សាក្សីសំខាន់ម្នាក់ ដែលការបំភ្លឺខ្លួនបានបញ្ចុះបញ្ចូលឲ្យរាជអាជ្ញាថៃទម្លាក់បទចោទប្រឆាំងចៅប្រុសថៅកែ Red Bull បានបាត់បង់ជីវិតហើយក្នុងករណីគ្រោះថ្នាក់ចរាចរណ៍នៅថ្ងៃទី៣០ ខែកក្កដា។ ប៉ូលិសថៃ អះអាងថា ពួកគេកំពុងស៊ើបអង្កេតមូលហេតុនៃគ្រោះថ្នាក់នេះ។ សាក្សីដែលស្លាប់រូបនេះ ក៏ត្រូវបានកោះហៅឲ្យទៅឆ្លើយបំភ្លឺនៅមុខគណៈគម្មាធិការសភាថៃមួយ នាខែក្រោយផងដែរ។
សាក្សី ឈ្មោះថា Charuchart Martthong បានស្លាប់ក្នុងគ្រោះថ្នាក់ចរាចរណ៍ នៅម៉ោង១រំលងអាធ្រាត្រ ក្នុងខេត្តឈៀងម៉ៃ ភាគខាងជើងប្រទេសថៃ ។ តាមការចុះផ្សាយរបស់ទីភ្នាក់ងារព័ត៌មាន AFP អ្នកនាំពាក្យប៉ូលិសថៃ លោក Krisana Pattanacharoen បាននិយាយក្នុងសេចក្តីថ្លែងការណ៍ដូច្នេះថា៖«ប៉ូលិសកំពុងប្រមែប្រមូលភស្តុតាងនិងសាក្សី ដើម្បីស៊ើបអង្កេតពីមូលហេតុនៃគ្រោះថ្នាក់នេះ»។
កាលពីដើមសប្តាហ៍នេះ លោក Charuchart ត្រូវបានជាប់ឈ្មោះជាសាក្សីដ៏សំខាន់ម្នាក់ ដែលបានផ្ដល់ចម្លើយបំភ្លឺថា លោក Vorayuth Yoovidhya ចៅប្រុសថៅកែភេសជ្ជៈគោជល់ (Red Bull) ពុំបានបើកលើសល្បឿនកំណត់ឡើយ (៨០គីឡូម៉ែត្រក្នុងមួយម៉ោង) នៅពេលលោកបុកប៉ូលិសម្នាក់ក្នុងទីក្រុងបាងកក កាលពីឆ្នាំ២០១២។
លោក Charuchart និងសាក្សីម្នាក់ទៀត ដែលជាមន្ត្រីថៃចូលនិវត្តន៍ បានឆ្លើយអះអាងថា រថយន្ត Ferrari របស់លោក Vorayuth បើកក្នុងល្បឿនចន្លោះពី៥០-៦០គីឡូម៉ែត្រប៉ុណ្ណោះនៅពេលលោកបង្កគ្រោះថ្នាក់។
កន្លងទៅ បើតាមការសន្និដ្ឋានរបស់ប៉ូលិសចរាចរណ៍ថៃ លោក Vorayuth បានបើកបរក្នុងល្បឿន ១៧៧គីឡូម៉ែត្រក្នុងមួយម៉ោង នៅពេលរថយន្តស៊េរីទំនើប Ferrari លោកបានបុក និងសម្លាប់ប៉ូលិសថៃ លោក Wichian Klanprasert ដែលកំពុងជិះលើផ្លូវមួយក្នុងទីក្រុង បាងកក កាលពីថ្ងៃទី៣ ខែកញ្ញា ឆ្នាំ២០១២។
បន្ថែមពីលើនេះ សាក្សីទាំងពីរនាក់ ក៏បានឆ្លើយបំភ្លឺទៀតថា ប៉ូលិសដែលស្លាប់ក្នុងហេតុការណ៍គ្រោះថ្នាក់ចរាចរណ៍ បានជិះប្ដូរគន្លងផ្លូវភ្លាមមួយរំពេច កាត់ចំកណ្ដាលមុខរថយន្តលោក Vorayuth ដែលកំពុងបើកបរលើគន្លងត្រឹមត្រូវ ជាហេតុធ្វើឲ្យរថយន្តលោកបុកម៉ូតូប៉ូលិសបែបនេះ។ រថយន្តស៊េរីទំនើបនោះ បានអូសសពជាច្រើនម៉ែត្រ មុនពេលបើករត់គេចពីកន្លែងកើតហេតុ។
ភស្តុតាងថ្មីទាំងនេះហើយ ជាហេតុផលពីក្រោយការសម្រេចទម្លាក់បទចោលប្រឆាំង Vorayuth ដែលបង្កជាការរិះគន់យ៉ាងចាស់ដៃពីសំណាក់ប្រជាជនថៃទូទៅ ដែលចាត់ទុករឿងនេះជាឧទាហរណ៍មួយនៃវប្បធម៌អភ័យឯកសិទ្ធិរបស់ពួកអ្នកមាន។
សាក្សីទាំងពីរនាក់នេះ ត្រូវបានកោះហៅឲ្យចូលឆ្លើយបំភ្លឺនៅមុខគណៈកម្មាធិការសភាដែលទទួលបន្ទុកកិច្ចការច្បាប់ និងយុត្តិធម៌របស់ថៃ នាខែសីហា។ ម្យ៉ាងវិញទៀត អ្នកទាំងពីរនេះ ក៏ជាប់ជាគោលដៅស៊ើបសួរបន្តរបស់គណៈកម្មាធិការស្វែងការពិតដែលបង្កើតឡើងដោយនាយករដ្ឋមន្ត្រី ប្រាយុទ្ធ ចន្ទអូចា កាលពីថ្ងៃទី ២៩ ខែកក្កដា កន្លងទៅ ផងដែរ។
យ៉ាងណា ក្រោយការស្លាប់របស់លោក Charuchart ក្នុងគ្រោះថ្នាក់ចរាចរណ៍បែបនេះ ប្រធានគណៈកម្មាធិការសភាថៃ លោក Sira Janejaka បានទទូចឲ្យស្នងការប៉ូលិសជាតិជួយផ្ដល់ការការពារចំពោះមន្ត្រីថៃចូលនិវត្តន៍ម្នាក់ទៀត ព្រោះលោកគឺជាសាក្សីសំខាន់តែមួយដែលនៅសេសសល់ក្នុងរឿងក្តីចៅប្រុសថៅកែ Red Bull មួយនេះ។ នេះបើតាមការចុះផ្សាយសារព័ត៌មានក្នុងស្រុកថៃ Chiang Rai Times ។
រកឃើញសារធាតុញៀនក្នុងឈាមលោក Vorayuth
មន្ត្រីប៉ូលិសថៃ បានអះអាងថា ពួកគេរកឃើញសារធាតុគីមីខុសច្បាប់ ក្នុងនោះជាសារធាតុញៀនកូកាអ៊ីន ក្នុងឈាមរបស់លោក Vorayuth នៅពេលលោកបង្កគ្រោះថ្នាក់ចរាចរណ៍ក្នុងឆ្នាំ២០១២។ នេះបើតាមការចុះផ្សាយរបស់កាសែតបាងកកប៉ុស្តិ៍ថៃ នៅថ្ងៃទី ៣១ ខែកក្កដា ដោយដកស្រង់ការលើកឡើងរបស់គណៈកម្មាធិការសភាថៃ។
ប្រភពដដែល បន្តថា គណៈកម្មាធិការសភាថៃ នៅថ្ងៃទី៣០ ខែកក្កដា បានកោះហៅមន្ត្រីដើម្បីសាកសួរពាក់ព័ន្ធករណីគ្រោះថ្នាក់ចរាចរណ៍បុកហើយរត់នេះ។ អ្នកនាំពាក្យគណៈកម្មាធិការសភា លោក Natchanon Srikokuea បានប្រាប់សន្និសីទព័ត៌មានថា គណៈកម្មាធិការលោកបានសាកសួរទៅកាន់មន្ត្រីដែលកាន់សំណុំរឿងនេះ ពីមូលហេតុដែលពួកគេមិនចោទប្រកាន់បទល្មើសប្រើប្រាស់សារធាតុញៀនប្រឆាំងលោក Vorayuth ទោះជាលទ្ធផលពិនិត្យឈាម បញ្ជាក់ថា ពិតជាប្រើសារធាតុកូកាអ៊ីនមែននោះ។
ក្រុមមន្ត្រីបានឆ្លើយប្រាប់គណៈកម្មាធិការសភាថា ពួកគេសម្រេចមិនចោទប្រកាន់ករណីនេះ ព្រោះថា ខាងពេទ្យធ្មេញបានបញ្ជាក់ថា លោក Vorayuth បានប្រើថ្នាំពេទ្យដែលមានផ្ទុកសារធាតុកូកាអ៊ីនជាផ្នែកមួយនៃការព្យាបាលប៉ុណ្ណោះ។ លោក Natchanon និយាយបែបនេះ។ យ៉ាងណាមិញ លោក ប្រធានគណៈកម្មាធិការសភាថៃ លោក Sira Janejaka អះអាងថា ប៉ូលិសនឹងពិចារណាលើកករណីប្រើប្រាស់សារធាតុញៀននេះប្រឆាំងលោក Vorayuth ៕