សង្គមអន្តរជាតិ
អន្តរជាតិ
លោក ត្រាំ ទុកពេល៦សប្ដាហ៍ឲ្យ TikTok លក់ប្រតិបត្តិការឲ្យក្រុមហ៊ុនអាមេរិក
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី៤ ខែសីហា បានប្រកាសទុកពេល៦សប្ដាហ៍ឲ្យកម្មវិធីវីដេអូខ្លីដ៏មានប្រជាប្រិយ TikTok ក្នុងការលក់ប្រតិបត្តិការរបស់ខ្លួននៅអាមេរិកទៅឲ្យក្រុមហ៊ុនអាមេរិក។ ក្រុមហ៊ុនបច្ចេកវិទ្យាដ៏ធំ Microsoft ជាអ្នកចាប់អារម្មណ៍លើការទិញប្រតិបត្តិការនេះ។ ផុត៦សប្ដាហ៍ហើយមិនទាន់មានការទិញលក់អ្វីនោះ លោក ត្រាំ បញ្ជាក់ថា TikTok លែងមាននៅអាមេរិកទៀតហើយ។ លើសពីនោះ លោក ត្រាំ ចង់បានចំណែកខ្លះពីការទិញលក់នេះចូលឃ្លាំងរដ្ឋដែរ។
សម្ពាធកាន់តែខ្លាំងធ្លាក់លើក្រុមហ៊ុន ByteDance ដែលជាម្ចាស់កម្មវិធីទូរសព្ទ TikTok ដ៏មានប្រជាប្រិយនៅទូទាំងពិភពលោក។ ប្រធានាធិបតីអាមេរិក ដូណាល់ ត្រាំ បានគំរាមជាថ្មីឲ្យក្រុមហ៊ុនចិនមួយនេះលក់ប្រតិបត្តិការនៅទឹកដីអាមេរិកឲ្យក្រុមហ៊ុនរបស់អាមេរិក ដោយពួកគេមានពេលដល់ពាក់កណ្ដាលខែកញ្ញាដើម្បីបញ្ចប់កុងត្រាទិញលក់ណាមួយ បើមិនដូច្នោះទេ គឺមិនអាចដំណើរការនៅទឹកដីអាមេរិកបានទៀតឡើយ។
«វាត្រូវតែជាក្រុមហ៊ុនអាមេរិក។ វាត្រូវតែកាន់កាប់ដោយអ្នកនៅទីនេះ។ យើងមិនចង់មានបញ្ហាសន្តិសុខឡើយ។» លោក ត្រាំ និយាយបែបនេះនៅថ្ងៃទី៣ ខែសីហា ដែលជាការលើកឡើងជាថ្មីក្ដីបារម្ភរបស់រដ្ឋបាលលោកពាក់ព័ន្ធកម្មវិធីរបស់ក្រុមហ៊ុនចិនមួយនេះ។ មន្ត្រីអាមេរិកបានព្រមានមិនដាច់ពីមាត់ពីលទ្ធភាពដែលទិន្នន័យអ្នកប្រើប្រាស់អាមេរិករាប់លាននាក់ អាចធ្លាក់ដល់ដៃរដ្ឋាភិបាលចិន ដែលធ្វើឲ្យមានគ្រោះថ្នាក់សម្រាប់សន្តិសុខអាមេរិក។
មេដឹកនាំអាមេរិក បញ្ជាក់ថា ក្រុមហ៊ុនបច្ចេកវិទ្យា Microsoft ស្ថិតក្នុងចរចាដើម្បីទិញ TikTok នៅអាមេរិក ហើយលោកទុកពេលដល់ថ្ងៃទី១៥ ខែកញ្ញាសម្រាប់ការបញ្ចប់កិច្ចព្រមព្រៀងទិញលក់រវាងក្រុមហ៊ុនអាមេរិក និង ByteDance ។ លោក ត្រាំ ព្រមានថា បើផុតឱសានវាទនេះ TikTok ត្រូវខ្ទាតចេញពីទីផ្សារអាមេរិក។
អ្វីគួរឲ្យភ្ញាក់ផ្អើលនោះ លោក ត្រាំ ក៏ឆ្លៀតដាក់លក្ខខណ្ឌមួយទៀត គឺក្រសួងរតនាគារអាមេរិក ត្រូវបានចំណែកមួយភាគនៃការទិញលក់នេះដែរ ព្រោះជាអ្នកដែលផ្ដើមគំនិត។ បើតាមលោក ត្រាំ បើរដ្ឋាភិបាលលោកមិនបើកផ្លូវឲ្យទេនោះ ការទិញលក់នេះ ក៏មិនអាចកើតមានដែរ ដូចនេះក៏ត្រូវមានចំណែកពីការលក់នេះដែរ។
រដ្ឋាភិបាលទីក្រុងប៉េកាំងឯណោះ ក៏បានប្រតិកម្មនឹងរឿងនេះដែរ។ អ្នកនាំពាក្យក្រសួងការបរទេសចិន Wang Wenbin នៅថ្ងៃទី៣ ខែកក្កដា បានហៅទីក្រុងវ៉ាស៊ីនតោនថា លាក់ពុត ហើយកំពុងបំពានគោលការណ៍សន្តិសុខជាតិ។ ក្នុងសន្និសីទសារព័ត៌មានប្រចាំថ្ងៃ លោក Wang លើកឡើងថា អ្វីដែលអាមេរិកធ្វើ គឺផ្ទុយពីគោលការណ៍សេដ្ឋកិច្ចទីផ្សារ បង្ហាញពីការលាក់ពុត និងស្តង់ដារពីរជាន់នូវអ្វីដែលខ្លួនធ្លាប់ហៅថា សេរីភាព និងយុត្តិធម៌៕
Tag:
អាមេរិក
TikTok
ដូណាល់ ត្រាំ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
