COVID-19
អន្តរជាតិ
លោកស្រី ការី ឡាំ ថា ហុងកុង កំពុងស្ថិតលើមាត់ជ្រោះនៃការផ្ទុះ COVID-19 ទ្រង់ទ្រាយធំ ស្រ្តីហុងកុងម្នាក់ ពាក់ម៉ាស់ និងថតរូប។ រូបភាព៖ Reuters
× ទីក្រុងហុងកុង កំពុងស្ថិតលើមាត់ជ្រោះនៃការផ្ទុះកូរ៉ូណាវីរុសជាសហគមន៍ទ្រង់ទ្រាយធំ ដែលអាចនាំឲ្យផលប៉ះពាល់ធ្ងន់ធ្ងរដល់មន្ទីរពេទ្យ និងប្រជាជន។ មេដឹកនាំហុងកុង លោកស្រីការី ឡាំ បានលើកឡើងបែបនេះ នៅថ្ងៃទី២៨ ខែកក្កដា ដោយបន្ថែមថា ប្រជាជនគួរតែស្នាក់នៅផ្ទះបណ្តោះអាសន្នសិន ដើម្បីទប់ស្កាត់ការរាតត្បាតនៃ COVID-19។
ហុងកុង នៅថ្ងៃទី២៨ ខែកក្កដា បានរាយការណ៍ថា មានករណីឆ្លងCOVID-19 ថ្មីចំនួន ១០៦ករណី ក្នុងនោះករណីឆ្លងក្នុងស្រុកមានចំនួន ៩៨ករណី។ ចំនួននេះ គឺធ្លាក់ចុះបន្តិច បើធៀបនឹងតួលេខនៅពេលកន្លងមក ដែលមានករណីលើសពី ១១០ករណី។
ដើម្បីទប់ស្កាត់ការរាតត្បាតCOVID-19 រដ្ឋាភិបាលតំបន់ស្វយ័តមួយនេះ បានចេញវិធានការមួយចំនួនដូចជា ហាមការជួបជុំមនុស្សលើសពីពីរនាក់ ហាមបរិភោគអាហារនៅក្នុងភោជនីយដ្ឋាន តម្រូវឲ្យប្រជាជនពាក់ម៉ាស់នៅទីសាធារណៈ រក្សាគម្លាតសុវត្ថិភាព និងវិធានការផ្សេងទៀត។ ចំណាក់ការទាំងនេះ មានសុពលភាព ចាប់ពីថ្ងៃទី២៩ ខែកក្កដា តទៅ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ទាក់ទិននឹងករណីឆ្លង COVID-19 នៅក្នុងក្រុងនេះ លោកស្រី ការី ឡាំ ប្រធានប្រតិបត្តិទីក្រុងហុងកុង បានលើកឡើងនៅក្នុងសេចក្តីថ្លែងការណ៍មួយយ៉ាងដូច្នេះថា៖ «យើង គឺស្ថិតនៅលើមាត់ជ្រោះនៃការផ្ទុះCOVID-19 ជាសហគមន៍ទ្រង់ទ្រាយធំ ដែលអាចបង្កឲ្យប្រព័ន្ធមន្ទីរពេទ្យដួលរលំ និងប៉ះពាល់ដល់អាយុជីវិតប្រជាជនជាច្រើននាក់ ជាពិសេសគឺមនុស្សចាស់»។ ប្រមុខតំបន់រដ្ឋបាលពិសេសរូបនេះ ក៏បានជំរុញឲ្យប្រជាជន អនុវត្តវិធានការរក្សាគម្លាតសុវត្ថិភាព វិធានការរដ្ឋាភិបាលឲ្យបានម៉ត់ចត់ និងស្នាក់នៅផ្ទះបណ្តោះអាសន្នសិន ដើម្បីការពារការឆ្លងកូរ៉ូណាវីរុស។
គិតមកត្រឹមថ្ងៃទី២៨ ខែកក្កដា ហុងកុងមានករណីឆ្លង COVID-19 សរុបចំនួន ២៨៨៥ករណី អ្នកស្លាប់ចំនួន ២៣នាក់ និងអ្នកជាសះស្បើយមានចំនួន ១៥២៧នាក់។ ក្នុងរយៈពេលចុងក្រោយនេះ ករណីឆ្លងCOVID-19 នៅក្នុងហុងកុង បានហក់ឡើងលើសពី១០០ករណី ខណៈការបោះឆ្នោតសភា ជិតមកដល់នៅថ្ងៃទី៦ ខែកញ្ញា ខាងមុខ៕
© រក្សាសិទ្ធិដោយ thmeythmey.com