រដ្ឋមន្ត្រីសុខាភិបាលអាមេរិក៖ បើ COVID-19 ផ្ទុះនៅអាមេរិក ឬតៃវ៉ាន់ វាត្រូវចប់បាត់ទៅហើយ

COVID-19

អន្តរជាតិ

រដ្ឋមន្ត្រីសុខាភិបាលអាមេរិក៖ បើ COVID-19 ផ្ទុះនៅអាមេរិក ឬតៃវ៉ាន់ វាត្រូវចប់បាត់ទៅហើយ

12, Aug 2020 , 9:59 pm

រូបភាព

រដ្ឋមន្រ្តីសុខាភិបាលអាមេរិក Alex Azar ។ រូបភាព AFP

ដោយ: តន ចាន់រិទ្ធារ៉ា

ពីទឹកដីតៃវ៉ាន់ រដ្ឋមន្ត្រីសុខាភិបាលអាមេរិក Alex Azar នៅថ្ងៃទី១១ ខែសីហា បានវាយប្រហារការឆ្លើយតបរបស់ចិនទៅនឹងជំងឺ COVID-19 ។ បើតាមលោក Azar ចិនមានឱកាសក្នុងការផ្ដល់ដំណឹងដល់ពិភពលោកពីការផ្ទុះជំងឺឆ្លងផ្លូវដង្ហើមមួយនេះ ប៉ុន្តែចិនមិនបានធ្វើដូច្នោះឡើយ។ ប្រមុខសុខាភិបាលអាមេរិករូបថែមទាំងនិយាយថា បើ COVID-19 ត្រូវបានរកឃើញនៅអាមេរិក ឬតៃវ៉ាន់មុនគេនោះ អ្វីៗត្រូវចប់រួចរាល់អស់ទៅហើយ។

«ខ្ញុំជឿថា វាមិនមែនជាការបំផ្លើសក្នុងការនិយាយថា ប្រសិនបើវីរុសនេះកើតនៅតៃវ៉ាន់ ឬអាមេរិក វាទំនងជាត្រូវបានលុបបំបាត់យ៉ាងស្រួល។» រដ្ឋមន្ត្រីសុខាភិបាល និងសេវាកម្មប្រជាជនអាមេរិក Alex Azar និយាយបែបនេះដោយសំដៅវីរុសដែលបង្កទៅជាជំងឺ COVID-19 អំឡុងពេលទស្សនកិច្ចជាប្រវត្តិសាស្ត្រនៅតៃវ៉ាន់ ទីដែលលោកក្លាយជាមន្ត្រីជាន់ខ្ពស់បំផុតរបស់អាមេរិកជាន់ដីកោះនេះតាំងពីឆ្នាំ១៩៧៩ មកនោះ។

ថ្លែងទៅកាន់អ្នកចូលរួមក្នុងពិធីនៅសាលាពេទ្យមួយក្នុងទីក្រុងតៃប៉ិ លោក Azar រិះគន់ចិនខ្លាំងៗចំពោះការឆ្លើយតបរបស់ប្រទេសនេះទៅនឹងការផ្ទុះជំងឺ COVID-19 នៅដំណាក់កាលដំបូង។ លោក Azar អះអាងថា បក្សកុម្មុយនីស្តចិនមានឱកាសក្នុងការព្រមានពិភពលោក និងធ្វើការជាមួយពិភបលោកលើការប្រយុទ្ធប្រឆាំងវីរុស ប៉ុន្តែពួកគេមិនបានធ្វើបែបនោះឡើយ ហើយផលប៉ះពាល់លើជីវិតមនុស្សកើនឡើងរាល់ថ្ងៃ។

បើតាមទីភ្នាក់ងារព័ត៌មាន AFP រដ្ឋមន្ត្រីអាមេរិករូបនេះបានវាយប្រហារទៀតថា ទីក្រុងប៉េកាំង មិនព្រមចែករំលែកព័ត៌មាន បំបិទមាត់គ្រូពេទ្យដែលទម្លាយរឿងរ៉ាវ និងបង្កការលំបាកដល់ការឆ្លើយតបជាសាកលទៅទៀត។

សូមបញ្ជាក់ថា មកទល់ពេលនេះ អាមេរិកមានករណីឆ្លងជាង៥លាន៣សែននាក់ ហើយស្លាប់ជាង១៦ម៉ឺននាក់។ តៃវ៉ាន់វិញ មានករណីឆ្លងតែ៤៨១នាក់ និងស្លាប់៧នាក់ប៉ុណ្ណោះ ទោះកោះមួយនេះនៅកៀកចិនក្ដី។ ការឆ្លើយតបរហ័ស និងការដាក់ចេញវិធានការតឹងរ៉ឹង ជួយតៃវ៉ាន់ឲ្យគេចផុតពីមហន្តរាយដូចអាមេរិក។ ចិនដែលជាទី COVID-19 ផ្ទុះមុនគេ មានករណីឆ្លងជាង៨៤០០០នាក់ និងស្លាប់ច្រើនជាង៤៦០០នាក់៕