ក្រសួងសុខាភិបាលវៀតណាម បានរាយការណ៍ពីករណីឆ្លង COVID-19 ថ្មីចំនួន ២០ករណីបន្ថែមទៀត។ ក្នុងចំណោម ២០ករណីថ្មីនេះ មាន ១៩ករណីទាក់ទិននឹងករណីឆ្លងក្នុងទីក្រុងដាណាង និង ១ករណី ទៀត គឺជាករណីនាំចូលពីបរទេស។
តាមរយៈសេចក្តីប្រកាសរបស់ក្រសួងសុខាភិបាលវៀតណាម នៅល្ងាចថ្ងៃទី៤ ខែសីហា អាជ្ញាធរបានរាយការណ៍ថា មានករណីឆ្លងចំនួន ១៨ករណីថ្មី ហើយនៅព្រឹកថ្ងៃទី៥ ខែសីហា មានពីរករណីថ្មីបន្ថែមទៀត។ តួលេខសរុបCOVID-19 នៅវៀតណាម បានកើនដល់ ៦៧២ករណី និងអ្នកស្លាប់មានចំនួន ៨នាក់។ ចំណែកអ្នកជាសះស្បើយមានចំនួន ៣៧៨នាក់។
ពាក់ព័ន្ធនឹងការកើនឡើងករណីឆ្លង COVID-19នេះ នាយករដ្ឋមន្ត្រីវៀតណាម លោក ង្វៀន ស៊ួនហ្វុក នៅថ្ងៃទី៣ ខែសីហា បានជំរុញឲ្យប្រជាជនរក្សាគម្លាតសុវត្ថិភាព ដើម្បីទប់ស្កាត់ការរាតត្បាត COVID-19 នៅក្នុងប្រទេស។ លើសពីនេះ ប្រមុខរដ្ឋាភិបាលវៀតណាមរូបនេះ ក៏បានសង្កត់ធ្ងន់ផងដែរថា អាជ្ញាធរថ្នាក់ស្រុក ត្រូវតែសម្រេចពីយុទ្ធសាស្ត្រមួយចំនួន ដើម្បីប្រយុទ្ធជាមួយ COVID-19។
ចំណែកទីក្រុងហាណូយវិញ នៅថ្ងៃទី៤ ខែសីហា បានបញ្ជាក់ថា កំពុងខ្វះសម្ភារធ្វើតេស្តរក COVID-19 លឿន ដើម្បីបន្តធ្វើតេស្តទ្រង់ទ្រាយធំលើប្រជាជនមកពីដាណាង។ ក្នុងចំណោមប្រជាជន ៨៨០០០នាក់ ដែលត្រលប់មកពីក្រុងដាណាងតាំងពីថ្ងៃទី៨ ខែសីហា អាជ្ញាធរបានធ្វើតេស្ត បានត្រឹមតែ៧០៦៨៩នាក់ប៉ុណ្ណោះ ព្រោះដោយសារខ្វះខាតឧបករណ៍ធ្វើតេស្តលឿន។ អាជ្ញាធរក្រុងហាណូយ បានបញ្ជាក់បែបនេះ។
វិទ្យាស្ថានវេជ្ជសាស្ត្រ និងមន្ទីរពេទ្យក្រុងហាណូយ គឺជាអ្នកទទួលបន្ទុក និងពន្លឿនការផលិតឧបករណ៍ធ្វើតេស្តចេញលទ្ធផលលឿននេះ។ យ៉ាងណាក៏ដោយ ឧបករណ៍ធ្វើតេស្តប្រភេទេនេះ អាចចេញលទ្ធផលមិនត្រឹមត្រូវ។
ឧបករណ៍ធ្វើតេស្តCOVID-19 ដែលត្រឹមត្រូវជាង គឺជាឧបករណ៍ធ្វើតេស្ត COVID-19 ប្រភេទ PCR ដែលធ្វើតេស្តរក COVID-19 តាមរយៈកំហាកបំពង់ក និងនៅច្រមុះ។ បើតាមការបញ្ជាក់របស់ប្រធានក្រុមហ៊ុនViet A Corp ដែលជាក្រុមហ៊ុនផលិតឧបករណ៍ធ្វើតេស្ត PCR វៀតណាមមិនខ្វះឡើយឧបករណ៍ធ្វើតេស្តCOVID-19 ហើយក្រុមហ៊ុនរបស់លោក មានឧបករណ៍គ្រប់គ្រាន់សម្រាប់ការធ្វើតេស្ត ២លានដង។
សូមបញ្ជាក់ថា បន្ទាប់ពីរកឃើញករណីឆ្លងCOVID-19 នៅក្នុងទីក្រុងដាណាង រដ្ឋាភិបាលវៀតណាម បានបញ្ជាឲ្យមន្ត្រីត្រួតពិនិត្យតាមព្រំដែន ឃ្លាំមើលឲ្យម៉ត់ចត់ ដើម្បីការពារជនអន្តោប្រវេសន៍ខុសច្បាប់ចូលក្នុងប្រទេស ព្រោះនេះអាចជាប្រភពមួយនៃករណីឆ្លងនៅក្នុងទីក្រុងដាណាង។
នៅថ្ងៃទី៤ ខែសីហា មនុស្សចំនួន ៦នាក់ ត្រូវបានតុលាការវៀតណាម កាត់ទោសឲ្យជាប់ពន្ធនាគារ ២ឆ្នាំ និង៦ឆ្នាំ ពីបទរៀបចំឲ្យជនជាតិចិនចូលមកក្នុងវៀតណាមខុសច្បាប់៕