ក្រុមត្បូងឃ្មុំត្រូវប្រជែងជាមួយក្រុមព្រៃវែង ដើម្បីដណ្តើមពានរង្វាន់សម្តេច ហ៊ុន សែន ថ្នាក់ខេត្តប្រចាំឆ្នាំ២០២០ នៅល្ងាចថ្ងៃទី២៩ កក្កដា ឆ្នាំ២០២០ នាពហុកីឡដ្ឋានជាតិ។ ក្នុងសន្និសីទសារព័ត៌មានមុនការប្រកួតគ្រូបង្វឹកក្រុមទាំងពីរសុទ្ធតែអះអាងពីការត្រៀមខ្លួនបានល្អរៀងៗខ្លួន។ នៅថ្ងៃនេះ ក៏មានការប្រកួតដណ្តើមចំណាត់ថ្នាក់លេខ៣រវាងក្រុមសៀមរាបជាមួយកែបផងដែរ។
តើត្បូងឃ្មុំ ឬព្រៃវែងជាម្ចាស់ជើងឯកពានសម្តេច ហ៊ុន សែន ថ្នាក់ខេត្តប្រចាំឆ្នាំ២០២០? នេះជាការរង់ចាំរបស់ទស្សនិកជន ក៏ដូចជាអ្នកគាំទ្រក្លិបទាំងពីរ ដែលចម្ងល់នេះនឹងត្រូវបានបកស្រាយនៅល្ងាចនេះ។ ក្រុមការពារតំណែងជើងឯកត្បូងឃ្មុំ ត្រូវប្រជែងជាមួយក្រុមព្រៃវែង ដែលសម្បូរដោយធនធានយុវជនរបស់វិសាខា ក្នុងវគ្គផ្តាច់ព្រ័ត្រពានរង្វាន់សម្តេច ហ៊ុន សែន ថ្នាក់ខេត្តប្រចាំឆ្នាំ២០២០ វេលាម៉ោង៦ល្ងាចថ្ងៃទី២៩ កក្កដា ឆ្នាំ២០២០ នៅពហុកីឡដ្ឋានជាតិ។
ការប្រកួតនេះនឹងមានភាពតានតឹង និងស្វិតស្វាញបំផុត ដ្បិតក្រុមទាំងពីរសុទ្ធសឹងមានសមត្ថភាពខ្ពស់ និងសម្បូរកីឡាករមានទេពកោសល្យល្អៗរៀងៗខ្លួន។ សម្រាប់ការជួបគ្នាពីរលើកកន្លងមកក្នុងជំនួបវគ្គជម្រុះ ក្រុមទាំងពីរបានបញ្ចប់ដោយលទ្ធផលស្មើគ្នាទាំងពីរប្រកួត។ ការប្រកួតជើងទី១នៅលើទឹកដីខេត្តត្បូងឃ្មុំក្រុមទាំងពីរបានបញ្ចប់ដោយគ្មានការស៊ុតបញ្ចូលទីគ្នា មុនពួកគេស្មើ ២-២ នៅជើងទី២លើទឹកដីព្រៃវែង។
មុនឡើងមកជួបគ្នានៅវគ្គផ្តាច់ព្រ័ត្រនេះក្រុមទាំងពីរបានទម្លាក់គូប្រកួតរៀងៗខ្លួននៅវគ្គពាក់កណ្តាលផ្តាច់ព្រ័ត្រក្នុងនោះត្បូងឃ្មុំទម្លាក់កែបជាមួយលទ្ធផលទាំងពីរជើង ៥-២ ខណៈព្រៃវែងទម្លាក់សៀមរាប ៩-០។
នាសន្និសីទសារព័ត៌មានមុនការប្រកួតទាំងគ្រូបង្វឹកក្រុមត្បូងឃ្មុំ និងព្រៃវែង សុទ្ធតែអះអាងថា ពួកគេបានត្រៀមខ្លួនបានយ៉ាងល្អសម្រាប់ជំនួបដ៏សំខាន់មួយនេះ។ លោក ផន រស្មីពេជ្រ គ្រូបង្វឹកក្រុមត្បូងឃ្មុំអះអាងថា ក្នុងនាមក្រុមការពារតំណែងជើងឯកក្រុមលោកគ្មានអ្វីជាសម្ពាធនោះទេ ទោះបីព្រៃវែងសម្បូរយុវជនថ្នាលរបស់ក្លិបវិសាខា ដែលមានការយល់ចិត្តគ្នាបានល្អជាងក្រុមខ្លួនក៏ដោយ។
«កីឡាកររបស់ខ្ញុំបានត្រៀមខ្លួនរួចរាល់ហើយសម្រាប់ការប្រកួតថ្ងៃនេះ ព្រោះឆន្ទៈរបស់គាត់ចង់ឈ្នះ។ សម្រាប់ការប្រកួតថ្ងៃនេះ ក្រុមខ្ញុំគ្មានសម្ពាធនោះទេ ព្រោះមុននឹងមកយើងទទួលបានការលើកទឹកចិត្តពីឯកឧត្តមអភិបាលខេត្ត ដូច្នេះខ្ញុំនឹងប្រឹងលេងឲ្យឈ្នះ បើនិយាយពីសម្ពាធគ្មាននោះទេ»។ នេះជាការបង្ហាញការតាំងចិត្តរបស់លោក ផន រស្មីពេជ្រ ជឿជាក់ថា ការប្រកួតនេះនឹងក្លាយជាការប្រកួតដ៏តានតឹងសម្រាប់ក្រុមខ្លួន ទោះព្រៃវែងជាក្រុមយុវជនរបស់វិសាខាក៏ដោយ តែពួកគេមានការរៀបចំបានល្អ។
ជាមួយការអះអាងពីការរៀបចំខ្លួនបានល្អ លោក Matthew Sinclair គ្រូបង្វឹកក្រុមព្រៃវែងចាត់ទុកការប្រកួតវគ្គផ្តាច់ព្រ័ត្រពានរង្វាន់សម្តេច ហ៊ុន សែន ថ្នាក់ខេត្តជាបទពិសោធថ្មីមួយ និងជាឱកាសរបស់ក្រុមព្រៃវែង ដែលភាគច្រើនជាយុវជនរបស់វិសាខាក្នុងការបង្ហាញសមត្ថភាព ក្នុងពានរង្វាន់ដ៏ធំមួយនេះ។
លោកបានបន្ថែមថា៖«យើងបានលេងជាមួយត្បូងឃ្មុំចំនួនពីរជើងជាលទ្ធផលស្មើទាំងពីរជើង។ មុនជួបគ្នានៅថ្ងៃនេះ យើងបានត្រឡប់មទៅមើលការប្រកួតរបស់ពួកយើងជាមួយគាត់ទាំងក្នុងដី និងក្រៅដី មើលពីចំណុចខ្លាំង ចំណុចខ្សោយរបស់គាត់ និងចំណុចខ្វះខាតរបស់ព្រៃវែង។ ការផ្លាស់ប្តូរទីលានពីស្មៅធម្មជាតិមកលេងលើស្មៅសិប្បនិម្មិត វាថ្មីសម្រាប់ក្រុមទាំងពីរ ដូច្នេះវាជាផលលំបាកមួយសម្រាប់ពួកគេ ក៏ដូចជាក្រុមរបស់យើង។ តែយើងបានតាំងចិត្ត និងរៀបចំក្រុមលេងឲ្យបានល្អនៅថ្ងៃនេះ»។
មុនការប្រកួតដ៏ជក់ចិត្តខាងលើមកដល់ នៅពហុកីឡដ្ឋានជាតិ ក៏មានការប្រកួតដណ្តើមចំណាត់ថ្នាក់លេខ៣មួយគូទៀតផងដែរ គឺរវាងក្រុមសៀមរាបជាមួយកែប ដែលធ្វើឡើងវេលាម៉ោង៣:៣០នាទីរសៀល៕