បានយន្តហោះចម្បាំងថ្មីពីបារាំងភ្លាម ឥណ្ឌាផ្ញើសារព្រមានចិនភ្លែត

សង្គមអន្តរជាតិ

អន្តរជាតិ

បានយន្តហោះចម្បាំងថ្មីពីបារាំងភ្លាម ឥណ្ឌាផ្ញើសារព្រមានចិនភ្លែត

30, Jul 2020 , 7:29 pm

រូបភាព

យន្តហោះចម្បាំង-Rafale-ក្នុងដែនអាកាសឥណ្ឌា។-រូបភាព-Financial-Express

ដោយ: តន ចាន់រិទ្ធារ៉ា

ឥណ្ឌា នៅថ្ងៃទី២៩ ខែកក្កដា ទើបបានទទួលយន្តហោះចម្បាំងថ្មី៥គ្រឿងប្រភេទ Rafale ដែលទិញពីបារាំង។ បានយន្តហោះចម្បាំងថ្មីស៊េរីទំនើបភ្លាម រដ្ឋមន្ត្រីការពារជាតិឥណ្ឌា Rajnath Singh ក៏បោះសម្ដីភ្លាមៗថា យន្តហោះចម្បាំងនេះ នឹងជួយការពារការគំរាមនានា ហើយប្រទេសដែលប៉ងឈ្លានពានឥណ្ឌា នឹងព្រួយបារម្ភមិនខាន។

យន្តហោះចម្បាំង Rafale ចំនួន៥គ្រឿង បានទៅដល់មូលដ្ឋានអាកាស Ambala ក្នុងរដ្ឋ Haryana នៅថ្ងៃទី២៩ ខែកក្កដា ក្រោយធ្វើដំណើរពីបារាំង។ យន្តហោះទាំង៥គ្រឿងនេះ ជាផ្នែកមួយគម្រោងទិញយន្តហោះ៣៦គ្រឿង ដែលឥណ្ឌាទិញពីបារាំងក្នុងតម្លៃប្រមាណ៩,៥ពាន់លានដុល្លារ។ បារាំង ត្រូវដឹកយន្តហោះឲ្យឥណ្ឌាឲ្យគ្រប់ចំនួននៅត្រឹមចុងឆ្នាំ២០២១ ។ ប្រជាជនរស់នៅក្បែរមូលដ្ឋាននេះ មិនត្រូវបានអនុញ្ញាតឲ្យថតរូប ឬវីដេអូយន្តហោះឡើយ។

យន្តហោះចម្បាំងនេះ មកដល់ទឹកដីឥណ្ឌាចំពេលភាពតានតឹងរវាងឥណ្ឌា និងចិននៅព្រំដែន។ ការប៉ះទង្គិចចុងក្រោយបណ្ដាលឲ្យយោធាប្រមាណ២០នាក់ស្លាប់ ខណៈខាងចិនមិនបញ្ចេញរបាយការណ៍អ្វីឡើយ។ នាយករដ្ឋមន្ត្រីឥណ្ឌា នារិន្ទ្រា ម៉ូឌី បានស្វាគមន៍ការមកដល់យន្តហោះ Rafale ទាំង៥គ្រឿងនេះ ដោយបានបង្ហោះសារនៅ Twitter របស់លោកថា គ្មានការលះបង់ណា ឬសកម្មភាពល្អណាដូចការការពារជាតិឡើយ។

I would like to add, if it is anyone who should be worried about or critical about this new capability of the Indian Air Force, it should be those who want to threaten our territorial integrity.
— Rajnath Singh (@rajnathsingh) July 29, 2020

រដ្ឋមន្ត្រីការពារឥណ្ឌាលោក Rajnath Singh វិញ ក៏ចេញមកស្វាគមន៍វត្តមានយន្តហោះចម្បាំងថ្មីនេះ ដោយលោកអះអាងថា ជាការចាប់ផ្ដើមសករាជថ្មីនៃយោធាឥណ្ឌា។ លោក Singh បានសរសេរលើ Twitter របស់លោកទៀតថា កងទ័ពអាកាសឥណ្ឌា អាចមានសមត្ថភាពរបស់ខ្លួនដើម្បីកំញើញការគំរាមទាំងឡាយទៀតផង។ ប្រមុខការពារជាតិឥណ្ឌារូបនេះ ក៏ឆ្លៀតផ្ញើសារព្រមានទៅកាន់ចិនដែលទើបប៉ះគ្នាថ្មីៗ។

«ប្រសិនបើមានអ្នកណាបារម្ភពីសមត្ថភាពថ្មីរបស់កងទ័ពអាកាសឥណ្ឌា វាគួរតែជាអ្នកដែលចង់គំរាមបូរណភាពទឹកដីរបស់ខ្លួន។» លោក Singh សរសេរបែបនេះលើ Twitter របស់លោក។ ទោះមិននិយាយចំឈ្មោះចិន សំណេរបែបនេះ ក៏មិនមានន័យសំដៅប្រទេសណាក្រៅពីអ្នកជិតខាងមួយនេះ ឬក៏ប៉ាគីស្ថានផងក៏ថាបាន។

ទាក់ទងការទិញយន្តហោះនេះដែរ ឥណ្ឌាធ្លាប់ទទួលស្គាល់ថា កម្លាំងយោធារបស់ខ្លួននៅស្ទើរណាស់ បើធៀបនឹងចិន។ ការទិញយន្តហោះដល់ទៅជិត៤០គ្រឿងនេះ ជាផ្នែកមួយនៃការពង្រឹងកម្លាំងយោធាអាកាសផង និងកម្លាំងទ័ពទាំងជាង១,៤លាននាក់ផង។ ខណៈទំនាក់ទំនងជាមួយចិន និងប៉ាគីស្ថានមិនសូវល្អ ឥណ្ឌារឹតតែត្រូវពង្រឹងសមត្ថភាពយោធារបស់ខ្លួនថែមទៀត៕