វិធីសាស្ត្រ៥យ៉ាងដែលឪពុកម្តាយជប៉ុនចិញ្ចឹមកូនឲ្យក្លាយជាមនុស្សរឹងមាំ និងស្មារតីម្ចាស់ការ

សង្គមអន្តរជាតិ

អន្តរជាតិ

វិធីសាស្ត្រ៥យ៉ាងដែលឪពុកម្តាយជប៉ុនចិញ្ចឹមកូនឲ្យក្លាយជាមនុស្សរឹងមាំ និងស្មារតីម្ចាស់ការ

01, Aug 2020 , 9:29 pm

រូបភាព

ដោយ: ធីតា

ភាពជាឪពុកម្តាយ មានពេលខ្លះរីករាយ ពេលខ្លះស្មុគស្មាញ ប៉ុន្តែបេសកកម្មដ៏ធំបំផុតគឺការចិញ្ចឹមបីបាច់កូនៗឲ្យសប្បាយរីករាយ មានសុខភាពល្អ និងឆ្លាតវៃ។ កុមារជប៉ុន ទោះមានអាយុប៉ុណ្ណាក៏ដោយ ក៏ឪពុកម្តាយមានទម្លាប់ឲ្យពួកគេក្លាយជាមនុស្សម្ចាស់ការលើខ្លួនឯង ហើយកម្រឃើញពួកគេយំខ្លាំងណាស់នៅទីសារធារណៈ។

ចំណុច៥យ៉ាងដែលឪពុកម្តាយជប៉ុនចិញ្ចឹមអប់រំកូនៗខុសពីអ្នកដទៃ៖

១.កុមារជប៉ុនត្រូវបានអប់រំណែនាំឲ្យចេះធ្វើការងារដោយស្មើភាព

វីដេអូមួយចំនួនបានបង្ហាញឲ្យឃើញសិស្សសាលាជប៉ុនសម្អាតបន្ទប់រៀន ប៉ុន្តែទាំងនេះមិនមែនជាការសម្តែងនោះឡើយ វាជាវប្បធម៌របស់ជប៉ុនតែម្តង។ ទាំងនោះសាលា និងក្នុងគ្រួសារ ត្រូវបានអប់រំណែនាំឲ្យធ្វើការងារដូចគ្នា មិនថាជាកូនស្តេច កូនអ្នកមាន ឬអ្នកក្រនោះឡើយ។

ក្នុងទស្សនះជប៉ុន កុមារទាំងអស់ត្រូវអប់រំតាំងពីឆ្នាំដំបូងឲ្យស្គាល់ពីតម្លៃដូចគ្នា ដោយធ្វើយ៉ាងណាឲ្យពួកគេចៀសផុតពីការគិតតែប្រយោជន៍ផ្ទាល់ខ្លួន។ ការអប់រំឆ្នាំដំបូង គឺមានសារសំខាន់ខ្លាំងណាស់សម្រាប់គ្រួសារជប៉ុន ដើម្បីឲ្យបុត្រធីតារបស់ពួកគេសម្របខ្លួនរស់នៅរួមគ្នានៅក្នុងសង្គមមួយដែលស្មើភាពគ្នា។

២.ទំនាក់ទំនងម្តាយកូនមានភាពរឹងមាំ និងគួរឲ្យគោរពបំផុត

ក្នុងវប្បធម៌ជប៉ុន គ្រួសារដូចជានិកាយមួយយ៉ាងដូច្នោះដែរ រីឯទំនាក់ទំនងរវាងម្តាយ និងកូន គឺជាគន្លឹះយ៉ាងសំខាន់។ ជាក់ស្តែង ម្តាយជប៉ុនមានតួនាទីយ៉ាងសំខាន់ក្នុងការអប់រំកូនឲ្យមានការគិតវិជ្ជមាន និងកាត់បន្ថយកុំឲ្យមានវិបត្តិផ្លូវចិត្តណាមួយនៅពេលដែលពួកគេធំដឹងក្តី។

កុមារជប៉ុនតែងតែទទួលបានចំណេះដឹងមូលដ្ឋានពីម្តាយ ហើយរដ្ឋាភិបាលក៏បានផ្តល់ការឧបត្ថម្ភលើកទឹកចិត្តសម្រាប់ម្តាយដែលចំណាយពេលវេលាច្រើននៅជាមួយកូនៗផងដែរ ហេតុដូច្នេះហើយបានជាកុមារជប៉ុនក្រោមអាយុ៣ឆ្នាំ មិនទាន់ត្រូវបានបញ្ជូនឲ្យទៅរៀនថ្នាក់មតេយ្យដូចជាបណ្តាប្រទេសមួយចំនួននោះឡើយ។

៣.ឪពុកម្តាយជប៉ុនយកចិត្តទុក្ខដាក់ខ្លាំងណាស់លើសតិអារម្មណ៍កូនៗ

ការយកចិត្តទុកដាក់លើបញ្ហាផ្លូវចិត្ត ជាពិសេសតិអារម្មណ៍ ជាផ្នែកដ៏សំខាន់ដល់ការលូតលាស់ផ្នែករាងកាយរបស់បុត្រធីតា។ ឪពុកម្តាយជប៉ុនស្គាល់ពីតម្លៃនេះយ៉ាងច្បាស់ ដោយពួកគាត់តែងតែបង្ហាញអាកប្បកិរិយាបង្ហាញភាពកក់ក្តៅ និងលើកទឹកចិត្តកូន។ ប៉ុន្តែ ក៏មានការពិន័យក្នុងកម្រិតណាមួយដែលពួកគេធ្វើខុស។

ការយកចិត្តទុកដាក់លើអារម្មណ៍របស់កូនៗ ជាកាតាព្វកិច្ចដ៏ចម្រងរបស់ឪពុកម្តាយ ដើម្បីបង្រៀនពួកគេឲ្យយល់ពីដំណើរនៃសភាវៈមាន និងគ្មានវិញ្ញាណ។ កត្តានេះនាំឲ្យពួកគេរៀនរស់នៅរួមគ្នាក្នុងសង្គម។

៤. ពាក្យសរសើរពីអ្នកដទៃមិនមែនជាមូលដ្ឋាននៃកម្លាំងចិត្តឡើយ

ខណៈដែលឪពុកម្តាយទូទៅ វាយតម្លៃពីភាពរីកចម្រើនរបស់កូនៗតាមរយៈការកោតសរសើរពីសាធារណជន ប៉ុន្តែសម្រាប់ឪពុកម្តាយជនជាតិជប៉ុន ករណីនេះមិនសូវមានឥទ្ធិពលប៉ុន្មានឡើយ។

ពិតណាស់ គេត្រូវតែរីករាយចំពោះការកោតសរសើរផ្សេងៗ ប៉ុន្តែក្មេងៗនៅជប៉ុន ត្រូវបានអប់រំឲ្យមានទម្លាប់ធ្វើអ្វីដោយខ្លួនឯង ជាពិសេសសណ្តាប់ធ្នាប់ ដោយមិនចាំបាច់រង់ចាំការជំរុញ ឬពាក្យលើកទឹកចិត្តពីអ្នកដទៃនោះទេ។

៥. វិធីសាស្ត្ររៀបចំម្ហូបអាហារឲ្យកូនៗញ៉ាំដោយរីករាយ

ឪពុកម្តាយជប៉ុនសុទ្ធតែមានវិធីសាស្ត្រទាក់ទាញឲ្យកូនចូលចិត្តញ៉ាំបាយដែលគួរយកគំរូតាម ជាពិសេសការរៀបចំប្រអប់អាហារ Bento សម្រាប់កូនៗទៅញ៉ាំនៅសាលារៀន។ អាហារថ្ងៃត្រង់នៅសាលារៀនជប៉ុន ល្បីល្បាញពេញពិភពលោក ដោយការរៀបចំទាក់ទាញ និងមិនធ្វើឲ្យក្មេងធុញទ្រាន់។

យោងតាមការអង្កេតមួយ កុមារជប៉ុនស្ថិតក្នុងចំណោមកុមារដែលមានសុខភាពល្អជាងគេលើលោក។ បន្ថែមពីលើនេះ ពួកគេក៏មានចំណែកជួយចំអិនអាហារក្នុងផ្ទះបាយ ដឹងពីបរិមាណអាហារ និងវេចខ្ចប់តាមរបៀបដ៏គួរឲ្យចាប់អារម្មណ៍ និងរីករាយសម្រាប់កុមារ៕