ជាតិ
ក្រសួងកសិកម្ម គាំទ្រការស្រាវជ្រាវធ្វើទំនើបកម្មវិស័យកសិកម្ម ពិសេសផ្នែកកែច្នៃកសិផល
រូបភាព៖ ក្រសួងកសិកម្ម
×![]()
ភ្នំពេញ៖ ក្រសួងកសិកម្ម ជំរុញឲ្យមានការស្រាវជ្រាវ ធ្វើទំនើបកម្មវិស័យកសិកម្មនៅកម្ពុជា ផ្នែកកម្មន្តសាលកសិកម្ម បច្ចេកវិទ្យាកែច្នៃធាតុចូលកសិកម្ម និងបច្ចេកវិទ្យាក្រោយពេលប្រមូលផល។ នេះបើតាមក្រសួងកសិកម្ម ក្នុងកិច្ចប្រជុំជាមួយក្រុមអ្នកស្រាវជ្រាវផ្នែកបច្ចេកវិទ្យាកាលពីថ្ងៃទី២២ ខែកក្កដា ឆ្នាំ២០២០។ 
លោក វេង សាខុន រដ្ឋមន្ត្រីក្រសួងកសិកម្ម បានអះអាងថា វិស័យកសិកម្មនៅកម្ពុជា ក៏នៅជួបបញ្ហាប្រឈមជាច្រើន ដូចជាលទ្ធភាពស្រោចស្រព វត្ថុធាតុដើមដែលជាធាតុចូលកសិកម្ម ដូចជាការកែច្នៃជី ថ្នាំកសិកម្ម ចំណីសត្វ ការប្រើប្រាស់គ្រឿងយន្ត និងបច្ចេកវិទ្យាក្រោយពេលប្រមូលក៏នៅមានកម្រិតផងដែរ។
លោក វេង សាខុន បន្តថា កម្ពុជាមានតម្រូវការវិនិយោគផ្នែកកម្មន្តសាលកសិកម្ម ដូចជារោចក្រកែច្នៃជី ថ្នាំកសិកម្ម ចំណីសត្វ និងរោងចក្រតម្លើងគ្រឿងយន្តកសិកម្ម ដើម្បីកាត់បន្ថយចំណាយថ្លៃដើមឱ្យនៅកម្រិតអប្បបរមា ព្រមទាំងរោងចក្រកែច្នៃផលិតផលកសិកម្ម ក្រោយពេលប្រមូលផលដើម្បីបង្កើនតម្លៃបន្ថែម។
នៅក្នុងកិច្ចប្រជុំដដែល លោកបណ្ឌិត ហេង ប៊ុន អ៊ី ជាអ្នកស្រាវជ្រាវផ្នែកបច្ចេកវិទ្យា បានបញ្ជាក់ថា លោកមានគម្រោង ចង់សហការជាមួយក្រសួងក្នុងការស្រាវជ្រាវពីប្រភេទឡសម្ងួតខ្នាតតូច ដើម្បីជួយដល់កសិករខ្នាតតូច ឬសហគមន៍កសិកម្ម សម្រាប់ការសម្ងួតស្រូវ ឬផលិតផលកសិកម្មដទៃទៀត។ លោកធ្លាប់បានធ្វើការស្រាវជ្រាវពីប្រភេទឡសម្ងួត និងឡដុតសំរាម ដោយបានសហការជាមួយ វិទ្យាស្ថានបច្ចេកវិទ្យាកម្ពុជា។
លោកបណ្ឌិត ប៊ុនអ៊ី បានបន្តថា លោកបានធ្វើពិសោធន៍ស្រាវជ្រាវ នូវប្រភេទទឹកដែលមានសារជាតិអ៉ីយ៉ុងម្យ៉ាង ដែលមានសារជាតិចិញ្ចឹមគ្រប់គ្រាន់។ ទឹកនេះ អាចជួយបម្រើដល់ផ្នែកផលិតកម្មដំណាំកសិកម្ម ការចិញ្ចឹមសត្វ និងវារីវប្បកម្ម។
សូមបញ្ជាក់ថា គោលនយោបាយអភិវឌ្ឍន៍កសិឧស្សាហកម្មកម្ពុជា ឆ្នាំ២០១៥-២០២៥ រដ្ឋាភិបាលកម្ពុជា នឹងជំរុញការនាំចេញផលិតផលកែច្នៃកសិកម្ម ឲ្យបាន១២ភាគរយ នៃបរិមាណនាំចេញសរុបត្រឹមឆ្នាំ២០២៥៕
© រក្សាសិទ្ធិដោយ thmeythmey.com
