COVID-19
ជាតិ
រដ្ឋាភិបាលបន្តជួយ និងអនុគ្រោះដល់វិស័យកាត់ដេរ ទេសចរណ៍ និងអាកាសចរណ៍ពីរខែទៀត
សណ្ឋាគារអប្សរាអង្គរក្នុងខេត្តសៀមរាបដែលបានប្រកាសបិទទ្វារនាដើមឆ្នាំ២០២០។
×![]()
ដោយ: ឡាយ សុភាវតី
ភ្នំពេញ៖ រដ្ឋាភិបាលបន្តជួយឧបត្ថម្ភប្រាក់ និងលើកលែងការបង់ពន្ធប្រចាំខែចំនួនពីរខែបន្តទៀត សម្រាប់ខែសីហានិងកញ្ញា ដល់វិស័យកាត់ដេរ ទេសចរណ៍ និងអាកាសចរណ៍ នៅកម្ពុជាដែលរងផលប៉ះពាល់មិនទាន់ងើបឡើងវិញ ដោយសារវិបត្តិកូវីដ-១៩។
ដើម្បីជួយសម្រាលបន្ទុកប្រចាំថ្ងៃរបស់កម្មករនិយោជិតក្នុងវិស័យកាត់ដេរនិងទេសចរណ៍ រដ្ឋាភិបាលបានសម្រេចបន្តបើកប្រាក់ឧត្ថម្ភសាច់ប្រាក់៤០ដុល្លារចំនួនពីរខែទៀត ដល់ម្ចាស់រោងចក្រឬក្រុមហ៊ុនណាដែលបានដាក់ពាក្យព្យួរការ។
ទន្ទឹមនឹងនេះ រដ្ឋាភិបាលក៏បានសម្រេចមិនយកពន្ធប្រចាំខែចំនួនពីរខែផលដែរ ពីម្ចាស់សណ្ឋាគារ ផ្ទះសំណាក់ ភោជនីយដ្ឋាន ក្រុមហ៊ុនភ្នាក់ងារទេសចរណ៍ និងក្រុមហ៊ុនទេសចរណ៍។ ប៉ុន្តែការលើកលែងពន្ធលើវិស័យទេសចរណ៍នេះ រដ្ឋាភិបាលលើកលែងដល់ម្ចាស់ទីតាំងណាដែលស្ថិតក្នុងរាធានីភ្នំពេញ, សៀមរាប, ព្រះសីហនុ, កែប, កំពត, ក្រុងបាវិត និងក្រុមប៉ោយប៉ែតប៉ុណ្ណោះ។ នេះបើតាមសេចក្ដីសម្រេចរដ្ឋាភិបាល ដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចជាតិ នៅក្នុងការស្ដារនិងជំរុញកំណើនសេដ្ឋកិច្ចជុំទី៥ ថ្ងៃទី៣១ កក្កដា។
គិតត្រឹមដើមខែឧសភា អាជីវកម្មក្នុងវិស័យទេសចរណ៍ជិត៣ពាន់ទីតាំងបានបិទនិងផ្អាកដំណើរការបណ្ដោះអាសន្ន ហើយក្នុងមានបុគ្គលិកជាង៤ម៉ឺន៥ពាន់នាក់បានរងផលប៉ះពាល់។ ចំណែកវិស័យកាត់ដេរ គិតត្រឹមដើមខែកក្កដា មានរោងចក្រប្រមាណ៤០០បានព្យួរការងារ និងប៉ះពាល់ដល់កម្មករប្រមាណ១៥ម៉ឺននាក់។ នេះបើតាមរបាយការណ៍របស់ក្រសួងទេសចរណ៍ និងសមាគមរោងចក្រកាត់ដេរនៅកម្ពុជា៕
Tag:
រដ្ឋាភិបាល
វិបត្តិកូវីដ-១៩
© រក្សាសិទ្ធិដោយ thmeythmey.com
