កីឡាអន្តរជាតិ
រថយន្ត
អន្តរជាតិ
Verstappen ឈ្នះការប្រណាំងនៅអង់គ្លេស ចំខួបទី៧០ នៃការបង្កើត Formula One
× Max Verstappen ដែលបើកបរឲ្យក្រុម Red Bull ឈ្នះការប្រណាំង Formula One នៅទីលាន Great Britain Grand Prix ចក្រភពអង់គ្លេស និងចំថ្ងៃអបអរខួបលើកទី ៧០ នៃការបង្កើតកម្មវិធី Grand Prix ផង។ ជ័យជម្នះនេះ ក៏ជាការបញ្ចប់ការឈ្នះជាប់ៗគ្នារបស់ក្រុម Mercedes នាការប្រណាំង៤លើកកន្លងមក។
នាការប្រណាំងនៅទីលានទី៥ ក្នុងរដូវកាលឆ្នាំ២០២០ នាថ្ងៃទី៩ ខែសីហា កីឡាករ Verstappen បានសម្រេចទីមុនគេដោយប្រើថេរវេលា ១ម៉ោង ១៩នាទី និង៤១វិនាទី តាមពីក្រោយដោយ Lewis Hamilton និង Valtteri Bottas ដែលសុទ្ធតែបើកឲ្យក្រុម Mercedes។
មិនត្រឹមជាការឈ្នះលើកដំបូងសម្រាប់ក្រុម Red Bull និងចំខួបទី៧០នៃការបង្កើតកម្មវិធី Grand Prix នោះទេ អ្នកប្រណាំងសញ្ជាតិហូឡង់រូបនេះ ក៏បានបញ្ចប់ការទទួលជម្នះ៥លើកជាប់គ្នារបស់ក្រុម Mercedes ផងដែរ។ Bottas បានឈ្នះការប្រណាំងបើកឆាក ខណៈម្ចាស់ការពារជើងឯក Hamilton ឈ្នះ ៣លើកជាប់គ្នារួចមកហើយ។
F1 ឬកាំជ្រួចលើផ្ទៃរាប បានប្រារព្ធខួប ៧០ ឆ្នាំរបស់ខ្លួន នៅចក្រភពអង់គ្លេស ដែលចាប់ផ្តើមកម្មវិធីប្រណាំងលំដាប់ពិភពលោកជាលើកដំបូងក្នុងឆ្នាំ១៩៥០។ ជ័យជម្នះនេះ បានជួយ Verstappen ឡើងទៅឈរចំណាត់ថ្នាក់ទី២ក្នុងតារាង F1 ជំនួស Bottas វិញដោយរកបាន៧៧ពិន្ទុ។
Hamilton នៅរក្សាចំណាត់ថ្នាក់ទីមួយដដែលដោយរកបាន១០៧ពិន្ទុ ស្របពេល Bottas មិត្តរួមក្រុម Mercedes មាន៧៣ពិន្ទុ។ កីឡាករ Charles Leclerc ដែលបើកឲ្យ Ferrari រកបាន៤៥ពិន្ទុ ឈរលេខរៀងទី៤ ក្រោយឆ្លងកាត់ការប្រណាំងសរុប៥លើករួចមក។
បើគិតផ្នែកគ្រឿងម៉ាស៊ីនវិញ Mercedes នៅតែនាំមុខគេដដែលដោយមាន១៨០ពិន្ទុ តាមពីក្រោយដោយ Red Bull ដែលមាន១១៣ពិន្ទុ។ Ferrari ឈរលេខ៣ មាន៥៥ពិន្ទុ នាំមុខ Mclaren ដែលឈរលេខ៤ចំនួន២ពិន្ទុ ខណៈ William Mercedes នៅតែគ្មានពិន្ទុរាប់ដដែល។
ជំនួបបន្ទាប់ និងជាទីលានទី៦សម្រាប់រដូវកាលនេះ នឹងធ្វើឡើងនៅទឹកដីអេស្ប៉ាញ Spanish Grand Prix នៅថ្ងៃទី៦ ខែសីហា៕
Tag:
Max Verstappen
Formula One
© រក្សាសិទ្ធិដោយ thmeythmey.com