កីឡាអន្តរជាតិ
អន្តរជាតិ
CAS ថា UEFA គ្មានភ័ស្តុតាងគ្រប់គ្រាន់ដើម្បីចោទ Man City បំពានច្បាប់ហិរញ្ញវត្ថុឡើយ
× តុលាការអាជ្ញាកណ្តាលកីឡា (CAS) នៅថ្ងៃទី២៨ កក្កដា អះអាងថា សហព័ន្ធកីឡាបាល់ទាត់អឺរ៉ុប (UEFA) គ្មានភ័ស្តុតាងគ្រប់គ្រាន់ដើម្បីចោទ Manchester City រំលោភច្បាប់ហិរញ្ញវត្ថុ «Financial Fair Play» ឡើយ។ ប៉ុន្តែ CAS រកឃើញថាក្លិ បរហស្សនាមមេឃខៀវនេះបានបង្ហាញកាយវិការមិនយកចិត្តទុកដាក់ចំពោះការស៊ើបអង្កេតរបស់ UEFA។
Man City បានរួចផុតពីការហាមឃាត់លេងក្របខណ្ឌ UEFA Champions League រយៈពេល២ឆ្នាំ ក្រោយឈ្នះក្តីនៅឯតុលាការអាជ្ញាកណ្តាលកីឡា ក្នុងប្រទេសស្វ៊ីស កាលពីថ្ងៃទី១៣ ខែកក្កដាកន្លងមក។ ការសម្រេចដកបម្រាមនេះវិញ បន្ទាប់ពីក្លិបរហស្សនាមមេឃខៀវបានយករឿងក្តីដែលត្រូវបានចោទប្រកាន់ពី UEFA នេះទៅកាន់ CAS ដើម្បីប្តឹងឧទ្ធរណ៍ជំទាស់។
នៅឯតុលាការ CAS អះអាងថា ក្លិបយក្សអង់គ្លេសមួយនេះ បានបង្ហាញទិន្នន័យច្បាស់លាស់អស់ហើយ បន្ទាប់ពីមានការចោទប្រកាន់ពី UEFA។ ក្រៅពីហាមមិនឲ្យលេងក្របខណ្ឌអឺរ៉ុបពីររដូវកាល UEFA ថែមទាំងបានដាក់ពិន័យ Man City ជាប្រាក់ ៣១,៦០ លានដុល្លារផង ក្រោយរកឃើញថាក្លិបនេះ បានរំលោភយ៉ាងធ្ងន់ធ្ងរលើច្បាប់ FFP ដោយពួកគេបានចំណាយប្រាក់ច្រើនលើសចំណូលក្នុងទិញដូរកីឡាករចូលចន្លោះឆ្នាំ ២០១២ និង ២០១៦។
ក្រោយការពិនិត្យ CAS បានសម្រេចឲ្យ Man City ឈ្នះក្តីនេះ ដោយអាចរួចផុតពីបម្រាម និងបន្ថយការពិន័យជាប្រាក់ត្រឹម ១១,៣១លានដុល្លារវិញប៉ុណ្ណោះ។ CAS បញ្ជាក់ច្បាស់ថា កិច្ចព្រមព្រៀងឧបត្ថម្ភគឺផ្អែកលើតម្លៃទីផ្សារពិតរបស់ Man City និងជាកិច្ចព្រមព្រៀងពាណិជ្ជកម្មពិតប្រាកដមួយ មិនមែនជាមធ្យោបាយសម្រាប់ម្ចាស់ក្លិបក្នុងការបញ្ចូលសាច់ប្រាក់ទៅក្នុងក្លិបរបស់ពួកគេដើម្បីគេចផុតពីច្បាប់ FFP នោះឡើយ។
យ៉ាងណាក៏ដោយ តាមរយៈការពិនិត្យយ៉ាងហ្មត់ចត់ CAS រកឃើញមួយករណីថា Man City មិនបានសហការជាមួយការស៊ើបអង្កេតរបស់ស្ថាប័ន UEFA ឡើយ ដែលនេះជាទង្វើផ្ទុយនឹងច្បាប់កីឡាបាល់ទាត់អឺរ៉ុប។ ករណីនេះ គឺ Man City មិនបានចូលរួមក្នុងដំណើរការស៊ើបអង្កេតរបស់ UEFA ទាក់ទងការបង្កើតមូលនិធិបន្លំដើម្បីអាចទិញកីឡាករបាន៕
Tag:
Manchester City
UEFA
CAS
FFP
© រក្សាសិទ្ធិដោយ thmeythmey.com