សង្គមអន្តរជាតិ
អន្តរជាតិ
ម្ចាស់សារមន្ទីរ ចេញបកស្រាយថា តុក្កតាខ្មោច Annabelle អត់បាត់ទៅណាទេ
× ពាក្យចចាមអារាមពាក់ព័ន្ធដំណឹងបាត់ខ្លួននៃតុក្កតាវិញ្ញាណសណ្ឋិត អាណាប៉ែល (Ananabelle) បានផ្ទុះឡើងកាលពីថ្ងៃទី១៤ ខែសីហា ក្រោយអ្នកប្រើប្រាស់អ៊ីនធឺណែតម្នាក់បានផ្លាស់ប្តូរទំព័រ Wikipedia របស់តុក្កតាខ្មោចនេះ ដោយអះអាងថា នាងបានគេចខ្លួនពីសារមន្ទីរ។ យ៉ាងណា ២ថ្ងៃក្រោយមក ម្ចាស់សារមន្ទីរដែលដាក់តុក្កតានេះ បានចេញមុខបកស្រាយថា នេះគឺជាបោកប្រាស់។
លោក Tony Speara ដែលម្ចាស់សារមន្ទីរ និងជាអ្នកមើលថែតុក្កតា Annabelle បានបង្ហោះវីដេអូបកស្រាយមួយនៅលើបណ្ដេញ YouTube នៅថ្ងៃទី១៥ ខែសីហា ដោយបានបង្ហាញតុក្កតានោះនៅពីក្រោយខ្នងលោក ដែលនាងត្រូវបានដាក់ក្នុងទូកញ្ចក់មួយ។
«ខ្ញុំនៅទីនេះ ក្នុងសារមន្ទីរ ព្រោះតែពាក្យចចាមអារាមថា Annabelle បានគេចខ្លួន»។ លោក Spera ដែលជាកូនប្រសាររបស់ប្ដីប្រពន្ធចាប់ខ្មោចដ៏ល្បីល្បាញ Edward និង Lorraine Warren និយាយដូច្នេះ ដោយបន្តទៀតថា៖«[…] តុក្កតា Annabelle អត់បានគេចខ្លួននោះទេ។ នាងអត់បានទៅដើរលេង ឬទៅជួបមិត្តប្រុសនាងឡើយ»។
ក្នុងវីដេអូរយៈពេល១៖៤៨នាទីនេះ លោក Spera បញ្ជាក់ទៀតថា សារមន្ទីរផ្លូវងងឹត (Occult) របស់ប្ដីប្រពន្ធ Warrens ក្នុងរដ្ឋ Connecticut សហរដ្ឋអាមេរិក មានប្រព័ន្ធសន្តិសុខខ្ពស់ណាស់។ លោកធានាថា៖«ប្រសិនបើនាង (Annabelle) បានចាកចេញពីសារមន្ទីរមែននោះ ខ្ញុំច្បាស់ជាដឹងភ្លាមៗថា មានរឿងអ្វីកើតឡើង ឬមានអ្នកណាលួចចូល។ យើងមានប្រព័ន្ធប្រកាសអាសន្នល្អ នៅទីនេះ ហើយប៉ូលិសក៏ត្រៀមខ្លួនជានិច្ចសម្រាប់ឆ្លើយតបផងដែរ»។
ជាចុងក្រោយ ម្ចាស់សារមន្ទីរផ្លូវងងឹតរូបនេះ និយាយថា លោកចង់ឲ្យគ្រប់គ្នាបិទបញ្ចប់ពាក្យចចាមអារាមនេះ ហើយលោកអរគុណសម្រាប់ក្តីកង្វល់របសអ្នកលេងអ៊ីនធឺណែតគ្រប់គ្នា។ លោកថែមទាំងនិយាយលេងសើចថា៖«ប្រសិនបើនាង Annabelle ចាកចេញពីសារមន្ទីរមែននោះ នាងគ្មានអ្នកណាលេងជាមួយទេ»។
រឿងរ៉ាវរបស់តុក្កតាវិញ្ញាណសណ្ឋិត Annabelle ត្រូវបានគេយកទៅធ្វើជាសាច់រឿងក្នុងស្រឡាយភាពយន្តរន្ធត់ «The Conjuring»។ ភាពយន្តនិយាយពីតុក្កតានេះ មានបីរឿង ដូចជា Annabelle (២០១៤), Annabelle Creation (២០១៧) និង Annabelle Comes Home (២០១៩) ។ តុក្កតាខ្មោចនេះ ក៏មានវត្តមានក្នុងភាពយន្តចំណងជើងផ្សេងទៀតក្នុងស្រឡាយរឿង The Conjuring ផងដែរ៕
សូមទស្សនាវីដេអូខាងក្រោម៖
© រក្សាសិទ្ធិដោយ thmeythmey.com