វៀតណាម ហាមជនបរទេសចូលក្រុងដាណាង បន្ទាប់ពីមានករណីឆ្លង COVID-19 ក្នុងស្រុកថ្មី

COVID-19

សង្គមអន្តរជាតិ

អន្តរជាតិ

វៀតណាម ហាមជនបរទេសចូលក្រុងដាណាង បន្ទាប់ពីមានករណីឆ្លង COVID-19 ក្នុងស្រុកថ្មី

27, Jul 2020 , 10:33 am

រូបភាព

វៀតណាមផ្អាកសកម្មភាពខ្លះក្នុងក្រុងDanang បន្ទាប់ពីមានករណីឆ្លងCOVID-19 ក្នុងស្រុកថ្មី។ រូបភាព៖ AFP

ដោយ: ធៀន ភារិន្ទ

វៀតណាម នៅថ្ងៃទី២៦ ខែកក្កដា បានដាក់ចេញវិធានការមួយចំនួនជាថ្មីនៅក្នុងទីក្រុងDanang ដើម្បីទប់ស្កាត់ COVID-19។ ការដាក់ចេញវិធានការការពារនេះ ធ្វើឡើងបន្ទាប់ពីវៀតណាម មានករណីឆ្លងកូរ៉ូណាវីរុសក្នុងស្រុកជាថ្មី ដែលមិនដឹងពីប្រភពចម្លង។

ទីក្រុងដាណាង នៅថ្ងៃទី២៥ ខែកក្កដា បានរាយការណ៍ពីករណីឆ្លង COVID-19 ក្នុងស្រុក ១ករណីដែលជាលើកដំបូងក្នុងរយៈពេល៩៩ថ្ងៃ។ មនុស្សយ៉ាងហោចណាស់ ១០៣នាក់ មានទាក់ទងជាមួយអ្នកជំងឺថ្មីនេះ ប៉ុន្តែត្រូវបានគេធ្វើតេស្តរកឃើញមានលទ្ធផលអវិជ្ជមាន។ នៅថ្ងៃទី២៦ ខែកក្កដា ទីក្រុងទេសចរណ៍មួយនេះ បានរាយការណ៍ពីករណីឆ្លងCOVID-19 ៣ករណីទៀត ដោយមិនដឹងពីប្រភពនៃករណីឆ្លងដដែល។

ទាក់ទិននឹងករណីឆ្លងក្នុងស្រុកជាថ្មីនេះ អាជ្ញាធរក្រុង បានដាក់ចេញវិធានការមួយចំនួន ដើម្បីទប់ស្កាត់ការរាតត្បាតនៃCOVID-19 នៅក្នុងក្រុង។ បើតាមការចុះផ្សាយរបស់សារព័ត៌មាន Vietnam Express ក្រុងដាណាង បានផ្អាកទទួលភ្ញៀវទេសចររយៈពេល ១៤ថ្ងៃ ដោយចាប់ផ្តើមពីថ្ងៃទី២៦ ខែកក្កដា។ លើសពីនេះ អាជ្ញាធរ បានហាមមិនឲ្យមានការជួបជុំលើសពី ៣០នាក់ និងជំរុញឲ្យប្រជាជនចេះរក្សាគម្លាតសុវត្ថិភាព និងពាក់ម៉ាស់។

ក្រៅពីហាមប្រជាជន អាជ្ញាធរក្រុង ក៏បានបិទសកម្មភាពមិនសំខាន់មួយចំនួនផងដែរ ដូចជា ឧទ្យានកម្សាន្ត ហាងអ៊ុតសក់ ខារ៉ាអូខេ កន្លែងម៉ាស្សា និងបារជាដើម។ ចំណែកព្រឹត្តិការណ៍សាសនា កីឡា និងវប្បធម៌ ក៏ត្រូវផ្អាកផងដែរ។

លើសពីនេះ នាយករដ្ឋមន្ត្រីវៀតណាម លោក ង្វៀន ស៊ួនហ្វុក បានបញ្ជាឲ្យអាជ្ញាធរវៀតណាមគ្រប់ខេត្តក្រុងទាំងអស់ ស្វែងរក និងស៊ើបអង្កេត ជនអន្តោប្រវេសន៍ខុសច្បាប់ទាំងអស់ មកដាក់ចត្តាឡីស័ក និងពិន័យជាប្រាក់ទៅតាមច្បាប់ស្តីពីអន្តោប្រវេសន៍។ ទន្ទឹមនេះ ប្រមុខរដ្ឋាភិបាលវៀតណាម ក៏បានជំរុញឲ្យក្រសួងការពារជាតិ និងក្រសួងសន្តិសុខសាធារណៈ បន្តរឹតត្បិតការធ្វើដំណើការចូលមកវៀតណាម ជាពិសេសនៅតាមច្រកទ្វារព្រំដែនតែម្តង ដើម្បីទប់ស្កាត់ COVID-19 ។

សូមបញ្ជាក់ថា គិតមកត្រឹមពេលនេះ វៀតណាមមានករណី COVID-19 សរុបចំនួន ៤២០ករណី និងមិនមានករណីស្លាប់ឡើយ។ ចំណែកករណីជាសះស្បើយនៅវៀតណាមមានចំនួន ៣៦៥នាក់។ ប្រជាជនច្រើនជាង ១១០០០នាក់ ត្រូវបានគេដាក់ចត្តាឡីស័ក ក្នុងចំណោមនេះ ប្រជាជន២២០នាក់ ត្រូវដាក់នៅមន្ទីរពេទ្យ និងអ្នកផ្សេងទៀត ត្រូវដាក់នៅមណ្ឌាលចត្តាឡីស័ក ឬនៅផ្ទះ។ បើតាមវេបសាយWorldometer វៀតណាមបានធ្វើតេស្តសរុប២៧ម៉ឺនដង៕