យុទ្ធនាការប្រកួតលីគកីឡាបាល់ទាត់កំពូលទាំង៥នៅអឺរ៉ុប រួមមានអង់គ្លេស អេស្ប៉ាញ អ៊ីតាលី អាល្លឺម៉ង់ និងបារាំងបានបញ្ចប់ដោយជោគជ័យហើយ បើទោះជួបបញ្ហាធ្ងន់ធ្ងរដោយសារជំងឺ COVID-19 ក៏ដោយ។ ក្នុងនោះដែរ ជ័យលាភីអ្នករកគ្រាប់បាល់ស៊ុតបញ្ចូលទីច្រើនជាងគេ (Golden Boot) ប្រចាំលីគនីមួយៗ ក៏រកឃើញហើយដែរ ក្នុងនោះ Ciro Immobile ខ្សែប្រយុទ្ធ Lazio នៃក្របខណ្ឌអ៊ីតាលី Serie A សម្រេចទីបានច្រើនជាងគេទាំងអស់រហូតដល់ចំនួន ៣៦គ្រាប់។
Ciro Immobile ខ្សែប្រយុទ្ធសញ្ជាតិអ៊ីតាលី បានជួយក្រុម Lazio បញ្ចប់ក្នុងចំណាត់ថ្នាក់ទី៤ក្នុងតារាង Serie A ដោយទទួលបានកៅអី Champions League រដូវកាលក្រោយ។ មិនត្រឹមតែជួយក្រុមបានកៅអីអឺរ៉ុបនោះទេ ខ្សែប្រយុទ្ធវ័យ៣០ឆ្នាំរូបនេះ ថែមទាំងអាចឈ្នះពានរង្វាន់ស្បែកជើងមាស Golden Boot រដូវកាល ២០១៩-២០ ផង តាមរយៈការស៊ុតបញ្ចូលទីសរុប ៣៦គ្រាប់ ដោយនាំមុខគូប្រជែង Cristiano Ronaldo ដែលរកគ្រាប់ឲ្យ Juventus បាន៣១គ្រាប់។
Robert Lewandowski ក៏បានក្លាយជាម្ចាស់ពាន Golden Boot ប្រចាំ Bundeliga របស់អាល្លឺម៉ង់ផងដែរ ក្រោយរកបានគ្រាប់បាល់ស៊ុតបញ្ចូលទីឲ្យ Bayern Munich ចំនួន៣៤គ្រាប់ លើស Timo Werner ខ្សែប្រយុទ្ធក្រុម Leipzig ដែលរកបាន២៨គ្រាប់។
យ៉ាងក៏ដោយខ្សែប្រយុទ្ធ និងជាប្រធានក្រុមជម្រើសជាតិប៉ូឡូញវ័យ៣១ឆ្នាំរូបនេះ កំពុងនាំមុខគេក្នុងការរកគ្រាប់បាល់នៅក្របខណ្ឌ Champions League ចំនួន១៣គ្រាប់ ក្រោយជួយក្រុម Bayern Munich បន្តទៅកាន់វគ្គ៨ក្រុមចុងក្រោយ។
ចំណែក Lionel Messi បើទោះមិនអាចជួយ Barcelona ដណ្តើមយកពាន La Liga របស់អេស្ប៉ាញរដូវកាលនេះបានក្តី ប៉ុន្តែរូបគេនៅតែឈានមុនគេក្នុងការរកគ្រាប់បាល់ស៊ុតបញ្ចូលទីច្រើនជាងគេដដែល។ ខ្សែប្រយុទ្ធអន្តរជាតិអាហ្សង់ទីន វ័យ៣៣ឆ្នាំរូបនេះរកគ្រាប់បាន២៥គ្រាប់ នាំមុខ Karim Benzema ខ្សែប្រយុទ្ធ Real Madrid ដែលរកបាន២១គ្រាប់។ Messi នៅមានភារកិច្ចជាមួយក្រុមរហ្សនាមក្នុងក្របខណ្ឌកំពូលអឺរ៉ុប ដោយត្រូវតតាំងជាមួយក្រុម Bayern Munich នៅវគ្គ១/៤ផ្តាច់ព្រ័ត្រ។
សម្រាប់នៅលីគកំពូល Premier League វិញ ខ្សែប្រយុទ្ធ Jamie Vardy បានទទួលពាន Golden Boot ជាលើកដំបូងក្នុងអាជីព ក្រោយស៊ុតបញ្ចូលទីច្រើនជាងគេ គឺចំនួន២៣គ្រាប់។
នេះជាការឈ្នះស្បែកជើងមាសជាកំណត់ត្រាសម្រាប់ខ្សែប្រយុទ្ធដែលមានវ័យចំណាស់ និងជាលើកដំបូងក្នុងអាជីពរបស់ Vardy។ ខ្សែប្រយុទ្ធសញ្ជាតិអង់គ្លេស និងក្លិប Leicester City វ័យ៣៣ឆ្នាំរូបនេះរកបានគ្រាប់នាំមុខ Pierre-Emerick Aubameyang ខ្សែប្រយុទ្ធ Arsenal ដែលរកបាន២២គ្រាប់ ស្មើគ្នាជាមួយ Danny Ings របស់ Southampton។ Raheem Sterling ខ្សែប្រយុទ្ធ Man City ស្ថិតនៅចំណាត់ថ្នាក់ទី៤ ដោយរកបាន២០គ្រាប់ តាមពីក្រោយដោយ Mohamed Salah របស់ Liverpool ដែលស៊ុតបញ្ចូលទីបាន១៩គ្រាប់។
ដោយឡែក នៅក្របខណ្ឌកំពូលបារាំង LIGUE 1 ឯណោះវិញ បើទោះលីគត្រូវបញ្ចប់នៅពាក់កណ្តាលផ្លូវក្តី ប៉ុន្តែជើងឯកត្រូវផ្តល់ឲ្យក្រុម Paris Saint-Germain ដែលមានពិន្ទុនាំមុខគេ។ មិនត្រឹមប៉ុណ្ណោះពានសម្រាប់អ្នកស៊ុតបញ្ចូលទីច្រើនជាងគេក៏ត្រូវប្រកាសផងដែរ ដោយខ្សែប្រយុទ្ធ Kylian Mbappé ជាអ្នកទទួលបាន បើទោះខ្សែប្រយុទ្ធវ័យក្មេងរូបនេះ មានគ្រាប់ស៊ុតសរុប១៨គ្រាប់ស្មើជាមួយ Wissam Ben Yedder ខ្សែប្រយុទ្ធក្រុម AS Monaco ក៏ដោយ។
ក្នុងចំណោមលីគកំពូលទាំង៥នៅអឺរ៉ុប កីឡាករ Ciro Immobile ខ្សែប្រយុទ្ធក្រុម Lazio នៃក្របខណ្ឌកំពូលអ៊ីតាលី serie A ជាអ្នកសម្រេចទីបានច្រើនជាងគេរហូតដល់៣៦គ្រាប់នៅរដូវកាល ២០១៩/២០ នេះ ដោយនាំមុខ Lewandowski (៣៤គ្រាប់), Messi (២៥គ្រាប់), Vardy (២៣គ្រាប់) និង Mbappé (១៨គ្រាប់)៕