ជំងឺគ្រុនឈីក ផ្ទុះឡើងជាង១០០០ករណី នៅ១២ខេត្ត

ជាតិ

ជំងឺគ្រុនឈីក ផ្ទុះឡើងជាង១០០០ករណី នៅ១២ខេត្ត

01, Aug 2020 , 11:15 am

រូបភាព

ដោយ: អ៊ុត រស្មី (Uth Raksmey)

ភ្នំពេញ៖ គិតត្រឹមថ្ងៃទី ៣១ ខែកក្តដា អ្នកជំងឺគ្រុនឈីក មានចំនួនសរុប ១០២០ករណី ក្នុងនោះស្ត្រីចំនួន ៥៦២។ ជំងឺនេះ បានផ្ទុះឡើងនៅខេត្តចំនួន១២ ហើយខេត្តដែលកើតមានច្រើនជាងគេគឺ សៀមរាប បន្ទាយមានជ័យ ព្រះវិហារ និងខេត្តកំពង់ចាម។

ជំងឺគ្រុនឈីក បង្កឡើងដោយមេរោគឈីក ហើយវាចម្លងពីមនុស្សម្នាក់ ទៅមនុស្សម្នាក់ តាមរយៈមូសខ្លាញីខាំ។ រោគសញ្ញានៃជំងឺនេះ មានដូចជា ក្តៅខ្លួន មានកន្តួលក្រហមលើស្បែក និងឈឺសន្លាក់ដៃ-ជើងជាដើម។ ជំងឺគ្រុនឈីក មិនធ្វើឱ្យប៉ះពាល់ដល់ជីវិតអ្នកជំងឺទេ តែវាប៉ះពាល់ដល់សន្លាក់ធ្ងន់ធ្ងរ ប៉ុន្តែក្នុងករណីមានជំងឺប្រចាំកាយ ដូចជាខ្សោយបេះដូង រលាកខួរក្បាល ឬមានជំងឺគ្រុនឈាម គ្រុនចាញ់នោះ អ្នកជំងឺអាចស្លាប់បាន។

ក្នុងសេចក្ដីជូនដំណឹងរបស់ក្រសួងសុខាភិបាល នាថ្ងៃទី១ ខែសីហា លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានណែនាំពីវិធានការ៥ចំណុច ដើម្បីទប់ស្កាត់ជំងឺគ្រុនឈីកដែលកំពុងផ្ទុះឡើងក្នុងខេត្តចំនួន១២។

វិធានការទី១៖ មាតាបិតា អាជ្ញាធរមូលដ្ឋាន ត្រូវចូលរួមកម្ចាត់ដង្កូវទឹកនៅតាមទីកន្លែងដែលមានទឹកដក។ វិធានការទី ២៖ ត្រូវប្រកាន់ខ្ជាប់នូវទម្លាប់រស់នៅស្អាត ជាពិសេសអំឡុងពេលថ្ងៃ ត្រូវស្លៀកសម្លៀកបំពាក់មានដៃវែងជើងវែង សម្រាន្តក្នុងមុងជាប្រចាំ និងមិនត្រូវអង្គុយលេងនៅទីងងឹតឡើង។

រីឯវិធានការទី៣៖ ករណីមានរោគសញ្ញាក្ដៅខ្លួនខ្លាំង ត្រូវប្រញាប់នាំអ្នកជំងឺជួបគ្រូពេទ្យជំនាញ និងកុំសាកល្បងព្យាបាលអ្នកជំងឺដោយខ្លួនឯង ឬពន្យារពេលតាមដានអ្នកជំងឺនៅសេវាឯកជនដែលគ្មានសមត្ថភាពផ្នែកជំងឺគ្រុនឈាម។ វិធានការទី៤៖ គ្រប់មន្ទីរសុខាភិបាលរាជធានី-ខេត្តទាំង២៥ ត្រូវចាត់ចែងសេវា និងកន្លែងសម្រាកព្យាបាលជំងឺគ្រុនឈីកឱ្យបានល្អ និងត្រូវបញ្ជូនអ្នកជំងឺទៅមន្ទីរពេទ្យផ្សេងទៀត ក្នុងករណីមានអ្នកជំងឺច្រើន។ និងវិធានការទី៥៖ គ្រប់មន្ទីរសុខាភិបាលរាជធានី-ខេត្ត ត្រូវសហការជាមួយផ្នែកពាក់ព័ន្ធ និងអង្គការដៃគូអភិវឌ្ឍន៍ ដើម្បីផ្សព្វផ្សាយសារអប់រំសុខភាពទប់ស្កាត់ជំងឺគ្រុនឈីក។

ជំងឺគ្រុនឈីក បានកើតឡើងដំបូងបំផុតនៅទ្វីបអាហ្វ្រិក ក្នុងឆ្នាំ១៩៥៣។ ដោយឡែក នៅកម្ពុជារកឃើញជំងឺគ្រុនឈីកនេះ នៅក្នុងឆ្នាំ១៩៦១ និងនៅឆ្នាំ២០១១ ក៏មានការបញ្ជាក់ពីករណីនេះ នៅខេត្តបាត់ដំបង សៀមរាប ព្រះវិហារ ហើយជំងឺឈីកនេះ ធ្លាប់មានអត្រាឆ្លងរោគរហូតដល់៦០-៧០ភាគរយ ក្នុងប្រទេសកម្ពុជា នាទសវត្សរ៍ទី៦០។ ជំងឺនេះ ធ្លាប់រាតត្បាតខ្លាំងផងដែរ ក្នុងឆ្នាំ២០១១-២០១២ នៅរាជធានីភ្នំពេញ ខេត្តព្រះវិហារ កំពង់ស្ពឺ កំពង់ចាម តាកែវ រតនគិរី ស្ទឹងត្រែង កំពង់ធំ កណ្តាល និង ខេត្តកំពត៕