ជាតិ
សង្គមជាតិ
សម្ដេច ហ៊ុន សែន ស្នើឱ្យUN ពន្យាពេលផ្លាស់ប្ដូរវេនកងទ័ពមួកខៀវកម្ពុជា ដើម្បីទប់ស្កាត់ជំងឺកូវីដ-១៩
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ស្នើទៅអង្គការសហប្រជាជាតិឱ្យពន្យាពេលផ្លាស់ប្ដូរវេនកងកម្លាំងរក្សាសន្តិភាពរបស់កម្ពុជា ដើម្បីកាត់បន្ថយការឆ្លងរីករាលនៃជំងឺកូវីដ-១៩។ សម្ដេច ថ្លែងបែបនេះនៅក្នុងពិធីសម្ពោធសួន«ទឹកហ្គាឌិនស៊ិធី» ស្ថិតនៅខណ្ឌជ្រោយចង្វារ រាជធានីភ្នំពេញ នៅថ្ងៃទី១៦ សីហានេះ។
សម្ដេច ហ៊ុន សែន បានបញ្ជាក់ថា កងទ័ពមួកខៀវរបស់កម្ពុជា ជាង៤០០នាក់ នឹងត្រូវដល់ពេលផ្លាស់ប្ដូរវេនគ្នានៅពេលខាងមុខនេះ ដូច្នេះវាអាចជាហានិភ័យនៃការឆ្លងជំងឺកូវីដ-១៩។ សម្ដេច ហ៊ុន សែន ដែលមើលឃើញពីហានិភ័យនេះ បានស្នើទៅអគ្គលេខាធិការអង្គការសហប្រជាជាតិ លោក Antonio Guterres ពិចារណាពន្យាពេលផ្លាស់ប្ដូរវេនកងទ័ពមួកខៀវកម្ពុជា ក៏ដូចជាកងទ័ពនៃប្រទេសដទៃទៀត ដោយឱ្យពួកគេបន្តការងារនៅប្រទេសនីមួយៗ មួយរយៈពេលនាកំឡុងពេលវិបត្តិកូវីដ-១៩នេះ។
នាយករដ្ឋមន្ត្រីកម្ពុជា បានលើកឡើងដូច្នេះថា៖«ខ្ញុំមិនស្នើសុំទុកកងទ័ពយើងម៉ាអាយុនៅទីនោះទេ ហើយបន្តដល់រាប់ឆ្នាំនៅទីនោះ តែយើងស្នើសុំរក្សាកងទ័ពយើងរស់នៅទីនោះមួយរយៈកាល ដើម្បីកាត់បន្ថយនូវការឆ្លង(ជំងឺកូវីដ-១៩) នាំចូលពីប្រទេសក្រៅ ហើយមកចម្លងមកប្រទេសរបស់យើង»។
សម្ដេច ក៏សុំឱ្យគ្រួសារកងទ័ពមួកខៀវ ក៏ដូចជាកងកម្លាំងដែលត្រៀមចេញទៅរក្សាសន្តិភាពនៅគោលដៅនីមួយៗ ក្រោមឆ័ត្រអង្គការសហប្រជាជាតិ មានការយោគយល់ផងដែរ។
កាលពីថ្ងៃទី២៩ ខែឧសភា កងរក្សាសន្តិភាពមួកខៀវកម្ពុជា ដែលមានតួនាទីឧត្តមសេនីយ៍ទោម្នាក់ឈ្មោះ ស សាវី វ័យ៦៣ឆ្នាំ បានបាត់បង់ជីវិត ដោយសារកូវីដ-១៩ នៅក្នុងប្រទេសម៉ាលី ។លោក ស សាវី បានទៅបំពេញបេសកកម្ម នៅប្រទេសម៉ាលី ២លើករួចមកហើយ គឺនៅក្នុង២០១៦ និងនៅឆ្នាំ២០១៩។ ក្រៅពីលោក ស សាវី ក៏មានកងទ័ពមួកខៀវកម្ពុជា៦នាក់ទៀត ឆ្លងជំងឺកូវីដ-១៩ដែរ ប៉ុន្តែពួកគេបានជាសះស្បើយវិញ។
បច្ចុប្បន្នកងកម្លាំងរក្សាសន្តិភាពកម្ពុជា ជាង៨០០នាក់ កំពុងបំពេញបេសកម្មនៅប្រទេសចំនួន៨គឺ ស៊ូដង់ ស៊ូដង់ខាងត្បូង លីបង់ ស៊ីប ស៊ីរី ឆាដ ម៉ាលី និងសាធារណរដ្ឋអាហ្វ្រិកកណ្តាល។ សូមបញ្ជាក់ថា ចាប់តាំងពីឆ្នាំ២០០៦ មក កម្ពុជា បានបញ្ជូនកងកម្លាំងរក្សាសន្តិភាពជាង៦ពាន់នាក់ហើយ ទៅបំពេញបេសកកម្មក្នុងប្រទេសទាំង៨នេះ ក្រោមឆត្រអង្គការសហប្រជាជាតិ៕
Tag:
ហ៊ុន សែន
កងទ័ពមួកខៀវ
© រក្សាសិទ្ធិដោយ thmeythmey.com