COVID-19 នាំ​ឲ្យ​អាជីវកម្ម​ទេសចរណ៍​ជាង​៣​ពាន់​បិទទ្វារ និង​មនុស្ស​ជាង​៥​ម៉ឺន​បាត់បង់​ការងារ​
ជាតិ
២៥ខេត្ត/រាជធានី
COVID-19 នាំ​ឲ្យ​អាជីវកម្ម​ទេសចរណ៍​ជាង​៣​ពាន់​បិទទ្វារ និង​មនុស្ស​ជាង​៥​ម៉ឺន​បាត់បង់​ការងារ​
01, Aug 2020 , 4:30 pm        
រូបភាព
 លោក ថោង ខុន រដ្ឋមន្ត្រីក្រសួងទេសចរណ៍
លោក ថោង ខុន រដ្ឋមន្ត្រីក្រសួងទេសចរណ៍
​វិស័យ​ទេសចរណ៍ ជាពិសេស​អាជីវកម្ម និង​កម្លាំង​ការងារ​ក្នុង​វិស័យ​មួយ​នេះ រង​ប៉ះពាល់​យ៉ាងខ្លាំង​ដោយសារ​ការ​រាតត្បាត​កូ​វីដ​-១៩​នៅលើ​ពិភពលោក ក៏ដូចជា​នៅ​កម្ពុជា​។ មិនមាន​ភ្ញៀវ​អន្តរជាតិ​ដើរ​កម្សាន្ត​ឡើយ​។ នេះ​បើតាម​ការលើកឡើង​រប​ស់លោក ថោង ខុន រដ្ឋមន្ត្រី​ក្រសួងទេសចរណ៍ ដែល​បង្ហាញ​ពី​តួលេខ​អាជីវកម្ម​ទេសចរណ៍​ដែល​បាន​បិទទ្វារ និង​ការបាត់បង់​ការងារ​រ​បស់​អ្នកបម្រើ​លើ​វិស័យនេះ​។​

 
​នា​កិច្ចប្រជុំ​មួយ​កាលពី​ថ្ងៃទី​៣១ ខែកក្កដា ឆ្នាំ​២០២០​កន្លង លោក ថោង ខុន រដ្ឋមន្ត្រី​ក្រសួងទេសចរណ៍ បាន​លើកឡើងថា ការ​រាតត្បាត​ជំងឺ COVID-19 ធ្វើ​ឲ្យ​កម្ពុជា ជួប​ការប៉ះពាល​ជាខ្លាំង​ដល់​វិស័យ​ទេសចរណ៍ និង​បានធ្វើ​ឲ្យ​អាជីវកម្ម​ធំៗ​នៅក្នុង​វិស័យ​ទេសចរណ៍​ជាង ៣ ០០០ អាជីវកម្ម បាន​បិទទ្វារ ហើយ​មួយចំនួនទៀត​ក៏​ផ្អាក​អាជីវកម្ម​។ ប្រការនេះ​ធ្វើ​ឲ្យ​បាត់បង់​ការងារ​ក្នុង​វិស័យ​ទេសចរណ៍​ជាង ៥០ ០០០​នាក់ ដោយសារ​មិនមាន​ភ្ញៀវ​អន្តរជាតិ​ចូលមក​ទស្សនា​កម្ពុជា​។​ 



​ដើម្បី​ជំរុញ​កំណើន​ភ្ញៀវទេសចរ​អន្តរជាតិ​ឱ្យ​ចូលមក​កម្សាន្ត​នៅ​ប្រទេស​កម្ពុជា​ឡើងវិញ ក្រសួងទេសចរណ៍​បានរៀបចំ​សេចក្ដីព្រៀង​គោលការណ៍​ណែនាំ​ស្ដីពី ការធ្វើដំណើរ​ដោយ​កន្លែង (Travel Bubble or One way Closed-loop Charted Plane)​។ បើតាម​ក្រសួងទេសចរណ៍ សេចក្ដីព្រៀង​គោលការណ៍​ណែនាំ​ស្ដីពី​ការធ្វើដំណើរ​ដោយ​កន្លែង ឬ ហៅថា Travel Bubble នេះ​គឺជា​កញ្ចប់​ទេសចរ​ណ៍ទ​ទួល​ភ្ញៀវទេសចរ​អន្ត​រ​ជាតិ ដែលមាន​ការគ្រប់គ្រង​ត្រឹមត្រូវ​ពី​បណ្ដា​តំបន់ ឬ ប្រទេស​ដែលមាន​សុវត្ថិភាព​ពី​កូ​វីដ​-១៩​។ 
 
​លោក ថោង ខុន បានបញ្ជាក់​ទៀតថា ទន្ទឹមនឹង​ការជំរុញ​ឱ្យមាន​ការបើក​ការធ្វើដំណើរ​ដោយ​កន្លែង ដើម្បី​ឲ្យ​ទទួលភ្ញៀវ​ទេសចរ​អន្ត​រ​ជាតិ​មកលេង​កម្សាន្ត​នៅ​ប្រទេស​កម្ពុជា លោក​សុំ​បណ្ដា​ក្រុមហ៊ុន​ទេសចរណ៍​នានា សណ្ឋាគារ ផ្ទះសំណាក់ និង​អាជីវកម្ម​ផ្សេងៗ ខិតខំ​រក្សា​អនាម័យ​ឲ្យ​បានល្អ​ប្រសើរ  ដើម្បី​ផ្ដល់​ទំនុកចិត្ត​ខ្ពស់​ដល់​ភ្ញៀវទេសចរ​អន្តរជាតិ​។​
 
​សម្រាប់​ការទទួល​ភ្ញៀវទេសចរ​អន្តរជាតិ​តាមបែប Travel Bubble នេះ គឺ​កម្ពុ​ជាមាន​ក្តី​រំពឹង​ទទួលភ្ញៀវ​ទេសចរ​អន្ត​រ​ជាតិ​តែ​លើ​ប្រភេទ​ភ្ញៀវទេសចរ​ចូលនិវត្តន៍ និង​ភ្ញៀវ​អ្នកមាន​អ្នកមាន​ជាដើម ជា​
​ពិសេស​ភ្ញៀវទេសចរ​អន្តរជាតិ​នៅតាម​តំបន់​មាន​សុវត្ថិភាព​នៅក្នុង​តំបន់​អាស៊ាន និង​អាស៊ាន​បូក​៣​។​
 
​ទាំងនេះ​ជា​គោលដៅ​សិក្សា​ជាបឋម និង​ត្រូវ​ធ្វើជា​ដំណាក់កាលៗ​។ ទោះបីជា​យ៉ាងណាក៏ដោយ សម្រាប់​ការទទួល​ភ្ញៀវទេសចរ​អន្តរជាតិ​ដោយ​កន្លែង Travel Bubble នេះ លោក ថោង ខុន អះអាងថា ត្រូវមាន​ការឯកភាព​គាំទ្រ​ពី​ក្រសួងសុខាភិបាល និង​ការអនុញ្ញាត​ពី​រាជរដ្ឋាភិបាល ជាមុនសិន​។​
 
​គិត​ត្រឹម​ថ្ងៃទី​១ ខែសីហា ឆ្នាំ​២០២០​នេះ ចំនួន​អ្នក​វិជ្ជមាន​កូ​វីដ​-១៩​សរុប នៅក្នុង​ប្រទេស​កម្ពុ​ជាមាន​ចំនួន​២៣៩​នាក់ ក្នុងនោះ​អ្នកជា​សះស្បើយ​មាន​ចំនួន​១៦៤​នាក់ និង​អ្នក​កំពុង​សម្រាក​ព្យាបាល​មាន​ចំនួន​៧៥​នាក់​៕
 
 
 

Tag:
 Thmey Thmey25
  ​ទេសចរណ៍​
© រក្សាសិទ្ធិដោយ thmeythmey.com