មន្ត្រីអាមេរិក៖ រុស្ស៊ី និងអ៊ីរ៉ង់ នឹងលូកលាន់ការបោះឆ្នោតខែវិច្ឆិកា ឯចិនចង់ឲ្យលោក ត្រាំ ចាញ់

សង្គមអន្តរជាតិ

អន្តរជាតិ

មន្ត្រីអាមេរិក៖ រុស្ស៊ី និងអ៊ីរ៉ង់ នឹងលូកលាន់ការបោះឆ្នោតខែវិច្ឆិកា ឯចិនចង់ឲ្យលោក ត្រាំ ចាញ់

08, Aug 2020 , 9:29 pm

រូបភាព

លោក William Evanina នាយកមជ្ឈមណ្ឌលជាតិប្រឆាំងចារកម្ម និងសន្តិសុខអាមេរិក។ រូបភាព AFP

ដោយ: តន ចាន់រិទ្ធារ៉ា

មន្ត្រីជាន់ខ្ពស់ផ្នែកប្រឆាំងចារកម្មរបស់អាមេរិក William Evanina បានព្រមាននៅថ្ងៃទី៧ ខែសីហា ថា ចិន រុស្ស៊ី និងអ៊ីរ៉ង់ នឹងបង្កបញ្ហាដល់ការបោះឆ្នោតប្រធានាធិបតីអាមេរិក និងសភាដែលគ្រោងធ្វើនៅខែវិច្ឆិកាខាងមុខ។ លោក Evanina ថែមទាំងបញ្ជាក់ច្បាស់ថា ទីក្រុងមូស្គូ បានធ្វើសកម្មភាពរួចហើយក្នុងការបង្អាក់បេក្ខជនបក្សប្រជាធិបតេយ្យ ចូ បៃឌិន ដែលមានជំហរប្រឆាំងរុស្ស៊ី ខណៈចិនវិញចង់ឲ្យលោក ដូណាល់ ត្រាំ ចាញ់ឆ្នោត។

ក្នុងសេចក្ដីថ្លែងការណ៍ជាសាធារណៈដ៏កម្រមួយ លោក William Evanina ដែលជានាយកមជ្ឈមណ្ឌលជាតិប្រឆាំងចារកម្ម និងសន្តិសុខ អះអាងថា ចិន រុស្ស៊ី និងអ៊ីរ៉ង់ បានប្រើប្រាស់ប្រព័ន្ធអនឡាញដើម្បីចែកចាយព័ត៌មានមិនពិត សំដៅបង្កើតជាឥទ្ធិពលដល់ការសម្រេចចិត្តរបស់អ្នកបោះឆ្នោត បញ្ឆេះឲ្យមានអសណ្ដាប់ធ្នាប់ និងធ្វើឲ្យប៉ះពាល់ដល់ទំនុកចិត្តអ្នកបោះឆ្នោតអាមេរិកលើដំណើរការប្រជាធិបតេយ្យ។

«យើងវាយតម្លៃបានថា ចិនចង់ឲ្យប្រធានាធិបតី ដូណាល់ ត្រាំ ដែលខ្លួនចាត់ទុកជាមេដឹកនាំពិបាកស្មាន ចាញ់ការបោះឆ្នោត។» លោក Evanina បញ្ជាក់បែបនេះក្នុងសេចក្ដីថ្លែងការណ៍ថ្ងៃទី៧ ខែសីហា ដោយបន្ថែមថា ចិនបានពង្រីកឥទ្ធិពលមុនការបោះឆ្នោតថ្ងៃទី៣ ខែវិច្ឆិកា ក្នុងគោលដៅកែប្រែបរិយាកាសនយោបាយអាមេរិក, ដាក់សម្ពាធលើបុគ្គលនយោបាយដែលមានគំនិតប្រឆាំងចិន ក៏ដូចជាបង្វែរ និងឆ្លើយតបការរិះគន់លើចិនជាដើម។

ការរិះគន់ឌឺដងផ្លែផ្កាចំណាត់ការរបស់រដ្ឋបាលលោក ត្រាំ ទៅនឹងការរាលដាលជំងឺ COVID-19 ការបិទស្ថានកុងស៊ុលអាមេរិកនៅឆឹងទូ ក៏ដូចជាជំហររបស់អាមេរិកលើបញ្ហាហុងកុង និងសមុទ្រចិនខាងត្បូង សុទ្ធតែជាកត្តាដែលលោក Evanina លើកឡើងដើម្បីគាំទ្រការអះអាងរបស់ខ្លួន។ សម្រាប់មន្ត្រីប្រឆាំងចារកម្មរូបនេះ ទីក្រុងប៉េកាំងជឿថា ប្រធានបទទាំងអស់នេះ ទំនងជាអាចប្រើប្រាស់ដើម្បីជះឥទ្ធិពលនៅក្នុងការបោះឆ្នោតនៅអាមេរិក។

សម្រាប់រុស្ស៊ីវិញ លោក Evanina បញ្ជាក់ថា ទីក្រុងមូស្គូ មានធ្វើសកម្មភាពរួចហើយ។ អ្នកស្រី ហ៊ីឡារី គ្លីនតុន ជាគោលដៅរបស់រុស្ស៊ីនៅឆ្នាំ២០១៦ ហើយនៅឆ្នាំ២០២០ គឺលោក ចូ បៃឌិន បេក្ខជនបក្សប្រជាធិបតេយ្យដូចគ្នា។ មន្ត្រីអាមេរិករូបនេះបាននិយាយដល់ឈ្មោះ លោក Andriy Derkach អ្នកនយោបាយអ៊ុយក្រែនដែលគាំទ្ររុស្ស៊ី ដែលបានផ្សព្វផ្សាយរឿងអាស្រូវពុករលួយដើម្បីបង្ខូចលោក បៃឌិន និងបក្សប្រជាធិបតេយ្យ។

ជាមួយគ្នានេះ អ៊ីរ៉ង់វិញ ក៏នឹងទំនងជាប្រើប្រព័ន្ធអនឡាញដើម្បីចែកចាយព័ត៌មានមិនពិត ក្នុងន័យវាយប្រហារស្ថាប័នរដ្ឋអាមេរិក និងប្រធានាធិបតី ត្រាំ ព្រមទាំងធ្វើឲ្យមានការពេញចិត្តក្នុងចំណោមអ្នកបោះឆ្នោតអាមេរិក។ នេះជាការព្រមានរបស់លោក Evanina ៕