COVID-19
ជាតិ
ខេត្តសៀមរាប នឹងដាក់ដំណើរការមន្ទីរពិសោធន៍ធ្វើតេស្តកូវីដ-១៩ នៅថ្ងៃស្អែក
× ភ្នំពេញ៖ នៅថ្ងៃទី២៧ កក្កដានេះ ខេត្តសៀមរាប នឹងដាក់ដំណើរការមន្ទីរពិសោធន៍ធ្វើតេស្តកូវីដ-១៩ ដើម្បីធ្វើតេស្តជំងឺកូវីដ-១៩។ បើតាមលោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប មន្ទីរពិសោធន៍នេះ នឹងសម្រួលដល់ការធ្វើតេស្តកូវីដ-១៩នៅក្នុងខេត្តសៀមរាប ដោយមិនចាំបាច់យកសំណាកទៅធ្វើតេស្តនៅភ្នំពេញទៀតឡើយ។
មន្ទីរពិសោធន៍ធ្វើតេស្តកូវីដ-១៩ ដែលស្ថិតនៅមន្ទីរពេទ្យបង្អែកខេត្តសៀមរាប នឹងដាក់ឲ្យដំណើរការនៅថ្ងៃទី២៧ កក្កដានេះ ក្រោមការជួយជ្រោមជ្រែងពីក្រសួងសុខាភិបាល។ លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប លើកឡើងថា មន្ទីរពិសោធន៍នេះ មានសមត្ថភាពធ្វើតេស្តរកជំងឺកូវីដ-១៩ ដោយមិនចាំបាច់យកសំណាកទៅធ្វើតេស្តនៅភ្នំពេញទៀតឡើយ។
ប្រធានមន្ទីរសុខាភិបាលខេត្តរូបនេះ បញ្ជាក់ថា៖ «យើងបានរៀបចំឲ្យមន្ទីរពិសោធន៍នេះ ឲ្យមានលក្ខណៈស្ដង់ដារនៅក្នុងការការពារការចម្លងរោគ។ យើងមានម៉ាស៊ីនថ្មី និងបានបញ្ជូនមន្ត្រីទៅចូលរួមវគ្គបណ្ដុះបណ្ដាលក្នុងការធ្វើតេស្តផងដែរ»។
បើតាមប្រធានមន្ទីរសុខាភិបាលខេត្តសៀមរាប ការចាប់ផ្ដើមដំណើរការមន្ទីរពិសោធន៍ធ្វើតេស្តកូវីដ-១៩នេះ នឹងមានការចូលរួមពីអ្នកជំនាញរបស់អង្គការសុខភាពពិភពលោក ដើម្បីធ្វើតេស្តដល់អ្នកដែលសង្ស័យ និងប៉ះពាល់ជាមួយអ្នកផ្ទុកកូវីដ-១៩។ សូមបញ្ជាក់ថា បច្ចុប្បន្ន កម្ពុជាមានអ្នកឆ្លងកូវីដ-១៩ ចំនួន ២២៥នាក់ ក្នុងនោះ ១៤៣នាក់ បានព្យាបាលជាសះស្បើយ និងចំនួន ៨២នាក់ កំពុងសម្រាកព្យាបាលនៅក្នុងមន្ទីរពេទ្យ និងសម្រាកព្យាបាលនៅបន្ទប់ដាច់ដោយឡែកក្នុងស្ថានទូតអាមេរិកប្រចាំកម្ពុជា៕
លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប
Tag:
កូវីដ១៩
មន្ទីរពិសោធន៍
© រក្សាសិទ្ធិដោយ thmeythmey.com