ពេទ្យកុមារអង្គរកាត់សេវាព្យាបាលកុមារមួយផ្នែកធំដោយសារវិបត្តិកូវីដ១៩

ជាតិ

ពេទ្យកុមារអង្គរកាត់សេវាព្យាបាលកុមារមួយផ្នែកធំដោយសារវិបត្តិកូវីដ១៩

06, Aug 2020 , 9:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ វិបត្តិជំងឺកូវីដ១៩ ធ្វើឱ្យរាំងស្ទះដល់ការរៃអង្គាសថវិកាពីក្រៅប្រទេស ដែលជាជំនួយដ៏ធំសម្រាប់ប្រតិបត្តិការក្នុងមន្ទីរពេទ្យកុមារអង្គរខេត្តសៀមរាប។ ក្រៅពីនេះ ជំនួយក្នុងស្រុកក៏ធ្លាក់ចុះ ធ្វើឱ្យថ្នាក់ដឹកនាំមន្ទីរពេទ្យកុមារអង្គរ ច្របូកច្របល់ បារម្ភពីអនាគតនៃមន្ទីរពេទ្យដែលចាប់កំណើតតាំងពីឆ្នាំ១៩៩៩ មួយនេះ។ ក្នុងកាលៈទេសៈដ៏លំបាកនេះ មន្ទីរពេទ្យបានប្រកាសពីគម្រោងកាត់បន្ថយសេវាព្យាបាល ហើយផ្នែកខ្លះអាចកាត់បន្ថយការទទួលព្យាបាលកុមារពី២០ទៅ៥០ភាគរយ។

ព័ត៌មានពិស្ដារ សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ

ខុសពីតំបន់ដទៃ ដែលបង្ហាញពីភាពស្ងប់ស្ងាត់ដោយសារវិបត្តិជំងឺកូវីដ១៩ដ៏អាក្រក់នេះ តែកុមារតូចធំជាច្រើនបានចេញចូលសម្រាកព្យាបាលជំងឺក្នុងមន្ទីរពេទ្យកុមារអង្គរមិនថមថយសោះ។ មន្ទីរពេទ្យនេះ នៅតែទទួលបានអ្នកជំងឺមិនក្រោម៥០០នាក់ឡើយជាប្រចាំថ្ងៃ ដែលបរិយាកាសនេះខុសពីបរិយាកាសក្នុងការិយាល័យរបស់ថ្នាក់ដឹកនាំមន្ទីរពេទ្យ ដែលមានក្ដីបារម្ភចំពោះថវិកាសម្រាប់ប្រតិបត្តិការ។

និយាយលាយឡំនឹងក្ដីបារម្ភជាមួយអនាគតរបស់មន្ទីរពេទ្យ លោក ងួន ច័ន្ទភក្ដ្រា ដែលជានាយកមន្ទីរពេទ្យ ឱ្យដឹងថា វិបត្តិជំងឺកូវីដ១៩ ធ្វើឱ្យប៉ះពាល់ដល់កញ្ចប់ថវិកាប្រចាំឆ្នាំដែលបានគ្រោងទុក។ វិបត្តិនេះ ធ្វើឱ្យមន្ទីរពេទ្យពិបាករកថវិកាជាខ្លាំង ទាំងជំនួយខាងក្រៅនិងក្នុងស្រុក សុទ្ធតែមានកម្រិតទាបជាងអ្វីដែលរំពឹងទុក។ ក្រៅពីបន្តព្យាយាមរកថវិកាសម្រាប់បង្គ្រប់ការចំណាយក្នុងឆ្នាំ២០២០នេះ លោក ច័ន្ទភក្ដ្រា ប្រាប់ថា មន្ទីរពេទ្យព្យាយាមកាត់បន្ថយអ្វីដែលមិនចាំបាច់ ដោយធ្វើយ៉ាងណាអាចឱ្យខ្លួនបន្តប្រតិបត្តិការព្យាបាលកុមារតទៅមុខទៀត។
លោកបន្តថា៖« យើងនឹងអំពាវនាវដល់សប្បុរសជនខាងក្រៅ ដើម្បីជួយប្រតិបត្តិការឆ្នាំនេះ ព្រោះឆ្នាំនេះយើងមិនអាចមានលទ្ធភាពក្នុងការរកថវិកាបង្គ្រប់ថវិកាចំណាយក្នុងឆ្នាំ២០២០ទេ ដូច្នេះយើងទម្លាក់ពី (គម្រោងថិវកា) ពី៦,៥លានដុល្លារ មកត្រឹម ៥,៥លាន ដើម្បីដំណើរការមន្ទីរពេទ្យ...សំខាន់បំផុតគឺបញ្ហា២០២១ ដែលប្រឈមបញ្ហាកូវីដ១៩ វាអាចបន្តប៉ះពាល់ដល់ឆ្នាំ ២០២១, ២០២២...»។

សេវាព្យាបាលមួយចំនួន នឹងត្រូវកាត់បន្ថយ ដោយកំណត់ចំនួនអ្នកមកទទួលសេវាព្យាបាលក្នុងបរិមាណសមស្រប តាមលទ្ធភាពរបស់មន្ទីរពេទ្យ។ លោក ច័ន្ទភក្ដ្រា ពន្យល់ថា មន្ទីរពេទ្យសម្រេចកាត់បន្ថយសេវាព្យាបាលចាប់ពីចុងឆ្នាំនេះទៅ តាមថវិកាដែលខ្វះខាតសម្រាប់ចាយឆ្នាំនេះ ក៏ដូចជាសន្សំខ្លះសម្រាប់ប្រតិបត្តិការនៅឆ្នាំ២០២១។ ចង់មិនចង់ លោកនាយកប្រតិបត្តិអះអាងថា វានឹងប៉ះពាល់ដល់ការព្យាបាលកុមារ ហើយផ្នែកព្យាបាលនីមួយៗប្រឈមនឹងការកាត់សេវាព្យាបាលពី២០ទៅ៥០ភាគរយ។

ក្រៅពីការប្រឈមកាត់បន្ថយលើសេវាព្យាបាលហើយនោះ លោក ច័ន្ទភក្ដ្រា បង្ហើបថា នឹងអាចប៉ះពាល់ដល់ផ្នែកបុគ្គលិកផងដែរ។ លោកពន្យល់ថា បុគ្គលិកមួយចំនួននឹងត្រូវកាត់បន្ថយម៉ោងធ្វើការ ប្រាក់ខែ ហើយមន្ទីរពេទ្យពុំមានគោលការណ៍រើសបុគ្គលិកថ្មីបន្ថែមជំនួសបុគ្គលិកដែលសុំឈប់ទៀតទេ តែយ៉ាងណានាយកប្រតិបត្តិរូបនេះអះអាងថា មន្ទីរពេទ្យនឹងមិនបញ្ឈប់បុគ្គលិកនោះទេ គ្រាន់តែកាត់បន្ថយប្រាក់ខែក្នុងកម្រិតណាមួយប៉ុណ្ណោះ ដើម្បីឱ្យមន្ទីរពេទ្យបន្តប្រតិបត្តិការតទៅមុខទៀត។

ជាប្រចាំឆ្នាំ មន្ទីរពេទ្យកុមារអង្គរត្រូវការថវិកាចំនួន ៦,៥លានដុល្លារ ដែលក្នុងនោះ ៨៥ភាគរយ ពឹងលើជំនួយរៃអង្គាសពីសប្បុរសជនក្រៅស្រុក ១០ភាគរយពឹងលើសប្បុរសជនក្នុងស្រុក និង៥ភាគរយទៀតពឹងលើកញ្ចប់ថវិកាពីរាជរដ្ឋាភិបាល។ នៅឆ្នាំ២០១៩ ការប្រមូលថវិកាក្នុងស្រុកបានកើនជាលំដាប់ គឺទទួលបានរហូត១លានដុល្លារ។ មន្ទីរពេទ្យកុមារអង្គរ បានព្យាយាមធ្វើឱ្យមន្ទីរពេទ្យមាននិរន្តរភាព ដោយព្យាយាមកាត់បន្ថយជំនួយពីក្រៅស្រុក និងដាក់ផែនការធ្វើយ៉ាងណាឱ្យការរៃអង្គាសពីក្នុងនិងក្រៅស្រុក មានសមតុល្យគ្នា គឺ៥០ភាគរយស្មើគ្នា។ ក្នុងស្រុក មន្ទីរពេទ្យមួយនេះមានក្ដីរំពឹងថា នឹងអាចបញ្ចុះបញ្ចូលឱ្យអ្នកមានធនធានមួយចំនួន ជួយលើការងារនេះបានកាន់តែច្រើន។ លើនិរន្ដរភាពមន្ទីរពេទ្យនេះដែរ ពិសេសក្នុងកាលៈទេសៈជំងឺកូវីដ១៩នេះ មន្ទីរពេទ្យកុមារអង្គរ ស្នើសុំកិច្ចគាំទ្រពីមន្ទីរសុខាភិបាល និងរដ្ឋបាលខេត្ត ជួយគាំទ្រកម្មវិធីវិភាគទានពីគ្រួសារអ្នកជំងឺ តាមលទ្ធភាពដែលអាចជួយបាន។ យ៉ាងណា លោក ច័ន្ទភក្ដ្រា អះអាងថា សកម្មភាពនិងទស្សនៈវិស័យមន្ទីរពេទ្យនៅដដែល គឺទទួលព្យាបាលកុមារកម្ពុជាដោយឥតគិតថ្លៃ ពិសេសកុមារក្រីក្រ។

កំពុងអង្គុយលើគ្រែជាមួយកូនស្រីដែលមានជំងឺពកក អ្នកស្រី ហម អាវ មកពីស្រុកឯកភ្នំ ខេត្តបាត់ដំបង បានមកសម្រាកព្យាបាលក្នុងមន្ទីរពេទ្យកុមារអង្គរជាង១០ថ្ងៃមកហើយ។ កំឡុងពេលស្នាក់នៅក្នុងមន្ទីរពេទ្យ ក្រៅពីទទួលបានសេវាព្យាបាលដ៏ល្អហើយនោះ អ្នកស្រី ហម អាវ ប្រាប់ថា ខ្លួនទទួលបានអង្ករ និងម្ហូបអាហារមួយចំនួនជាប្រចាំថ្ងៃពីមន្ទីរពេទ្យទៀត។ ជាអ្នកខ្វះខាត គ្មានលទ្ធភាពយកកូនទៅព្យាបាលជំងឺនៅកន្លែងឯកជន អ្នកស្រី ហម អាវ បានសម្ដែងការដឹងគុណដល់មន្ទីរពេទ្យកុមារអង្គរជាខ្លាំង ដែលបានជួយព្យាបាលកូនស្រីក្នុងកាលៈទេសៈនេះ។

ចំណែកលោក សាន់ ឆ័យ អាយុ៣៦ឆ្នាំ ដែលឧស្សាហ៍នាំកូនតូចលោកមកព្យាបាលជំងឺក្នុងមន្ទីរពេទ្យកុមារអង្គរ ទោះបីត្រូវធ្វើដំណើរពីស្រុកកំរៀង នៃខេត្តបាត់ដំបង យ៉ាងណាក្ដី។ លោកប្រាប់ថា កូនតូចៗរបស់លោកបានសះស្បើយពីជំងឺដោយសារការមើលថែទាំ និងដាក់ថ្នាំល្អពីក្រុមគ្រូពេទ្យ ពិសេសក្រុមគ្រូពេទ្យមានក្រមសីលធម៌ និងឥរិយាបថទន់ភ្លន់មកលើគ្រួសារអ្នកជំងឺ។

នៅក្បែរនោះ គឺអ្នកស្រី ខាន់ ស្រីវីន ដែលកំពុងអង្គុយក្បែរគ្រែកូនកំពុងគេងលក់ស្ងប់ដោយសារអាការៈជំងឺក្ដៅខ្លាំង។ អ្នកស្រីប្រាប់ថា ការមកទទួលសេវាព្យាបាលនៅទីនេះដោយសារការជឿជាក់លើក្រុមគ្រូពេទ្យ ណាមួយដោយសារជីវភាពខ្វះខាត។ ក្នុងនាមជាពលរដ្ឋមួយរូប អ្នកស្រីសំណូមពរដល់ប្រជាពលរដ្ឋទាំងអស់ សូមជួយដល់មន្ទីរពេទ្យកុមារអង្គរទៅតាមលទ្ធភាព ដើម្បីឱ្យមន្ទីរពេទ្យអាចបន្តការព្យាបាលកុមារទៅថ្ងៃមុខទៀត៕