ពីនេះ ពីនោះ
សុខភាព
ប្រយ័ត្ន! យប់ជ្រៅហើយ គួរកុំទទួលទានអាហារទាំងនេះ
× ភាគច្រើននៃពួកយើងយល់ស្របថាវាពិបាកណាស់ក្នុងការទ្រាំមិនទទួលទានអាហារនៅពេលកំពុងឃ្លាន ជាពិសេសនៅពេលយប់។ ទោះជាយ៉ាងណាអាហារមួយចំនួនអាចជះផលប៉ះពាល់គួរឱ្យបារម្ភដូចជាកើនទម្ងន់ ព្រមទាំងអាការៈច្រាលទឹកអាស៊ីតក្រពះ (ក្រហាយទ្រូងនិងឈឺបំពងក) នៅពេលទទួលទានក្នុងកំឡុងពេលយប់។ ថាតើអាហារទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកមិនគួរទទួលទានពេលយប់ ៖
១. អាហារសម្បូរខ្លាញ់
អាហារដែលមានផ្ទុកសម្បូរទៅដោយជាតិខ្លាញ់នឹងមិនត្រឹមតែធ្វើឱ្យអ្នកមានអារម្មណ៍អស់កម្លាំងនៅពេលក្រោកឡើងប៉ុណ្ណោះទេ ប៉ុន្តែក៏ជះឥទ្ធិពលអវិជ្ជមានលើប្រព័ន្ធរំលាយអាហាររបស់អ្នកផងដែរ។ អាហារប្រភេទនេះអាចបង្ខំឱ្យក្រពះធ្វើការកាន់តែខ្លាំងឡើងដើម្បីរំលាយគ្រប់យ៉ាង។ ហើយអ្នកនឹងមិនអាចគេងលក់បានស្កប់ ឬឆាប់គេងលក់ឡើយ ប្រសិនបើបន្តទទួលទានអាហារប្រភេទនេះនៅពេលយប់ទៀត។
២. គ្រាប់ធញ្ញជាតិ
នេះក៏ព្រោះតែក្រពះមិនអាចបែងចែករវាងខ្លាញ់ល្អនិងមិនល្អឡើយដោយវាប្រតិកម្មតបទៅខ្លាញ់ក្នុងរបៀបតែមួយ។ គ្រាប់ធញ្ញជាតិមានផ្ទុកសម្បូរទៅដោយអាស៊ីតខ្លាញ់ល្អ ប៉ុន្តែមិនមែនជាអាហារសម្រន់ដ៏ប្រសើរដែលគួរត្រូវបានទទួលទាននៅពេលយប់ឡើយដោយវាអាចបណ្ដាលឱ្យហើម ឬទល់លាមកនៅថ្ងៃបន្ទាប់។
៣. សូកូឡា
ការទទួលទានសូកូឡានៅពេលយប់គឺមិនល្អសោះឡើយចំពោះការគេង។ នោះក៏ព្រោះតែសូកូឡាមានផ្ទុកទាំងជាតិកាហ្វេអ៊ីននិងសារធាតុ theobromine ដែលផ្ដល់ការរំញោចដល់ខួរក្បាលធ្វើឱ្យអ្នកមានអារម្មណ៍ស្វាងមិនងងុយ។
៤. គ្រឿងស្រវឹង
ភេសជ្ជៈនេះងាយនឹងបង្កើនហានិភ័យនៃបញ្ហាច្រាលទឹកអាស៊ីតក្រពះណាស់។ ម្យ៉ាងវិញទៀតនៅពេលអ្នកស្រវឹង គឺអ្នកងាយនឹងជួបប្រទះអាការៈគេងមិនស្ងប់ ហើយថែមទាំងបណ្ដាលឱ្យមិនស្រួលខ្លួន គ្មានកម្លាំង និងមិនស្រស់ស្រាយក្នុងអារម្មណ៍នៅព្រឹកបន្ទាប់ទៀតផង។
៥. កាហ្វេ
លើកលែងតែគ្មានជាតិកាហ្វេអ៊ីន! ប្រសិនបើអ្នកទទួលទានកាហ្វេនៅមុនពេលចូលគេងនោះអ្នកអាចនឹងជួបប្រទះបញ្ហាគេងមិនលក់ជាមិនខាន។ នោះក៏ព្រោះតែជាតិកាហ្វេអ៊ីនក្នុងកាហ្វេរំញោចដល់ភាពសកម្មនៃខួរក្បាលដែលនឹងធ្វើអោយអ្នកមានអារម្មណ៍ស្វាងមិនងងុយគេង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com