សង្គមអន្តរជាតិ
អន្តរជាតិ
ចិន ថ្កោលទោសអាមេរិកដែលដាក់ទណ្ឌកម្មលើប្រមុខដឹកនាំហុងកុងនិងមន្ត្រីចិន
× រដ្ឋបាលប្រធានាធិបតីអាមេរិក ដូណាល់ ត្រាំ នៅថ្ងៃទី៧ ខែសីហា បានប្រកាសទណ្ឌកម្មលើមេដឹកនាំកំពូល និងមន្ត្រីសំខាន់ៗរបស់ហុងកុង ក៏ដូចជាមន្ត្រីចិនជាច្រើននាក់ចំពោះតួនាទីរបស់ពួកគេក្នុងការអនុវត្តច្បាប់សន្តិសុខជាតិដ៏ចម្រូងចម្រាស។ ការបង្កកទ្រព្យសម្បត្តិ និងការហាមឃាត់រកស៊ី ជាវិធានការប្រឆាំងមន្ត្រីហុងកុង និងចិនទាំងនេះ។ ចិន ប្រកាសថ្កោលទោស និងប្រឆាំងដាច់ខាតនឹងការដាក់ទណ្ឌកម្មបែបនេះ។
មន្ត្រីហុងកុងដែលត្រូវអាមេរិកដាក់ទណ្ឌកម្មមាន ប្រធានប្រតិបត្តិតំបន់រដ្ឋបាលពិសេស ការី ឡាំ រដ្ឋមន្ត្រីយុត្តិធម៌ សន្តិសុខ ស្នងការប៉ូលិសបច្ចុប្បន្ន និងអតីតស្នងការមុន។ ចំណែកមន្ត្រីចិនដែលរងទណ្ឌកម្មនេះដែរមាន លោក Luo Huining តំណាងចិនប្រចាំហុងកុង អនុប្រធានពីរនាក់នៃការិយាល័យកិច្ចការហុងកុងនិងម៉ាកាវនៃក្រុមប្រឹក្សារដ្ឋ និងប្រធានទីភ្នាក់ងារឃ្លាំងមើលការអនុវត្តច្បាប់សន្តិសុខជាតិនៅហុងកុង។
ក្នុងសេចក្ដីប្រកាសថ្ងៃទី៨ ខែសីហា ការិយាល័យទំនាក់ទំនងនៃក្រុមប្រឹក្សារដ្ឋចិន បានថ្កោលទោសទណ្ឌកម្មរបស់អាមេរិក ដោយចាត់ទុកជាទង្វើហួសហេតុ។ ការិយាល័យតំណាងរដ្ឋាភិបាលចិនដដែលនេះ បញ្ជាក់ច្បាស់ថា ចិនមិនខ្លាចសកម្មភាពហួសហេតុរបស់អាមេរិកឡើយ ហើយវាក៏មិនអាចផ្លាស់ប្ដូរជំហរចិនឲ្យស្របតាមអាមេរិកបានដែរ។
ទណ្ឌកម្មដែលប្រកាសដោយក្រសួងរតនាគារអាមេរិក អនុវត្តតាមបញ្ជាប្រតិបត្តិដែលប្រធានាធិបតីអាមេរិក ដូណាល់ ត្រាំ ចុះហត្ថលេខាកាលពីខែមុន។ មន្ត្រីហុងកុង និងចិនដែលជាប់ឈ្មោះទាំងអស់ នឹងត្រូវអាមេរិកបង្កកទ្រព្យសម្បត្តិដែលមាននៅអាមេរិក និងការហាមប្រាមការរកស៊ីជាមួយផងដែរ។
សម្រាប់អ្នកស្រី ការី ឡាំ អាមេរិកលើកហេតុផលដើម្បីទណ្ឌកម្មថា ជាអ្នកអនុវត្តគោលនយោបាយគាបសង្កត់សេរីភាព និងដំណើរការប្រជាធិបតេយ្យរបស់រដ្ឋាភិបាលប៉េកាំង។ សេចក្ដីប្រកាសព័ត៌មានរបស់ក្រសួងរតនាគារអាមេរិក បានចុចយកតួនាទីរបស់អ្នកស្រីក្នុងការប៉ុនប៉ងអនុម័តច្បាប់ធ្វើបត្យាប័ន និងសកម្មភាពថ្មីៗនេះក្នុងការអភិវឌ្ឍ អនុម័ត ឬអនុវត្តច្បាប់សន្តិសុខជាតិដែលសភាចិនអនុម័តកាលពីខែមិថុនាកន្លងទៅ។ ចំណែកមន្ត្រីឯទៀត ត្រូវបានអះអាងថា ដើរតួជាមន្ត្រីរបស់រដ្ឋាភិបាលដែលមានគោលនយោបាយ ឬសកម្មភាពដែលគំរាមសន្តិសុខ សន្តិសុខ ស្ថិរភាព និងស្វ័យភាពរបស់ហុងកុង។
រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ និយាយថា ចិនបានធ្វើសកម្មភាពដែលមិនអនុញ្ញាតឲ្យហុងកុងរីករាយនឹងស្វ័យភាពកម្រិតខ្ពស់ដែលចិនផ្ទាល់ជាអ្នកសន្យាឲ្យពលរដ្ឋហុងកុងសម្រាប់រយៈពេល៥០ឆ្នាំ។ ចំណែករដ្ឋមន្ត្រីរតនាគារ Steven Mnuchin បញ្ជាក់ថា អាមេរិកឈរជាមួយប្រជាជនហុងកុង ហើយអាមេរិកនឹងប្រើអំណាច និងឧបករណ៍ដែលខ្លួនមានដើម្បីកំណត់មុខសញ្ញាអ្នកបំផ្លាញស្វ័យភាពហុងកុង។
Tag:
ចិន
អាមេរិក
ហុងកុង
© រក្សាសិទ្ធិដោយ thmeythmey.com