សង្គមអន្តរជាតិ
អន្តរជាតិ
យុវជនម្នាក់បើកហាងកាហ្វេ ដើម្បីស្វែងរកម្ចាស់ថ្មីដល់ឆ្មាទុរគតប្រមាណ១៥ក្បាល យុវជន Nguyen Thanh Binh ដាក់ចំណីឲ្យហ្វូងឆ្មាដែលខ្លួនយកទៅចិញ្ចឹមក្នុងហាងដើម្បីរកអ្នកចិញ្ចឹមថ្មី។ រូបថត AFP
× យុវជនវៀតណាមម្នាក់អាយុ២៤ឆ្នាំដែលរស់នៅក្រុងហាណូយ បានបើកយុទ្ធនាការសង្គ្រោះឆ្មាទុរគត ដោយយកឆ្មាទាំងនោះ ដាក់ក្នុងហាងកាហ្វេរបស់ខ្លួន ហើយស្វែងរកអ្នកដែលចង់យកពួកវាទៅចិញ្ចឹម។ នេះបើតាមការផ្សាយរបស់ទីភ្នាក់ងារព័ត៌មាន AFP។
Ngao’s Home Café ទីកន្លែងរស់នៅរបស់សត្វឆ្មាដ៏គួរឲ្យស្រឡាញ់ចំនួន១៥ក្បាល ដោយភាគច្រើនជាឆ្មាដែលគេបោះបង់ចោល ឆ្មាដែលរងរបួសដោយសារឆ្កែខាំ ឬគ្រោះថ្នាក់ផ្សេងៗ។ «ខ្ញុំព្យាយាមជួយឆ្មាដែលមានប្រវត្តិដ៏ជូរចត់ទាំងនោះ ឲ្យបានជាសះស្បើយទាំងរាងកាយ និងស្មារតី»។ នេះជាការអះអាងរបស់លោក Nguyen Thanh Binh ដែលជាម្ចាស់ហាងកាហ្វេ។
ចាប់បើកពីខែកក្កដាមក យុវជន Thanh Binh វ័យ២៤ឆ្នាំ អះអាងថា ហាងកាហ្វេ Ngao របស់ខ្លួន មានគោលបំណងដ៏ធំមួយ គឺស្វែងរកម្ចាស់ថ្មី ឲ្យឆ្មាទាំង១៥ក្បាលនោះ។ លោកសង្កេតឃើញថា អតិថិជនមួយចំនួនមានចំណាប់អារម្មណ៍ ហើយអ្នកខ្លះក៏ត្រៀមខ្លួនយកឆ្មាទៅចិញ្ចឹមផងដែរ៕
© រក្សាសិទ្ធិដោយ thmeythmey.com