អ្នកចត្តាឡីស័ក១៤ថ្ងៃ គួរអនុវត្តសកម្មភាព៩យ៉ាង ដើម្បីបង្ការជំងឺបាក់ទឹកចិត្ត

COVID-19

ជាតិ

សុខភាព

អ្នកចត្តាឡីស័ក១៤ថ្ងៃ គួរអនុវត្តសកម្មភាព៩យ៉ាង ដើម្បីបង្ការជំងឺបាក់ទឹកចិត្ត

26, Jul 2020 , 8:59 am

រូបភាព

បុរសខ្មែរម្នាក់មកពីបរទេសបានចត្តាឡីស័ក១៤ថ្ងៃ មណ្ឌលចត្តាឡីស័កវិទ្យាល័យជ័យវរ័្មនទី៧ ខេត្តកណ្តាល កាលពីថ្ងទី៥ឧសភា ឆ្នាំ២០២០។ រូបថត៖ គណនីហ្វេសប៊ុក Krou Sany

ដោយ: អ៊ូ សុខមាន (OU Sokmean)

ភ្នំពេញ៖ បុគ្គលនីមួយៗដែលតម្រូវឱ្យអនុវត្តវិធានការចត្តាឡីស័ក១៤ថ្ងៃ តាមគោលការណ៍របស់ក្រសួងសុខាភិបាល និងអង្គការសុខភាពពិភពលោក(WHO) ដើម្បីតាមដានសុខភាព និងរកជំងឺកូវីដ-១៩(COVID-19)នោះ គឺអាចមានអារម្មណ៍ស្រងូតស្រងាត់ ឬច្របូកច្របល់។ លើសនេះទៀតទៅ គឺអាចមានអារម្មណ៍អស់សង្ឃឹម និងភ័យខ្លាច។ អារម្មណ៍ទាំងនេះ នឹងបង្កឱ្យលោក-អ្នកមានជំងឺបាក់ទឹកចិត្ត ក្នុងអំឡុងពេលកំពុងធ្វើចត្តាឡីស័កនេះ។

បើតាមសេចក្តីណែនាំរបស់ក្រសួងសុខាភិបាល កាលពីថ្ងៃទី២១កក្កដា ឆ្នាំ២០២០ ដើម្បីដោះស្រាយនូវតានតឹងផ្លូវទាំងនេះ បុគ្គលនីមួយៗដែលជាប់ធ្វើចត្តាឡីស័ក គួរអនុវត្តនូវវិធានការ៩យ៉ាង ដូចខាងក្រោម៖

វិធានការទី១៖ អ្នកធ្វើចត្តាឡីស័កចំនួន១៤ថ្ងៃនីមួយៗ គឺត្រូវទទួលយក និងយល់ថាពេលវេលានេះ ជាពេលវេលាពិសេស និងខុសពីមុន ទោះបីជាលោក-អ្នក មិនចង់ឃើញ ឬមិនចង់ទទួកយកក៏ដោយ។

វិធានការទី២៖ ត្រូវរក្សាទំនាក់ទំនង និងរកវិធីផ្សារភ្ជាប់ទំនាក់ទំនងជាមួយអ្នកដទៃ តាមរយៈហ្វេសប៊ុក និងទូរសព្ទជាដើម...។

វិធានការទី៣៖ ត្រូវមានចិត្តសប្បុរសនឹងអ្នកដទៃ និងផ្តល់ជំនួយជួយអ្នកដទៃ និងរិះរកថាតើមានវិធីអ្វីដែលអាចជួយអ្នកដទៃដែលនៅជុំវិញអ្នកដែរឬទេ?

វិធានការទី៤៖ មិនត្រូវភ័យខ្លាចប៉ះពាល់ការប្រាស្រ័យទំនងអ្នកជាមួយអ្នកទៃឡើយ ហើយលោក-អ្នកត្រូវគិតថាមនុស្សទាំងអស់គ្នា កំពុងជួបនឹងបញ្ហាប្រឈមនៃជំងឺកូវីដ-១៩ នេះ។

វិធានការទី៥៖ ក្នុងអំឡុងពេលចត្តាឡីស័ក១៤ថ្ងៃនោះ លោក-អ្នកត្រូវមានការងារធ្វើជាប្រចាំថ្ងៃ។ ដូចជាអានសៀវភៅ មើលភាពយន្ត ឬតន្ត្រីកំសាន្តសប្បាយៗ ជាដើម។

វិធានការទី៦៖ លោក-អ្នក ត្រូវគិតពិចារណា និងព្យាយាមគិតថា ស្ថានការណ៍នេះជាបញ្ហាថ្មីនិងជាពេលវេលាចម្លែកដែលអាចនាំមកនូវផលចំណេញខ្លះមកវិញ បើសិនជាលោក-អ្នករៀនសូត្រពីវា។

វិធានការទី៧៖ ត្រូវកំណត់ការទទួលយកព័ត៌មាន ដោយកំណត់ពេលវេលាប្រចាំថ្ងៃ និងប្រភពព័ត៌មានឱ្យបានច្បាស់លាស់ ដោយធានាបាននូវព័ត៌មានដែលទទួលបាននោះ គឺអាចជឿទុកចិត្តបាន។

វិធានការទី៨៖ កាត់បន្ថយឱ្យបានច្រើនបំផុត នូវការអាន មើលព័ត៌មានណាដែលធ្វើឱ្យលោក-អ្នកមានភាពតានតឹង ទុយក្ខព្រួយ ស្រងូតស្រងាត់ និងស្លន់ស្លោជាដើម។

វិធានការទី៩៖ លោក-អ្នក ត្រូវសម្រួលអារម្មណ៍ និងត្រូវសមាធិក្នុងរយៈពេល៦ទៅ៧នាទី ដោយធ្វើឱ្យបាន២ទៅ៣ដង ក្នុងមួយថ្ងៃ៕