ចិនបញ្ជូនអ្នកជំនាញទៅហុងកុង ដើម្បីជួយធ្វើតេស្ត COVID-19 ទ្រង់ទ្រាយធំ

COVID-19

អន្តរជាតិ

ចិនបញ្ជូនអ្នកជំនាញទៅហុងកុង ដើម្បីជួយធ្វើតេស្ត COVID-19 ទ្រង់ទ្រាយធំ

02, Aug 2020 , 10:29 pm

រូបភាព

មន្ទីរពេទ្យបណ្តោះអាសន្នរបស់ហុងកុង ដែលស្ថិតនៅក្នុងមជ្ឈមណ្ឌល AsiaWorld Expo។ រូបភាព៖ Reuters

ដោយ: ធៀន ភារិន្ទ

មន្ត្រីសុខាភិបាលចិនចំនួន ៧នាក់ ត្រូវទៅដល់ហុងកុងនៅថ្ងៃទី២ ខែសីហា។ នេះបើតាមការប្រកាសរបស់គណៈកម្មការសុខាភិបាលជាតិចិន នៅថ្ងៃទី១ ខែសីហា។ មន្ត្រីទាំង៧នាក់នេះ គឺជាសមាជិកដំបូង នៃក្រុមអ្នកជំនាញសុខាភិបាលចិន ដែលមានចំនួន ៦០នាក់ ត្រូវបញ្ជូនទៅហុងកុង ដើម្បីជួយធ្វើតេស្តទ្រង់ទ្រាយធំនៅក្នុងតំបន់ស្វយ័តមួយនេះ។

អត្ថបទទាក់ទង

ប្រមុខហុងកុង ប្រកាសលើកពេលបោះឆ្នោតសភាហុងកុងទៅឆ្នាំក្រោយ

នាពេលកន្លងមក ប្រធានប្រតិបត្តិទីក្រុងហុងកុង លោកស្រីការី ឡាំ បានលើកឡើងថា ទីក្រុងហុងកុង គឺស្ថិតនៅលើមាត់ជ្រោះនៃការផ្ទុះCOVID-19 ទ្រង់ទ្រាយធំនៅក្នុងទីក្រុង។ ការប្រកាសបែបនេះ ធ្វើឡើងបន្ទាប់ពីហុងកុង មានករណីឆ្លងលើសពី១០០ករណី ក្នុងរយៈពេលជាច្រើនថ្ងៃជាប់គ្នា។ នៅថ្ងៃទី១ ខែសីហា ហុងកុង បានរាយការណ៍ថា មានករណីឆ្លងចំនួន ១២៥ករណី។ ករណីសរុបCOVID-19 នៅក្នុងទីក្រុង បានកើនដល់ ៣៣៩៨ករណី អ្នកស្លាប់មាន ៣៣នាក់ ខណៈអ្នកជាសះស្បើយមានចំនួន ១៨៥៨នាក់។

ដោយមើលឃើញថា ករណីឆ្លងកូរ៉ូណាវីរុសក្នុងទីក្រុងកាន់តែរីកធំឡើង ទីក្រុងហុងកុង បានស្នើសុំជំនួយពីរដ្ឋាភិបាលចិន ឲ្យជួយដោះស្រាយបញ្ហា។ លោកស្រីការី ឡាំ បានអះអាងបែបនេះ ដោយបន្ថែមថា រដ្ឋាភិបាលចិន កំពុងសិក្សា ថាតើត្រូវធ្វើតេស្តលើប្រជាជនហុងកុងគ្រប់រូប ឬយ៉ាងណា។ នេះបើតាមការចុះផ្សាយរបស់ទូរទស្សន៍ក្នុងស្រុកហុងកុង RTHK។

ក្រុមអ្នកជំនាញ ដែលបញ្ជូនមកពីចិននេះ មានសមាជិកខ្លះមកពីមន្ទីរពេទ្យសាធារណៈក្នុងខេត្ត ក្វាងទុង និងអ្នកជំនាញចំនួន ៦នាក់មកពីក្រុងវូហាន ដើម្បីជួយការងារមួយចំនួន នៅក្នុងមន្ទីរពេទ្យបណ្តោះអាសន្នរបស់ហុងកុង។ មន្ទីរពេទ្យបណ្តោះអាសន្ននេះ ធ្វើឡើងនៅក្នុងមជ្ឈមណ្ឌល AsiaWorld Expo។

យ៉ាងណាក៏ដោយ ប្រជាជនហុងកុងមួយចំនួន បារម្ភថា ការបញ្ជូនអ្នកជំនាញចិនមកហុងកុងលើកដំបូងនេះ គឺជាគ្រាន់តែជាលេសរបស់ទីក្រុងប៉េកាំង ដើម្បីប្រមូលយកគំរូ DNA របស់ប្រជាជនហុងកុង ក្នុងគោលបំណងយកការណ៍អ្វីមួយ។

សូមបញ្ជាក់ថា នាពេលកន្លងទៅ លោកស្រី ការី ឡាំ បានប្រកាស លើកពេលបោះឆ្នោតសភាហុងកុងទៅឆ្នាំក្រោយ ដោយផ្អែកលើហេតុផងថា ករណីCOVID-19 កំពុងកើនឡើង និងទប់ស្កាត់ការរាតត្បាតនៃជំងឺនេះ នៅក្នុងទីក្រុង៕