មន្ត្រី​គ្រប់គ្រង​ឃ្លាំង​ផែ​បេ​រូត ត្រូវ​ឃុំ​ក្នុងផ្ទះ ឯ​ទំហំ​ខូចខាត​មាន​ដល់​១៥​ពាន់​លាន​ដុល្លារ​
សង្គមអន្តរជាតិ​
អន្តរជាតិ
មន្ត្រី​គ្រប់គ្រង​ឃ្លាំង​ផែ​បេ​រូត ត្រូវ​ឃុំ​ក្នុងផ្ទះ ឯ​ទំហំ​ខូចខាត​មាន​ដល់​១៥​ពាន់​លាន​ដុល្លារ​
06, Aug 2020 , 11:50 am        
រូបភាព
រូបភាព៖ AFP
រូបភាព៖ AFP
​បុគ្គល​ដែល​ទទួលខុសត្រូវ​លើ​ឃ្លាំង​ស្តុក​ក្នុង​កំពង់ផែ​ទីក្រុង​បេ​រូត នឹងដាក់​ក្រោម​ការឃុំខ្លួន​ក្នុងផ្ទះ​ឲ្យ​បាន​ឆាប់​បំផុត​។ រដ្ឋាភិបាល​លី​បង់ បានប្រកាស​បែបនេះ​នៅ​ថ្ងៃទី​៥ ខែសីហា បន្ទាប់ពី​មាន​ករណី​ស្លាប់ និង​របួស​ជាច្រើន​នាក់ ដោយសារ​ការផ្ទុះ​នៅក្នុង​ទីក្រុង​បេ​រូត​។

 
​ករណី​ផ្ទុះ​នៅក្នុង​ទីក្រុង​បេ​រូត បាន​បង្ក​ឲ្យ​មនុស្ស​ស្លាប់​យ៉ាងហោចណាស់ ១៣៥​នាក់ និង​របួស​ប្រមាណ ៥​ពាន់​នាក់ ខណៈ​មនុស្ស​ច្រើនជាង ៣០​ម៉ឺន បាន​បាត់បង់​ផ្ទះសម្បែង​។ បើតាម​ការអះអាង​រប​ស់​អភិបាលក្រុង​បេ​រូត ទ្រព្យសម្បត្តិ​នៅក្នុង​ទីក្រុង ត្រូវបាន​បំផ្លាញ​អស់​ចន្លោះ​ពី ១០​ពាន់​លាន​ដុល្លារ​ទៅ ១៥​ពាន់​លាន​ដុល្លារ​។ បន្ថែម​ពីលើ​នេះ ទីក្រុង​បេ​រូត ត្រូវដាក់​ជា «​ទីក្រុង​មហន្តរាយ​» រយៈពេល​ពីរ​សប្តាហ៍ និង​កាន់ទុក្ខ​រយៈពេល ៣​ថ្ងៃ​ទូទាំងប្រទេស​។ 
 
​ពាក់ព័ន្ធ​ករណី​ផ្ទុះ​នេះ រដ្ឋាភិបាល​លី​បង់ បាន​បញ្ជា​ឲ្យ​ឃុំខ្លួន​មន្ត្រី​ទទួលខុសត្រូវ​ឃ្លាំង​ស្តុក​ក្នុង​កំពង់ផែ នៅក្នុង​ផ្ទះ​ឲ្យ​បាន​ឆាប់​បំផុត​។​នេះ​បើតាម​ការផ្សាយ​របស់​ទូ​រ​ទស្សន៍ AL Jazeera ។  ការបញ្ជា​នេះ ធ្វើឡើង​ស្របពេល​ប្រជាជន​លី​បង់ បាន​ផ្ទុះ​កំហឹង និង​ចោទ​ជា​សំណួរ​យ៉ាងខ្លាំង​ជុំវិញ​ការ​ស្តុក​សារធាតុ​គីមី​អា​ម៉ូ​ញ៉ូ​មនី​ត្រា​តដល់​ទៅ​២៧០០​តោន នៅក្នុង​កំពង់ផែ​បេ​រូត ដែល​ស្ថិត​នៅក្បែរ​ទីប្រជុំជន ចាប់តាំងពី​ឆ្នាំ​២០១៤​មក​។ លើសពីនេះ​រដ្ឋាភិបាល​លី​បង់ ក៏បាន​ចាប់ផ្តើម​បើក​ការស៊ើបអង្កេត ដើម្បី​ស្វែងរក​មូលហេតុ ដែល​បណ្តាល​ឲ្យ​ផ្ទុះ​នៅក្នុង​ទីក្រុង​បេ​រូត​ផងដែរ​។ 
​មកទល់ពេលនេះ ក្រុម​ជួយសង្គ្រោះ និង​អាជ្ញាធរ​លី​បង់ កំពុង​ជីក​កកាយ​សំណង់​បាក់បែក និង​គំនរ​មួយចំនួន ដើម្បី​ជួយ​ប្រជាជន​ជាច្រើន ដែល​កំពុង​ជាប់​ក្នុងនោះ​។ 
 
​ប្រធានាធិបតី​បារាំង លោក អេ​ម៉ា​នុយ​អ៊ែ​ល ម៉ា​ក្រុង នៅ​ថ្ងៃទី​៦ ខែសីហា ក៏​នឹងធ្វើ​ដំណើរ​ទស្សនកិច្ច​ទៅ​លី​បង់ ដែល​ធ្វើ​ឲ្យ​លោក​ក្លាយជា​មេដឹកនាំ​បរទេស​ដំបូង​គេ​បំផុត​ទៅកាន់​អតីត​រដ្ឋ​ក្រោម​អាណានិគម​មួយ​នេះ បន្ទាប់ពី​មាន​ករណី​ផ្ទុះ​បាន​ពីរ​ថ្ងៃ​។ លោក​គ្រោង​ជួប​ជាមួយ​មេដឹកនាំ​លី​បង់ ដើម្បី​ជជែក​ពី​បញ្ហា​ផ្ទុះ​នេះ​។ បារាំង​បាន​បញ្ជូន​រួចហើយ​ជំនួយ​មួយចំនួន​មាន​សម្ភារ​វេជ្ជសាស្ត្រ និង​រថយន្ត​សង្គ្រោះ​អ្នករបួស​មួយគ្រឿង ព្រម​គ្នា​នឹង​ក្រុម​អ្នក​ជួយសង្គ្រោះ​ផងដែរ​។ 
 
​ករណី​ផ្ទុះ​ដ៏​ខ្លាំង​នេះ ត្រូវបាន​គេ​ទាមទារ​ឲ្យ​មានការ​ស៊ើបអង្កេត​ឯករាជ្យ​មួយ​។ ទាក់ទិន​នឹង​បញ្ហា​នេះ អង្គការ​លើកលែងទោស​អន្តរជាតិ ទាមទារ​ឲ្យ​បង្កើត​ក្រុម​ស៊ើបអង្កេត​មួយ ដើម្បី​ស្វែងរក​ប្រភព ដែល​បង្ក​ឲ្យ​មាន​បញ្ហា​នេះ​។ លើសពីនោះ អង្គការ​អន្តរជាតិ​មួយ​នេះ ក៏បាន​ទទូច​ឲ្យ​សហគមន៍​អន្តរជាតិ និង​ប្រទេស​មួយចំនួន ផ្តល់ជំនួយ​ឲ្យ​បាន​ឆាប់រហ័ស​ដល់​លី​បង់​ផងដែរ​។​
 
​ប្រទេស​ជាច្រើន ដូចជា​អាល្លឺម៉ង់ អូស្ត្រាលី បារាំង រុស្ស៊ី បង់​ក្លា​ដែ​ស​ជាដើម បានប្រកាស​ផ្តល់ជំនួយ​ទៅ​ទៅ​លី​បង់​ជា​បន្តបន្ទាប់ ដើម្បី​ជួយ​សម្រាល​បន្ទុក​របស់​រដ្ឋាភិបាល​។ រដ្ឋ​មជ្ឈិមបូព៌ា​ដែល​នៅ​ជិត​លី​បង់​មាន​កាតា​ជាដើម ក៏បាន​បញ្ជូន​ជំនួយ​បន្ទាន់​ទៅ​ប្រទេស​នេះដែរ​៕

Tag:
 លី​បង់
© រក្សាសិទ្ធិដោយ thmeythmey.com