អន្តរជាតិ
សភាចិន សម្រេចឲ្យសភាហុងកុងបន្តការងារ១ឆ្នាំទៀត បន្ទាប់ពីការបោះឆ្នោតត្រូវលើកពេល រូបភាព៖ Xinhua
× គណៈអចិន្ត្រៃយ៍នៃសភាប្រជាជនចិន នៅថ្ងៃទី១១ ខែសីហា បានសម្រេចឲ្យសភានៃតំបន់រដ្ឋបាលពិសេសហុងកុងអាណត្តិទី៦ បន្តកិច្ចការងាររបស់ខ្លួន បានតិចជាង ១ឆ្នាំ។ ការសម្រេចនេះ ធ្វើឡើងបន្ទាប់ពីហុងកុង បានប្រកាសលើកពេលបោះឆ្នោត ដែលគ្រោងនឹងប្រារព្ធនៅថ្ងៃទី៦ ខែកញ្ញា ទៅធ្វើនៅខែកញ្ញា ឆ្នាំ២០២១ វិញ ដោយផ្អែកលើហេតុផលទប់ស្កាត់ការរាតត្បាតនៃCOVID-19។
តាមរយៈកិច្ចប្រជុំពេញអង្គលើកទី២១ នៃគណៈអចិន្ត្រៃយ៍នៃសភាប្រជាជនចិននីតិកាលទី១៣ សមាជិកសភាចិន បានអនុម័តសេចក្តីសម្រេចមួយ ដែលអនុញ្ញាតឲ្យសភាហុងកុង បន្តកិច្ចការរបស់ខ្លួនតិចជាង ១ឆ្នាំ បន្ទាប់ពីពន្យារពេលបោះឆ្នោតទៅឆ្នាំក្រោយ។
បើតាមការចុះផ្សាយរបស់ទូរទស្សន៍ចិន CGTN សេចក្តីសម្រេចនេះ បានបញ្ជាក់ថា សភាហុងកុងអាណត្តិទី៦ នឹងបន្តកិច្ចដឹកនាំកិច្ចការរបស់ខ្លួន មិនឲ្យលើសពីមួយឆ្នាំឡើយ រហូតដល់សភាហុងកុងអាណត្តិទី៧ ចូលកាន់តំណែង។ មួយអាណត្តិរបស់សភាហុងកុង មានចំនួន ៤ឆ្នាំ។ បើតាមការអះអាងរបស់គណៈអចិន្ត្រៃយ៍នៃសភាប្រជាជនចិន សេចក្តីសម្រេចនេះ គឺធ្វើឡើងស្របទៅនឹងច្បាប់ ហើយវាសំខាន់ណាស់ ក្នុងការធានាមុខងាររបស់រដ្ឋាភិបាល និងសង្គមហុងកុង។
សេចក្តីសម្រេចនេះ ធ្វើឡើងបន្ទាប់ពីហុងកុងប្រកាសពន្យារពេលបោះឆ្នោតសភាហុងកុង ទៅឆ្នាំ២០២១ ដោយសារCOVID-19។ លោកស្រី ការី ឡាំ ប្រធានប្រតិបត្តិហុងកុង បានដាក់របាយការណ៍ទៅរដ្ឋាភិបាលចិន តាំងពីថ្ងៃទី២៨ ខែកក្កដា ដើម្បីពន្យារពេលការបោះឆ្នោតនេះ។ អាណត្តិបច្ចុប្បន្នរបស់សភាហុងកុង ចប់នៅថ្ងៃទី៣០ ខែកញ្ញាខាងមុខ។
កន្លងមកក្រុមប្រទេស Five eyes ដែលមានអាមេរិក កាណាដា អង់គ្លេស អូស្ត្រាលី នូវែលសេឡង់ បានជំរុញឲ្យហុងកុងរៀបចំការបោះឆ្នោតឲ្យបានឆាប់បំផុត ព្រោះការលើកពេលបោះឆ្នោតបែបនេះ គឺជាការបំផ្លាញដំណើរការលទ្ធិប្រជាធិបតេយ្យនៅហុងកុង។ ជាការឆ្លើយតប ក្រសួងការបរទេសចិន បានអះអាងថា ការពន្យារពេលបោះឆ្នោតរបស់ហុងកុង មិនមែនចង់បំផ្លាញលទ្ធិប្រជាធិបតេយ្យនៅក្នុងទីក្រុងនោះទេ ផ្ទុយទៅវិញ វាគឺជាការការពារសុវត្ថិភាព និងសុខភាពរបស់ប្រជាជន។
សូមបញ្ជាក់ថា ករណីឆ្លងCOVID-19 នៅក្នុងទីក្រុងហុងកុង គឺបានធ្លាក់ចុះបន្តិចនៅក្នុងរយៈពេលចុងក្រោយនេះ។ នៅថ្ងៃទី១១ ខែសីហា ហុងកុង បានរាយការណ៍ថា មានករណីឆ្លងCOVID-19 ចំនួន ៣៣ករណី ដែលជាចំនួនឆ្លងតិចជាងគេបំផុត ក្នុងរយៈពេល១ខែចុងក្រោយ។ ករណីសរុបCOVID-19 នៅក្នុងទីក្រុងហុងកុង មានចំនួន ៤១៨២ករណី អ្នកស្លាប់មានចំនួន ៥៨នាក់ និងអ្នកជាសះស្បើយមាន ៣០៥២នាក់៕
© រក្សាសិទ្ធិដោយ thmeythmey.com