ភ្នំពេញ៖ លោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ អះអាងថា រកឃើញករណីលាប់ឡើងវិញនៃជំងឺកូវីដ-១៩ លើបុរសខ្មែរម្នាក់ ដែលមានទីលំនៅក្នុងឃុំគរ ស្រុកត្បូងឃ្មុំ កាលពីថ្ងៃទី៨ ខែសីហា ឆ្នាំ២០២០។
បុរសវ័យ២៩ឆ្នាំ ដែលលាប់ជំងឺកូវីដ-១៩ឡើងវិញ គឺជាអ្នកដំណើរមកពីប្រទេសអារ៉ាប៊ីសាអ៊ូឌីត កាលពីថ្ងៃទី១០ខែកក្កដា ហើយបានសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។ ដល់ថ្ងៃទី២៨ ខែកក្កដា ក្រុមគ្រូពេទ្យ បានអនុញ្ញាតឲ្យបុរសនោះ ចេញពីមន្ទីរពេទ្យ ត្រឡប់ទៅទីលំនៅឋានវិញ ក្រោយធ្វើតេស្តឃើញអវិជ្ជមាន (លែងមានមេរោគកូវីដ-១៩)។
ក្រោយទៅដល់ផ្ទះ១៤ថ្ងៃ គឺនៅថ្ងៃទី៧ ខែសីហា ក្រុមគ្រូពេទ្យខេត្តត្បូងឃ្មុំ បានយកសំណាកបុរសរូបនោះ ទៅពិនិត្យនិងធ្វើតេស្តឡើងវិញ ហើយនៅថ្ងៃទី៨ ខែក៏ចេញលទ្ធផលវិជ្ជមាន។
រាល់អ្នកដែលជាសះស្បើយពីជំងឺកូវីដ-១៩ ហើយត្រឡប់ទៅផ្ទះវិញបាន១៤ថ្ងៃ ត្រូវយកសំណាកទៅធ្វើតេស្តម្តងទៀត ដើម្បីបញ្ជាក់ឲ្យច្បាស់ថា ពិតមិនមានមេរោគកូវីដ-១៩ ឬក៏មាន។
លោកវេជ្ជបណ្ឌិត កែវ វណ្ណៈ បញ្ជាក់ថា៖«បុរស ដែលលាប់នេះ ត្រូវបានបញ្ជូនទៅសម្រាកព្យាបាលនៅពេទ្យបង្អែក [ខេត្តត្បូងឃ្មុំ] ភ្លាមៗ បន្ទាប់ពីដឹងលទ្ធផលវិជ្ជមាន ហើយអ្នកប៉ះពាល់មាន៤៧នាក់ ក្នុងនោះប៉ះពាល់ដោយផ្ទាល់មាន៩នាក់»។
ប្រធានមន្ទីរសុខាភិបាលខេត្តត្បូងឃ្មុំ បន្ថែមថា អ្នកប៉ះពាល់ផ្ទាល់ទាំង៩នាក់ ត្រូវបានដាក់ចត្តាឡីស័កនៅវិទ្យាល័យ ហ៊ុន សែន សួង នៅក្រុងសួង ហើយក្រៅពីនេះ គឺដាក់ចត្តាឡីស័កនៅសាលាបឋមសិក្សានៅឃុំគរ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល ប្រាប់ក្រុមសារព័ត៌មានតាមប្រព័ន្ធTelegram ថា ពិតជាមានករណីលាប់នេះមែន ហើយកន្លងមកក៏ធ្លាប់មានករណីលាប់ដែរ ប៉ុន្តែមិនបានចេញផ្សាយ។ បើតាមលោកស្រី ការមិនចេញផ្សាយ គឺដើម្បីកុំឲ្យមានការយល់ច្រឡំថា ជាករណីរកឃើញថ្មី។ ក្រៅពីនេះ លោកស្រី សង្កេតឃើញថា នៅតាមបណ្ដាប្រទេសផ្សេងៗ ក៏មិនចុះផ្សាយករណីលាប់ឡើងវិញដែរ។
ជាមួយគ្នាដែរ លោកស្រីបានសង្កត់ធ្ងន់ថា សម្រាប់អ្នកជាសះស្បើយដែលបានត្រឡប់ទៅផ្ទះវិញ ក្រុមការងារនៅតែបន្តតាមដានដដែល ដើម្បីពិនិត្យករណីលាប់ឡើងវិញនេះ។
លោកស្រីថ្លែងថា៖«បើតាមគោលការណ៍ធ្វើតេស្តរបស់អង្គការសុខភាពពិភពលោក បើធ្វើតេស្តចំនួនពីរដងឃើញអវិជ្ជមាន គឺចាត់ទុកថាពួកគាត់ជាសះស្បើយ ហើយអនុញ្ញាតឲ្យចេញទៅផ្ទះរបស់គាត់វិញ ប៉ុន្តែការចេញទៅវិញនេះ ក៏យើងមិនដើរទៅណាផ្ដេសផ្ដាសដែរ គឺមានការណែនាំឲ្យបន្តដាក់នៅដោយឡែក១៤ថ្ងៃបន្តទៀតនៅផ្ទះ ដើម្បីតាមដាន ដោយសារមានករណីលាប់ហ្នឹង»។
កាលពីខែមេសា មានបុរសខ្មែរម្នាក់វ័យ៤០ឆ្នាំ រស់នៅសង្កាត់ច្រាំងចំរេះ ខណ្ឌឫស្សីកែវ បានលាប់ជំងឺកូវីដ-១៩ ឡើងវិញ បន្ទាប់ពីគាត់បានជាសះស្បើយរយៈ១៥ថ្ងៃ។
គិតត្រឹមថ្ងៃទី១១ ខែសីហា ឆ្នាំ២០២០ កម្ពុជាមានអ្នកឆ្លងសរុប២៦៦នាក់ ដោយបានជាសះស្បើយ២២០នាក់៕