ជំងឺគ្រុនឈីកមិនធ្វើឱ្យអ្នកជំងឺស្លាប់ទេ តែប៉ះពាល់សន្លាក់ធ្ងន់ធ្ងរ

ជាតិ

សុខភាព

ជំងឺគ្រុនឈីកមិនធ្វើឱ្យអ្នកជំងឺស្លាប់ទេ តែប៉ះពាល់សន្លាក់ធ្ងន់ធ្ងរ

31, Jul 2020 , 5:28 pm

រូបភាព

ដោយ: អ៊ុត រស្មី (Uth Raksmey)

ភ្នំពេញ៖ ជំងឺឈីកគង់ហ្គន់យ៉ា ឬជំងឺគ្រុនឈីក ជាជំងឺឆ្លងម្យ៉ាងបង្កឡើងដោយមូសខ្លាញី ដែលផ្ទុកមេរោគឈីក។ លោកវេជ្ជបណ្ឌិត វ៉ាន់ សុខជា ឯកទេសជំងឺកុមារ បានអះអាងថា ជំងឺគ្រុនឈីកមិនធ្វើឱ្យអ្នកជំងឺស្លាប់ទេ បើសិនគ្មានជំងឺប្រចាំកាយ តែប៉ះពាល់ដល់សន្លាក់ធ្ងន់ធ្ងរ ឬអាចពិការបាន។

ដើម្បីជ្រាបច្បាស់សូមអញ្ជើញលោក-អ្នកទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មានថ្មីៗ ជាមួយលោកវេជ្ជបណ្ឌិត វ៉ាន់ សុខជា ឯកទេសជំងឺកុមារ និងជាប្រធានមន្ទីរសម្រាកព្យាបាលរោគកុមារម៉ាក់ស៊ីឃែរ ដូចតទៅ៖

ជំងឺគ្រុនឈីក បង្កឡើងដោយមេរោគឈីក ហើយវាចម្លងពីមនុស្សម្នាក់ទៅមនុស្សម្នាក់ តាមរយៈមូសខ្លាញីខាំ។ កត្តាចម្លងផ្សេងទៀត គឺតាមរយៈស្ត្រីពពោះដែលផ្ទុកជំងឺគ្រុនឈីក ឆ្លងដល់កូនក្នុងផ្ទៃ និងតាមរយៈការបញ្ជូលឈាមជាដើម។ នេះបើតាមលោកវេជ្ជបណ្ឌិតផ្នែកជំងឺកុមារ វ៉ាន់ សុខជា។ លោកវេជ្ជបណ្ឌិតបន្តថា ទោះជាជំងឺគ្រុនឈីកភាគច្រើន មិនធ្វើឱ្យប៉ះពាល់ដល់ជីវិតអ្នកជំងឺ តែវាប៉ះពាល់ដល់សន្លាក់ធ្ងន់ធ្ងរ។ ក្នុងករណីមានជំងឺប្រចាំកាយ ដូចជាខ្សោយបេះដូង រលាកខួរក្បាល ឬមានជំងឺគ្រុនឈាម គ្រុនចាញ់នោះ អ្នកជំងឺអាចស្លាប់បាន ប៉ុន្តែក្នុងអត្រាទាប។

លោកវេជ្ជបណ្ឌិតពន្យល់ដូច្នេះថា៖«ស្ទើរតែអ្នកជំងឺទាំងអស់ មិនមានផលប៉ះពាល់ដល់អាយុជីវិតទេ គឺវាជាវិញដោយខ្លួនឯង ហើយផលវិបាកដែលយើងឃើញសំខាន់នោះ គឺប៉ះពាល់សន្លាក់ បានន័យថាគាត់អាចរលាកសន្លាក់ធ្ងន់ធ្ងរ រហូតដល់ខូចសន្លាក់ទៅជាពិការភាពមួយជីវិតក៏មាន»។

ក្រោយពីមនុស្សម្នាក់ត្រូវមូសខ្លាញីខាំ ចំនួន៣-៧ថ្ងៃ វីរុសគ្រុនឈីកនៅសំងំក្នុងខ្លួន ដោយមិនទាន់ចេញរោគសញ្ញានោះទេ។ ក្រោយមក អ្នកជំងឺមានដូចជា អាការក្ដៅខ្លួន ចន្លោះពី៣៨-៤០អង្សា អស់កម្លាំងល្ហិតល្ហៃ។ បន្ទាប់ពី២-៥ថ្ងៃក្រោយមក អ្នកជំងឺចាប់ផ្តើមឈឺសន្លាក់ ឬមានកន្ទួលក្រហមនៅលើស្បែក។ នេះជាការបញ្ជាក់របស់លោកវេជ្ជបណ្ឌិត វ៉ាន់ សុខជា។

ប្រធានមន្ទីរសម្រាកព្យាបាលរោគកុមារម៉ាក់ស៊ីឃែររូបនេះ បញ្ជាក់ថា ដើម្បីការពារជំងឺគ្រុនឈីក ត្រូវលុបបំបាត់ជម្រកមូសខ្លាដែលជាភ្នាក់ងារចម្លងជំងឺ និងការពារកុំឱ្យមូលខ្លាខាំ៕