កីឡាអន្តរជាតិ
អន្តរជាតិ
បុរសម្នាក់សុខចិត្តអស់ឱកាសឈ្នះរង្វាន់ ព្រោះមិនចង់ហៅឈ្មោះក្លិបបាល់ទាត់ដែលខ្លួនស្អប់
× អ្នកគាំទ្រម្នាក់របស់ក្លិប Borussia Monchengladbach បានបដិសេធហៅឈ្មោះក្លិប FC Cologne នាការប្រកួតប្រជែងសំណួរ-ចម្លើយក្នុងកម្មវិធីទូរទស្សន៍ ARD ដ៏ល្បីល្បាញរបស់អាល្លឺម៉ង់កាលពីពេលថ្មីៗកន្លងមក។ ករណីបានធ្វើឲ្យគាត់ខាតបង់ឱកាសឈ្នះរង្វាន់៥០០អឺរ៉ូ។
«ទេ! ខ្ញុំមិនហៅឈ្មោះក្លិបនេះឡើយ»។ អ្នកគាំទ្រជនជាតិអាល្លឺម៉ង់បានបញ្ជាក់ប្រាប់ទៅពិធីករក្នុងកម្មវិធីទូរទស្សន៍ ARD ទាក់ទងនឹងសំណួរវប្បធម៌ទូទៅដែលសួរថា៖ «តើក្លិបមួយណាដែលឈ្នះជើងឯកក្របខណ្ឌទីពីរ [2. Bundesliga] រដូវកាល២០១៨-២០១៩? » ។
បេក្ខជនដែលជាអ្នកគាំទ្របាល់ទាត់ដ៏ងប់ងងុលរូបនោះ បានអះអាងថា ខ្លួនដឹងច្បាស់ពីចម្លើយ ប៉ុន្តែដាច់ខាតមិនឆ្លើយនោះឡើយ ដោយសុខចិត្តខាតបង់ឱកាសឈ្នះប្រាក់រង្វាន់៥០០អឺរ៉ូក្នុងកម្មវិធីទូរទស្សន៍នោះ។
តាមការផ្សាយរបស់ SOFOOT.COM បុរសដែលគាំទ្រក្លិប Monchengladbach បានអះអាងថា ភាពស្មោះត្រង់ចំពោះក្លិបមានតម្លៃលើសពីលុយទៅទៀតក្នុងជីវិតរបស់ខ្លួន។
Monchengladbach និង FC Cologne ដែលស្ថិតនៅភាគខាងលិចអាល្លឺម៉ង់ ជាក្លិបដែលប្រឈមគ្នាអស់រយៈពេលជាច្រើនឆ្នាំ។ បញ្ហាជាច្រើន រួមទាំងក្នុងក្របខណ្ឌ Bundesliga តែងតែកើតឡើងនៅពេលដែលក្លិបទាំងពីរប៉ះគ្នា។
ការសម្រេចមិននិយាយឈ្មោះក្លិប FC Cologne ធ្វើឲ្យបេក្ខជនខាតបង់ឱកាសឈ្នះ៥០០អឺរ៉ូ ដោយចាកចេញពីកម្មវិធីជាមួយនឹងទឹកប្រាក់២៥០០អឺរ៉ូប៉ុណ្ណោះ។ ប្រសិនបើគាត់ឆ្លើយសំណួរខាងលើ គាត់អាចឈានទៅវគ្គបន្ត ហើយថែមទាំងមានឱកាសឈ្នះប្រាក់រង្វាន់ច្រើនជាងនេះ។
តាមរយៈ Twitter របស់ខ្លួន ក្លិប Monchengladbach បានសន្យាផ្តល់ការលើកទឹកចិត្តចំពោះភក្តីភាពរបស់អ្នកគាំទ្រខ្លួន។ ជាមួយនឹងសារលើកទឹកចិត្ត ក៏មានការលើកឡើងថា ទង្វើនេះ មិនមានជាគំរូឡើយ ដោយវាបង្ហាញពីការស្អប់ និងការរើសអើង៕
© រក្សាសិទ្ធិដោយ thmeythmey.com