នាយករដ្ឋមន្ត្រីថៃ ប្រាយុទ្ធ ចន្ទអូចា បានទទូចឲ្យប្រជាជនថៃគ្រប់គ្នាបដិសេធនយោបាយស្អប់ខ្ពើម និងបំបែកបំបាក់ ហើយប្រឹងធ្វើការរួមគ្នាដោះស្រាយបញ្ហាសេដ្ឋកិច្ចអាសន្ន ដែលប៉ះពាល់ជីវភាពពលរដ្ឋនៅទូទាំងប្រទេស។ លោក អះអាងថា នយោបាយបំបែកបំបាក់ជាវប្បធម៌ជំនាន់មុន ដែលពុំគួរយកមកប្រើនៅសម័យបច្ចុប្បន្នឡើយ។
ក្នុងសុន្ទរកថា ចាក់ផ្សាយតាមទូរទស្សន៍ នៅថ្ងៃទី ១៣ ខែសីហា នាយករដ្ឋមន្ត្រី ប្រាយុទ្ធ ចន្ទអូចា បញ្ជាក់ដូច្នេះថា៖«យើងមានអាទិភាពដ៏ធំមួយនៅចំពោះមុខយើង ហើយមួយនេះគឺលើសពីសង្គ្រាមប៉ាកកា និងនយោបាយទៅទៀត»។ ត្រង់នេះលោកសង្កត់ធ្ងន់ថា ហើយនេះគឺជាជីវភាពរបស់ប្រជាជនរាប់លាននាក់ ដែលរងគ្រោះដោយសារវិបត្តិជំងឺរាតត្បាតសកល COVID-19 ។
តាមការចុះផ្សាយរបស់កាសែតថៃ បាងកកប៉ុស្តិ៍ លោក ប្រាយុទ្ធ អំពាវនាវឲ្យប្រជាជនថៃទាំងអស់និយាយថា «ទេ» ចំពោះនយោបាយស្ពប់ខ្ពើមនិងបំបែកបំបាក់ និងនយោបាយដែលសាយភាយជំងឺប្រកាន់បក្ខពួកនិយម ដូចជា «ក្មេង និង ចាស់» ឬ «អ្នកមាន និង អ្នកក្រ» ឬឥរិយាបថបំបែកបំបាក់គ្រប់រូបភាព ដែលអាចជ្រៀតចូលក្នុងសង្គមថៃ។
បើតាមលោកនាយករដ្ឋមន្ត្រី នយោបាយបំបែកបំបាក់ ពុំគួរយកប្រើនៅសម័យនេះឡើយ ព្រោះវាជានយោបាយដឹកនាំរបស់មនុស្សជំនាន់ចាស់។ លោកពន្យល់បែបនេះ៖«វា (នយោបាយបំបែកបំបាក់) គ្មានកន្លែងក្នុងពិភពលោកបច្ចុប្បន្នយើងឡើយ។ មនុស្សដែលនិយាយថា ខ្ញុំនឹងមិនស្ដាប់គាត់ ព្រោះគាត់មានការយល់ឃើញមិនដូចខ្ញុំ ឬខ្ញុំនឹងមិនជួបគាត់ព្រោះគាត់ជឿគំនិតខុសខ្ញុំ គឺជាវប្បធម៌ពីសម័យមុន»។
យ៉ាងណាមិញ លោកបន្តថា៖«អនាគតប្រទេសជាតិជារបស់យុវជន ហើយអនាគតយើងក៏ស្ថិតក្នុងកណ្ដាប់ដៃពួកគេដែរ។ ដូច្នេះទុកឲ្យពួកក្មេងៗដឹកនាំមាគ៌ានេះចុះ […]»។ តួយ៉ាង លោកបានណែនាំឲ្យរដ្ឋមន្ត្រីហិរញ្ញវត្ថុទើបតែងតាំងថ្មី អញ្ជើញអ្នកពូកែៗជាឈាមថ្មី ចូលរួមចែករំលែកការយល់ឃើញពួកគេលើវិធីសាស្ត្រដោះស្រាយបញ្ហាសេដ្ឋកិច្ចប្រទេស។ លោក ប្រាយុទ្ធ លើកជាយោបល់ថា អ្នកខ្លាំងៗទាំងនោះ គួរតែជាមនុស្សដែលធ្លាប់បម្រើរដ្ឋាភិបាលមុន ឬអ្នកដែលមាននិន្នាការនយោបាយខុសៗគ្នាជាដើម។
ការលើកឡើងរបស់នាយករដ្ឋមន្ត្រី ប្រាយុទ្ធ មិនខុសប្លែកអ្វីនឹងឧត្តមសេនីយ៍ Apirat Kongsompong មេទ័ពជើងគោកថៃ ដែលរិះគន់ខ្លាំងលើជំងឺស្ពប់ខ្ពើមជាតិឯង។ កាលពីថ្ងៃទី ៥ ខែសីហាកន្លងទៅ លោកឧត្តមសេនីយ៍ដ៏មានឥទ្ធិពលរូបនេះ និយាយថា៖«ជំងឺ COVID-19 អាចព្យាបាលជាសះស្បើយ តែជំងឺដែលពុំអាចព្យាបាលជា គឺ ការស្ពប់ខ្ពើមជាតិឯង»។ សម្រាប់លោក ដូច្នេះហើយទើបជំងឺនេះ ជាការគំរាមកំហែងធំជាងជំងឺ COVID-19 ទៅទៀត។
នេះមិនមែនជារឿងចៃដន្យទេដែលប្រមុខកងទ័ពជើងគោករូបនេះនិយាយធ្ងន់ៗបែបនេះ ដោយលោកចង់សំដៅលើចលនាទាមទារប្រជាធិបតេយ្យក្នុងប្រទេសថៃបន្តកើនឡើងពីមួយថ្ងៃទៅមួយថ្ងៃ។ បាតុករភាគច្រើន ជាយុវជនដែលទាមទារឲ្យរដ្ឋាភិបាលរំលាយសភាចោល បញ្ឈប់ការធ្វើទុក្ខបុកម្នេញលើក្រុមអ្នករិះគន់ និងក្រុមអ្នកប្រឆាំង ហើយធ្វើវិសោធនកម្មរដ្ឋធម្មនុញ្ញ។
ទាក់ទិនដល់ការធ្វើបាតុកម្មជាបន្តបន្ទាប់របស់ក្រុមនិស្សិតថៃ នាយករដ្ឋមន្ត្រី ប្រាយុទ្ធ ក៏បានចុចដេញដោលរកប្រភពហិរញ្ញវត្ថុរបស់ពួកគេ។ ថ្លែងទៅកាន់សារព័ត៌មានក្រោយប្រជុំគណៈរដ្ឋមន្ត្រីថៃ នៅថ្ងៃទី ១៣ ខែសីហា លោក និយាយ លោកមើលឃើញសកម្មភាពបាតុកម្មជាច្រើនកើតឡើងក្នុងមួយរយៈចុងក្រោយ ហើយវាត្រូវចាយលុយច្រើន។
តាមបាងកកប៉ុស្តិ៍ លោកចោទសួរត្រង់ៗដូច្នេះថា៖«តើលុយទាំងនោះបានមកពីណា? នេះគឺត្រូវត្រួតពិនិត្យយ៉ាងល្អិតល្អន់»។ ពាក់ព័ន្ធរឿងនេះ លោកប្រាយុទ្ធអះអាង មន្ត្រីលោក កំពុងស៊ើបអង្កេតលើបញ្ហានេះហើយ៕