ជាតិ
សង្គមជាតិ
រដ្ឋាភិបាល អនុញ្ញាតឲ្យពលរដ្ឋហាត់ប្រាណនិងលេងកីឡាតាមទីសាធារណៈ តែក្លិបហាត់ប្រាណឯកជន នៅបន្តបិទ រូបភាព សកម្មភាពពលរដ្ឋហាត់ប្រាណនៅតាមបណ្តោយផ្លូវថ្មើរជើងដងទន្លេចតុមុខនាវេលាម៉ោង៦ល្ងាច
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានអនុញ្ញាតឲ្យមានសកម្មភាពហាត់ប្រាណនិងលេងកីឡានៅតាមទីសាធាណៈ ក្នុងរាជធានី-ខេត្ត និងនៅបរិវេណពហុកីឡដ្ឋានអូឡាំពិកឡើងវិញ។ តែការហាត់ប្រាណ នៅតាមក្លិបហាត់ប្រាណផ្សេងៗ សម្តេចនាយករដ្ឋមន្ត្រីមិនទាន់អនុញ្ញាតឡើយ។ នេះបើយោងតាមសេចក្តីជូនដំណឹងរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ ដែលចេញនៅថ្ងៃទី២៨ ខែកក្កដា។
លោក ហង់ជួន ណារ៉ុន លើកឡើងថា ការឈានដល់ការអនុញ្ញាតឲ្យពលរដ្ឋ ហាត់ប្រាណនិងលេងកីឡាផ្សេងៗនៅតាមទីសាធារណៈ គឺដោយសារតែ កម្ពុជាអាចគ្រប់គ្រងលើការទប់ស្កាត់ជំងឺកូវីដ-១៩បានល្អប្រសើរ។ លោក បន្តថា ការអនុញ្ញាតនេះ ជាវិធីដ៏ល្អសម្រាប់ឲ្យពលរដ្ឋអាចហាត់ប្រាណ និងលេងកីឡា ដើម្បីសុខភាពផ្លូវកាយ និងសុខភាពផ្លូវចិត្ត។
ទន្ទឹមនឹងនេះ រដ្ឋមន្ត្រីអប់រំ ស្នើឲ្យម្ចាស់ក្លិបហាត់ប្រាណឯកជន បន្តចូលរួមអនុវត្តវិធានការសុវត្ថិភាពតាមការណែនាំរបស់ក្រសួងសុខាភិបាលនិងបន្តសហការជាមួយរាជរដ្ឋាភិបាលកម្ពុជាក្នុងការគ្រប់គ្រង ទប់ស្កាត់ និងបង្ការការរីករាលដាលជំងឺកូវីដ-១៩។
ជាមួយគ្នានេះ លោករដ្ឋមន្ត្រី ស្នើឲ្យពលរដ្ឋរក្សាអនាម័យជានិងការពារខ្លួនជាប្រចាំ តាមរយៈការពាក់ម៉ាស់ លាងដៃ វាស់កម្តៅ និង ត្រូវរក្សាគម្លាតសុវត្ថិភាពបុគ្គល ដោយត្រូវនៅឆ្ងាយពីគ្នាយ៉ាងតិច១,៥ម៉ែត្រ។ លោក បន្ថែមថា ទីកន្លែងហាត់ប្រាណ (សាធារណៈ) ត្រូវតែបាញ់សម្លាប់មេរោគជាប្រចាំ ដើម្បីធានាសុវត្ថិភាពដល់ពលរដ្ឋ។
សូមបញ្ជាក់ថា ក្លិបហាត់ប្រាណទូទាំងប្រទេសត្រូវបានបិទដំណើរការអស់រយៈពេល៣ខែមកហើយ។ រដ្ឋាភិបាល បានសម្រេចឱ្យបើកកាស៊ីណូ ដែលមានតែល្បែងភ្នាល់ និងស្លតម៉ាស៊ីនប៉ុណ្ណោះ។ រីឯ KTV រដ្ឋាភិបាល លើកទឹកចិត្តឲ្យកែប្រែទៅជាភោជនីយដ្ឋាន។
ចំណែកសាលារៀនវិញរដ្ឋាភិបាល ក៏អនុញ្ញាតឱ្យដំណើរការឡើងវិញចំពោះសាលាឯកជនចំនួន២០ នៅខែសីហា ឆ្នាំ២០២០ ដែលជាដំណាក់កាលទី១៕
© រក្សាសិទ្ធិដោយ thmeythmey.com