តុលាការ​រាជធានី​ភ្នំពេញ ចេញ​ដីការ​ឃុំខ្លួន​លោក រ៉ុង ឈុន បណ្តោះអាសន្ន
ច្បាប់ / សិទិ្ធមនុស្ស / តុលាការ
ជាតិ
តុលាការ​រាជធានី​ភ្នំពេញ ចេញ​ដីការ​ឃុំខ្លួន​លោក រ៉ុង ឈុន បណ្តោះអាសន្ន
01, Aug 2020 , 7:05 pm        
រូបភាព
មនុស្សជាច្រើន​នាំគ្នា​លើបដា និងស្រែកតវ៉ាសុំឲ្យតុលាការដោះលែងលោក រ៉ុង ឈុន។ រូបថត AFP
មនុស្សជាច្រើន​នាំគ្នា​លើបដា និងស្រែកតវ៉ាសុំឲ្យតុលាការដោះលែងលោក រ៉ុង ឈុន។ រូបថត AFP
ដោយ: ថ្មីៗ
​នា​រសៀល​ថ្ងៃទី​១ ខែសីហា នេះ ចៅក្រម​ស៊ើបសួរ​នៃ​សាល​ដំបូង​រាជធានី​ភ្នំពេញ បានចេញ​ដីការ​ឃុំខ្លួន​លោក រ៉ុង ឈុន ជា​បណ្តោះអាសន្ន​ពីបទ​ញុះញង់​បង្ក​ឲ្យ​មាន​ភាពវឹកវរ​ធ្ងន់ធ្ងរ​ដល់​សន្តិសុខ​សង្គម តាម​មាត្រា ៤៩៥ នៃ​ក្រមព្រហ្មទណ្ឌ​។ តាម​មាត្រា​ខាងលើ លោក​ត្រូវបាន​ប្រឈម​ការផ្តន្ទាទោស​ដាក់ពន្ធនាគា​រ​ពី​៦​ខែ​ទៅ​២​ឆ្នាំ និង​ពិន័យ​ជា​ប្រាក់​ពី​១​លាន​ទៅ​៤​លាន​រៀល ប្រសិនបើ​ការ​ញុះញង់​នេះ​គ្មាន​ប្រសិទ្ធភាព​ទេ​។​



​លោក​មេធាវី សំ សុ​គង់ បាន​អះអាង​ប្រាប់​អ្នកសារព័ត៌មាន​នៅក្រៅ​បរិវេណ​សាលាដំបូង​ថា លោក រ៉ុង ឈុន ត្រូវបាន​តុលាការ​បញ្ជូនទៅ​ឃុំខ្លួន​បណ្តោះអាសន្ន​នៅ​ពន្ធនាគារ​ព្រៃ​សរ ដើម្បី​រងចាំ​ការកោះហៅ​ជាថ្មី និង​ឈានដល់​សវនាការ​កាត់ទោស​ផ្លូវការ​។​

​លោក រ៉ុង ឈុន ត្រូវ​ចាប់ខ្លួន នៅ​យប់​ថ្ងៃទី​៣១ ខែកក្កដា ឆ្នាំ​២០២០​នេះ ដោយ​លោក រង​ការចោទប្រកាន់ថា បាន​បំផ្លើស​ខុស​ការពិត​ក្នុង​រឿង​ព្រំដែន​។ លោក ជា​តំណាង​ក្រុមប្រឹក្សា​ឃ្លាំមើល​កម្ពុជា ជា​មេ​សហជីព និង ជាទី​ប្រឹក្សា​នៃ​សមាគម​គ្រូបង្រៀន​ឯករាជ្យ​កម្ពុជា​។ ដំណើរការ​សាកសួរ​លោក រ៉ុង ឈុន បាន​ប្រព្រឹត្តទៅ​ពេញ​មួយថ្ងៃ នៅ​ថ្ងៃ​សៅរ៍ ទី​១ ខែសីហា នេះ ដោយនៅ​ខាងក្រៅ​សាលាដំបូង​រាជធានី​ភ្នំពេញ មនុស្ស​ជាច្រើន​តវ៉ា​ឲ្យ​ដោះលែង​លោក​។​

​លោក រ៉ុង ឈុន តែង​ធ្វើ​សកម្មភាព​នានា​តវ៉ា​នឹង​រដ្ឋាភិបាល ហើយ​មួយរយៈ​ចុងក្រោយ​នេះ គេ ឃើញ​លោក សកម្ម​ខ្លាំង ដូចជា ចូលរួម​ទាមទារ​ឲ្យ​រដ្ឋាភិបាល ការពារ​តំបន់​កោះកុង​ក្រៅ ចូលរួម​ក្នុង​សកម្មភាព​ការពារ​បរិស្ថាន​និង​ព្រៃឈើ និង ចូលរួម​ស្នើ​ឲ្យ​រដ្ឋាភិបាល ផ្តល់​អត្ថប្រយោជន៍​ផ្សេងៗ ជូន​កម្មករ​-​កម្មការិនី ជាដើម​។ លោក ក៏​ជា​មនុស្ស​ម្នាក់ ដែល​តែងតែ​និយាយ​និង​ឈឺឆ្អាល​នឹង​រឿង​ព្រំដែន​ដែរ​។​

​លោក ត្រូវ​ចាប់ខ្លួន បន្ទាប់ពី​លោក អះអាងថា តំបន់​ខ្លះ តាម​បណ្តោយ​ព្រំដែន ក្នុង​ខេត្ត​ត្បូងឃ្មុំ ត្រូវ​រង​ការបំពាន​ពី​អាជ្ញាធរ​វៀតណាម ហើយ​ប្រជាពលរដ្ឋ​ខ្មែរ​មួយចំនួន រស់នៅក្នុង​តំបន់​នោះ ក៏មាន​បញ្ហាដីធ្លី​ដែរ ដោយសារតែ​ការបំពាន​ពី​អាជ្ញាធរ​វៀតណាម ឯ​អាជ្ញាធរ​កម្ពុជា មិនបាន​ជួយ​នោះទេ​។ មុននឹង​ត្រូវ​ចាប់ខ្លួន លោក ត្រូវ​គណៈកម្មាធិការ​ចម្រុះ​កិច្ចការ​ព្រំដែន​កម្ពុជា ព្រមាន​ថា ការធ្វើសកម្មភាព​ណាមួយ ក្នុង​ចេតនា​បំផ្លើសការពិត​អំពី​រឿង​ព្រំដែន ហើយ​នាំ​ឲ្យ​សាធារណជន​ភាន់ច្រឡំ គឺ «​អាច​ប្រឈមមុខ​នឹង​ផ្លូវច្បាប់​»​។

​កាលពី​ថ្ងៃទី​២០ ខែកក្កដា ឆ្នាំ​២០២០ លោក រ៉ុង ឈុន ធ្វើជា​តំណាង​របស់​ក្រុមប្រឹក្សា​ឃ្លាំមើល​កម្ពុជា ដឹកនាំ​ក្រុមការងារ ចុះទៅពិនិត្យ​ផ្ទាល់ នៅ​តំបន់​ដី​មានទំនាស់​របស់​ប្រជាពលរដ្ឋ និង បាន​ពិនិត្យមើល​បង្គោល​ព្រំដែន​ពី​លេខ​១១៤ ដល់ លេខ​១១៩ ផងដែរ ស្ថិតក្នុង​ភូមិសាស្ត្រ ឃុំ​ត្រពាំង​ផ្លុ​ង ស្រុក​ពញាក្រែក ខេត្ត​ត្បូងឃ្មុំ​។ ក្រុមប្រឹក្សា​ឃ្លាំមើល​កម្ពុជា មាន​សមាជិក​ភាគច្រើន​រស់​នៅឯ​ក្រៅប្រទេស ហើយ​គេ​ដឹងថា មិនសូវ​ពេញ​ចិត្តនឹង​រដ្ឋាភិបាល​ក​ម្ពុ​ជា​ឡើយ​។​

​ក្រោយមក​មួយថ្ងៃ គឺ​នៅ​ថ្ងៃទី​២១ ខែកក្កដា លោក រ៉ុង ឈុន ក៏​ចេញ​សេចក្តីថ្លែងការណ៍ ក្នុងនាម​ជា​ក្រុមប្រឹក្សា​ឃ្លាំមើល​កម្ពុជា ស្តីពី​បេសកកម្ម​របស់លោក ដែល​ចុះទៅ​ជួប​ប្រជាពលរដ្ឋ​និង​ដើរ​មើល​តាម​ព្រំដែន​។ លោក សរសេរ​ក្នុង​សេចក្តីថ្លែងការណ៍​ថា ក្នុង​ការចុះ​បំពេញបេសកកម្ម នៅតាម​បណ្តោយ​ព្រំដែន នៅ​ខេត្ត​ត្បូងឃ្មុំ ក្រុមការងារ​របស់លោក បាន​ជួប​សំណេះសំណាល​ជាមួយ​តំណាង​ប្រជាពលរដ្ឋ​រងគ្រោះ​ជាង​១០០​គ្រួសារ​។​

​បើតាម​លោក រ៉ុង ឈុន តំណាង​ប្រជាពលរដ្ឋ​ទាំងនោះ បាន​ប្រា​ប់លោក​និង​ក្រុមការងារ​ថា ការបោះបង្គោល​ព្រំដែន​ពី​លេខ​១១៤ ដល់​លេខ​១១៩ មាន​ភាពមិនប្រក្រតី​ច្រើន ដែល​ធ្វើ​ឲ្យ​ពួកគេ បាត់បង់​ដី​អាស្រ័យ​ផល​ជាច្រើន​ហិកតា ទៅខាង​វៀតណាម ហើយពី​បន្ទាត់​ព្រំដែន​ចាស់ ដល់​បង្គោល​ឡាក់ និង បង្គោល​រណប​ថ្មី គឺ​បាន​ចូលមក​ប្រហែល​៥០០​ម៉ែត្រ ក្នុង​ទឹកដី​កម្ពុជា​។​

​លោក ទទួលបាន​ព័ត៌មាន​ពី​តំណាង​ប្រជាពលរដ្ឋ​ទៀតថា ខ្សែ​បន្ទាប់​ព្រំដែន ចេះតែ​រំកិល​បន្តិច​ម្តងៗ ចូលមក​ទឹកដី​កម្ពុជា ដែល​បច្ចុប្បន្ន រំកិល​ចូលមក​បាន​ប្រហែល​៣​គីឡូម៉ែត្រ​ហើយ​។ លោក រ៉ុង ឈុន បានដឹង​តាមរយៈ​ការរៀបរាប់​របស់​តំណាង​ប្រជាពលរដ្ឋ​ទៀតថា ពេល​ពួកគាត់ ទៅ​បង្កបង្កើត​ផល​លើដី​របស់​ពួកគាត់ ដែលមាន​ទំហំ​ប្រមាណ​៦០​ហិកតា ពួកគាត់ ក៏ត្រូវ​អាជ្ញាធរ​ស្រុក​ពញាក្រែក រារាំង​និង​បណ្តេញចេញ​។​

​លោក បន្តថា លើសពីនេះ អាជ្ញាធរ​វៀតណាម ថែមទាំង​បាន​ចូលរួម​បណ្តេញ​និង​រុញច្រាន​ប្រជាពលរដ្ឋ​ខ្មែរ​ទាំងនោះ ចេញពី​ដីធ្លី​ដែរ រហូតដល់​អាជ្ញាធរ​វៀតណាម បាន​ចូលមក​ដី​ខ្មែរ​ប្រមាណ​២០០​ម៉ែត្រ ដោយ​អាជ្ញាធរ​កម្ពុជា មិនបាន​ទប់ស្កាត់​។​

​នៅ​ថ្ងៃទី​៣១ ខែកក្កដា​នេះ គណៈកម្មាធិការ​ចម្រុះ​កិច្ចការ​ព្រំដែន​កម្ពុជា ដែលមាន លោក វ៉ា គឹមហុង ជា​ប្រធាន បានចេញ​សេចក្តីថ្លែងការណ៍​មួយ​វិញ ដោយ​ច្រានចោល​ទាំងអស់ ចំពោះ​អ្វីដែល​លោក រ៉ុង ឈុន លើកឡើង​ខាងលើ​។ គណៈកម្មាធិការ​ចម្រុះ​កិច្ចការ​ព្រំដែន ប្រកាសប្រាប់​ប្រជាជន​កម្ពុជា​ជាថ្មី​ថា​៖«​ការធ្វើ​ខណ្ឌសីមា និង​ការបោះបង្គោល​ព្រំដែន​គោក ជាមួយ​វៀតណាម ពុំបាន​ធ្វើ​ឲ្យ​កម្ពុជា​បាត់បង់​ទឹកដី​នោះទេ​»​។​

​គណៈកម្មាធិការ​ចម្រុះ​កិច្ចការ​ព្រំដែន ចាត់ទុក​សេចក្តីថ្លែងការណ៍​របស់​ក្រុមប្រឹក្សា​ឃ្លាំមើល​កម្ពុជា ដែល​ចេញ​ដោយ​លោក រ៉ុង ឈុន ថា គ្មាន​មូលដ្ឋាន​អំពី​ការងារ​ព្រំដែន ហើយ​មាន​ចេតនា​ប្រឌិត​រឿង និង​ផ្សព្វផ្សាយ​ព័ត៌មាន​ក្លែងក្លាយ ដើម្បី​បំភាន់​សាធារណមតិ​ជាតិ​-​អន្តរជាតិ​។​

​តាមរយៈ​សេចក្តីថ្លែងការណ៍​របស់​ខ្លួន គណៈកម្មាធិការ​ចម្រុះ​កិច្ចការ​ព្រំដែន អំពាវនាវ​ឲ្យ​សាធារណជន កុំ​ជឿ​សេចក្តីថ្លែងការណ៍​របស់​លោក រ៉ុង ឈុន​។ គណៈកម្មាធិការ​ចម្រុះ​កិច្ចការ​ព្រំដែន មើលឃើញថា លោក រ៉ុង ឈុន និង ក្រុមមនុស្ស​មួយចំនួនទៀត តែង​បង្កើត​ព័ត៌មាន​ក្លែងក្លាយ ដើម្បី​វាយប្រហារ​ដល់​កិច្ចការ​ព្រំដែន​របស់​រដ្ឋាភិបាល​កម្ពុជា ហើយ​សកម្មភាព​ទាំងអស់នោះ អាច​ប្រឈមមុខ​នឹង​ច្បាប់​។​

​យ៉ាងណាក៏ដោយ លោក រ៉ុ​ន ឈុន តាមរយៈ​សេចក្តីថ្លែងការណ៍ បានបង្ហាញ​ការយល់​របស់លោក​ថា ប្រជាពលរដ្ឋ​ទាំងនោះ ក្នុង​ខេត្ត​ត្បូងឃ្មុំ បាន​បាត់បង់​ដីធ្លី​ជាច្រើន ទៅ​វៀតណាម បន្ទាប់ពី​បោះបង្គោល​ព្រំដែន​រួច ដូច្នេះ នៅសល់​ដី​តិចតួច រដ្ឋាភិបាល គួរតែ​ផ្តល់​ឲ្យ​ពួកគាត់​។ លោក និយាយ​ក្នុង​សេចក្តីថ្លែងការណ៍​ទៀតថា ចំពោះ​ទង្វើ​របស់​អាជ្ញាធរ​វៀត​ណា​ម ដែល​រុញច្រាន​ប្រជាពលរដ្ឋ​ខ្មែរ រហូត​អាជ្ញាធរ​វៀតណាម​ចូលមក​ដល់​ដី​ខ្មែរ​ប្រមាណ​២០០​ម៉ែត្រ គឺជា​ការរំលោភបំពាន​អធិបតេយ្យ​កម្ពុជា​។​

​លោក ស្នើ​ឲ្យ​រដ្ឋាភិបាល​កម្ពុជា ពង្រឹង​កងកម្លាំង​ការពារ​តាម​ខ្សែបន្ទាត់​ព្រំដែន ដើម្បី​កុំ​ឲ្យ​កម្លាំង​អាជ្ញាធរ​ប្រទេសជិតខាង ចូលមកក្នុង​ដែន​អធិបតេយ្យ​កម្ពុជា​។ បន្ថែម​ពីនេះ លោក ស្នើ​ឲ្យ​រដ្ឋាភិបាល ផ្តល់​ដី​ទំហំ​៦០​ហិកតា ដែល​កំពុង​ស្ថិតក្នុង​ជម្លោះ ជូនទៅ​ប្រជាពលរដ្ឋ​វិញ​។​

​នៅ​យប់​ថ្ងៃទី​៣១ ខែកក្កដា វិទ្យុ​អាស៊ីសេរី សម្ភាស​លោក ពី​បញ្ហា​របស់​ប្រជាពលរដ្ឋ​និង​បញ្ហា​ព្រំដែន ក្នុង​ខេត្ត​ត្បូងឃ្មុំ ដែល​លោក បាន​ចុះទៅពិនិត្យ​ដោយផ្ទាល់​។ ក្រោយ​ធ្វើ​អត្ថាធិប្បាយ​ជាមួយ​វិទ្យុ​អាស៊ីសេរី​រួច កម្លាំង​សមត្ថកិច្ច ក៏​ទៅ​ចាប់​លោក​ទាំងយប់ ដល់​គេហដ្ឋាន ក្នុង​រាជធានី​ភ្នំពេញ​។

​ក្រៅពី​រឿង​ប្រជាពលរដ្ឋ​និង​រឿង​ព្រំដែន​នៅ​ខេត្ត​ត្បូងឃ្មុំ ដែ​លោក រ៉ុង ឈុន លើកឡើង ការបោះ​តង់​របស់​យោធា​វៀតណាម ចូលមកក្នុង​ទឹកដី​កម្ពុជា តាម​បណ្តោយ​ព្រំដែន ជាពិសេស​ក្នុង​ខេត្តកណ្តាល ក៏​ជា​បញ្ហា​មួយ ដែល​ប្រជាពលរដ្ឋ​កម្ពុជា កំពុង​ជជែក​គ្នា​ដែរ ហើយ​នៅមាន​ចម្ងល់​ថា ហេតុអ្វី វៀតណាម មិនទាន់​រុះរើ​តង់​ទាំងនោះ​ចេញ​វិញ​?

​តំបន់ ដែល​យោធា​វៀតណាម បោះតង់ គឺជា​តំបន់​មិនទាន់​ឯកភាព (​តំបន់ស​)​។ រដ្ឋាភិបាល​កម្ពុជា ទទូច​ម្តង​ជា​ពីរដង ឲ្យ​វៀតណាម រុះរើ​តង់​ទាំងនោះ​ចេញ​វិញ​។ តែ​វៀតណាម ឆ្លើយតប​ថា ចាំ​ជំងឺ​កូ​វីដ​-១៩ ត្រូវបាន​កម្ចាត់​ទាំងស្រុង​សិន ទើប​រុះរើ​៕



© រក្សាសិទ្ធិដោយ thmeythmey.com