លីគកំពូល៖ ក្រៅពីបឹងកេតស្វាគមន៍យុវជនបាទី មានការប្រកួតចំនួនពីរគូទៀតនៅថ្ងៃនេះ

កីឡាជាតិ

ជាតិ

លីគកំពូល៖ ក្រៅពីបឹងកេតស្វាគមន៍យុវជនបាទី មានការប្រកួតចំនួនពីរគូទៀតនៅថ្ងៃនេះ

09, Aug 2020 , 2:10 pm

រូបភាព

កីឡាករ ម៉ាត់ នូរុណ ខ្សែប្រយុទ្ធបឹងកេតក្នុងការប្រកួតកន្លងមក

ដោយ:

វណ្ណឌេត កីឡាជាតិ ()

ការប្រកួតក្របខណ្ឌមិត្តហ្វូនខេមបូឌានលីគនៅថ្ងៃអាទិត្យ ទី៩ ខែសីហា នេះ មានចំនួន៣គូ ដែលធ្វើឡើងនៅទីលានផ្សេងៗគ្នា ក្នុងនោះបឹងកេតប៉ះយុវជនអាយុក្រោម១៨ឆ្នាំបាទី ខណៈក្រុមនគរបាលជាតិជួបអាស៊ីអឺរ៉ុប រីឯសូលទីឡូអង្គរស្វាគមន៍អគ្គិសនីកម្ពុជា។

បឹងកេតត្រូវការឈ្នះយុវជនអាយុក្រោម១៨ឆ្នាំបាទីនាជំនួបក្របខណ្ឌមិត្តហ្វូនខេមបូឌានលីគនៅរសៀលនេះដើម្បីពង្រឹងទីតាំង និងបន្តឱកាសក្នុងការប្រជែងដណ្តើមកំពូលតារាង ដែលព្រះខ័នរាជស្វាយរៀងកំពុងគ្រង។ បច្ចុប្បន្នបឹងកេតស្ថិតនៅលេខរៀងទី២មាន២៣ពិន្ទុជាមួយកំណត់ឈ្នះ៧ស្មើ២ ខណៈយុវជនអាយុរក្រោម១៨ឆ្នាំបាទីស្ថិតនៅបាតតារាងមាន២ពិន្ទុ ក្រោយចាញ់៧និងស្មើ២។ ការប្រកួតធ្វើឡើងនៅកីឡដ្ឋានខេមបូឌាអ៊ែរវ៉េនៅម៉ោង៣:៣០នាទីរសៀល។

នៅម៉ោង៣:៣០នាទីរសៀលនេះដែរក្រុមសូលទីឡូអង្គរបើកទ្វារកីឡដ្ឋាន S.R.U ស្វាគមន៍ភ្ញៀវអគ្គិសនីកម្ពុជា។ សូលទីឡូអង្គរស្ថិតនៅលេខរៀងទី១២មាន៤ពិន្ទុ ក្រោយ៩ប្រកួតឈ្នះ១ស្មើ១និងចាញ់៧ ចំណែកអគ្គិសនីកម្ពុជាស្ថិតនៅលេខរៀងទី១០មាន៥ពិន្ទុ ក្រោយឈ្នះ១ស្មើ២និងចាញ់៦។

នៅម៉ោងដំណាលគ្នានេះដែរ កីឡដ្ឋាន A.E.U Sport Park នឹងក្លាយជាទីតាំងកាត់សេចក្តីរវាងក្រុមនគរបាលជាតិជាមួយអាស៊ីអឺរ៉ុប។ នគរបាលជាតិឈរលេខរៀងទី១១មាន៤ពិន្ទុ ក្រោយឈ្នះ១ស្មើ១និងចាញ់៧ ខណៈអាស៊ីអឺរ៉ុបស្ថិតនៅលេខរៀងទី៩មាន៧ពិន្ទុជាមួយជ័យជម្នះ២ស្មើ១និងចាញ់៦។

សម្រាប់ការប្រកួតកាលពីថ្ងៃសៅរ៍ ទី៨ ខែសីហា ព្រះខ័នរាជស្វាយរៀងបានយកឈ្នះណាហ្គាវើលក្នុងលទ្ធផល ២-០ ដើម្បីបន្តគ្រងកំពូលតារាងប្រចាំសប្តាហ៍ទី១១មាន២៨ពិន្ទុជាមួយកំណត់ត្រាមិនស្គាល់ចាញ់ឈ្នះ៩ស្មើ១។ ចំណែកក្រុមវិសាខាបានយកឈ្នះអង្គរថាយហ្គឺរក្នុងលទ្ធផល ៣-១ ចំណែកភ្នំពេញក្រោនយកឈ្នះម្ចាស់ផ្ទះគីរីវង់សុខសែនជ័យ ៦-០៕