Europa៖ Man Utd និង Inter Milan ឡើងទៅវគ្គ១/២ផ្តាច់ព្រ័ត្រ

កីឡាអន្តរជាតិ

អន្តរជាតិ

Europa៖ Man Utd និង Inter Milan ឡើងទៅវគ្គ១/២ផ្តាច់ព្រ័ត្រ

11, Aug 2020 , 10:22 am

រូបភាព

ដោយ: ទេព ពិទូរ្យ

ក្រុម Manchester United និង Inter Milan ចាប់ដៃគ្នាឡើងទៅវគ្គពាក់កណ្តាលផ្តាច់ព្រ័ត្រនៃពានរង្វាន់ UEFA Europa League បន្ទាប់ពីទម្លាក់គូប្រកួតរៀងៗខ្លួន។ Man Utd យកឈ្នះ Copenhagen ១-០ ឯ Inter ឈ្នះ Bayern Leverkusen ២-១ នៅវគ្គ៨ក្រុមចុងក្រោយ ដែលធ្វើឡើងតែមួយជើងប៉ុណ្ណោះ។

នាការប្រកួតវគ្គ៨ក្រុមចុងក្រោយ នៅទឹកដីកណ្តាលក្នុងកីឡដ្ឋាន RheinEnergie STADION ប្រទេសអាល្លឺម៉ង់នៅរាត្រីថ្ងៃទី១០ ខែសីហា Man Utd បានបើកការវាយសម្រុកយ៉ាងខ្លាំងទៅលើក្រុម Copenhagen តាំងពីវគ្គទី១ដល់វគ្គទី២ ដោយស៊ុតសរុប១៤លើក ទល់១លើក ប៉ុន្តែមិនមានគ្រាប់បាល់ស៊ុតបញ្ចូលទីគ្នាឡើយ។ ក្រុមទាំងពីបញ្ចប់ក្នុងម៉ោងប្រកួតផ្លូវការ៩០នាទីដោយលទ្ធផល ០-០។

ក្រុមទាំងពីរតម្រូវឲ្យលេងក្នុងម៉ោងបន្ថែម១៥នាទីពីរដង។ នៅក្នុងម៉ោងបន្ថែម១៥នាទីដំបូង ត្រឹមនាទី៩៥ ក្រុមបិសាចក្រហមទទួលបានឱកាសមាសដោយទទួលបានបាល់ពិន័យ១១ម៉ែត្រ បន្ទាប់ពីលោកអាជ្ញាកណ្តាលផ្លុំកញ្ចែពិន័យកីឡាកររបស់ Copenhagen ដែលបង្កកំហុសលើ Anthony Martial។ Bruno Fernandes ជាអ្នករ៉ាប់រងការស៊ុតនេះដោយសម្រេចបានគ្រាប់បាល់ជ័យជម្នះក្នុងលទ្ធផល ១-០ នេះ។

ជ័យជម្នះនេះ បាននាំក្រុមលោក Ole Gunnar Solskjaer ឡើងទៅកាន់វគ្គពាក់កណ្តាលផ្តាច់ព្រ័ត្រ ដោយត្រូវរង់ចាំជំនួបរវាង Wolves និង Sevilla ដែលត្រូវប្រកួតគ្នានៅរាត្រីថ្ងៃទី១១ ខែសីហានេះ វេលាម៉ោង ២:០០អាធ្រាត្រ [ម៉ោងនៅកម្ពុជា]។

ដោយឡែក Inter Milan វិញក៏បានកក់កៅអីទៅវគ្គ៤ក្រុមចុងក្រោយដែរ ដោយទម្លាក់ក្រុមពីអាល្លឺម៉ង់ Leverkusen ក្នុងលទ្ធផល ២-១។ ២គ្រាប់របស់ Inter សម្រេចបានដោយខ្សែប្រយុទ្ធ Romelu Lukaku និង Nicolo Barella រីឯមួយគ្រាប់របស់ Leverkusen ធ្វើបានដោយកីឡាករ Kai Havertz។

ក្រុមដែលមានអ្នកចាត់ការទូទៅលោក Antonio Conte នឹងត្រូវជួបជាមួយ Shakhtar Donetsk ឬ Basel បន្ទាប់ពីក្រុមទាំងពីនេះត្រូវជួបគ្នាវគ្គ៨ក្រុមនៅរាត្រីនេះដូចគ្នា៕