ការធ្វើតេស្តរកជំងឺរបេង និងរបាយការណ៍ធនាគារ ដើម្បីបញ្ជាក់ពីសមត្ថភាពចិញ្ចឹមខ្លួនឯង៕
Tag:
អង់គ្លេស
ហុងកុង
ចិន
© រក្សាសិទ្ធិដោយ thmeythmey.com