អន្តរជាតិ
យន្តហោះចម្បាំង Rafale របស់បារាំង (ខាងលើ) និងយន្តហោះចម្បាំង Chengdu J-20 របស់ចិន។
×![]()
ដោយ: ធៀន ភារិន្ទ
ឥណ្ឌា បានកម្មង់ទិញ Rafale របស់បារាំងចំនួន ៣៦គ្រឿង តាំងពីឆ្នាំ២០១៦មកម្លេះ ក្នុងទំហំទឹកប្រាក់ប្រមាណ ៩,៤ពាន់លានដុល្លារ។ យន្តហោះ Rafale ៥គ្រឿងដំបូង បានហោះមកដល់ទឹកដីឥណ្ឌាហើយ ខណៈការប្រគល់ទំនិញ នឹងបញ្ចប់នៅត្រឹមឆ្នាំ២០២២។ ខុសពីឥណ្ឌា ចិន មានយន្តហោះចម្បាំងផលិតក្នុងស្រុកស្រាប់ និងមានជាច្រើនប្រភេទ បន្ថែមពីយន្តហោះនាំចូល។ យន្តហោះ J-20 ត្រូវបានគេមើលឃើញថា មានសមត្ថភាពស្រដៀងនឹង Rafale របស់បារាំង។ តើយន្តហោះចម្បាំងប្រភេទទាំងពីរនេះ មានលក្ខណៈដូចគ្នា និងខុសគ្នាត្រង់ចំណុចណាខ្លះ?
យន្តហោះ Rafale
Rafale គឺជាយន្តហោះចម្បាំង ដែលត្រូវបានផលិតដោយក្រុមហ៊ុនបារាំង Dassault Aviation។ យន្តហោះចម្បាំងនេះ ត្រូវបានគេផលិតឡើងមានចំនួន ៣ប្រភេទ ក្នុងនោះមានដូចជា Rafale C គឺជាប្រភេទយន្តហោះ ដែលមានកៅអីអ្នកបើកចំនួន ១នាក់, Rafale B គឺយន្តហោះ ដែលមានកៅអីចំនួន២ និង Rafale M គឺជាយន្តហោះសម្រាប់ប្រើប្រាស់ជាមួយនាវាដឹកយន្តហោះ។ Rafale ត្រូវបានបំពាក់ ដោយម៉ាស៊ីនពីរ ដើម្បីធ្វើឲ្យប្រព័ន្ធដំណើរការយន្តហោះខ្លាំង និងមានល្បឿនលឿន។ ពាក់ព័ន្ធនឹងប្រភេទ រដ្ឋាភិបាលឥណ្ឌា មិនបានបញ្ជាក់ទេ ថាតើខ្លួនបានទិញប្រភេទណាមួយពីបារាំង។
តាមការបញ្ជាក់របស់ក្រុមហ៊ុន Dassault Aviation យន្តហោះជំនាន់ថ្មីនេះ អាចបំពាក់មីស៊ីលបាញ់លើអាកាស មីស៊ីលបាញ់ទៅដី និងមីស៊ីលប្រឆាំងនាវាចម្បាំង។ យន្តហោះចម្បាំងប្រភេទនេះ ក៏អាចបំពាក់កាំភ្លើងទំហំ ៣០មីលីម៉ែត្របានដែរ។ ជាពិសេស យន្តហោះមួយនេះ ក៏អាចបំពាក់មីស៊ីលបានចំនួន ៦គ្រាប់ ដោយអាចបាញ់បានក្នុងពេលជាមួយគ្នា។ Rafale អាចបាញ់មីស៊ីលនៅលើអាកាស បានចម្ងាយរហូតដល់ ១៥០គីឡូម៉ែត្រ និងបាញ់ទៅដីបានរហូតដល់ ៣០០គីឡូម៉ែត្រ។ វាក៏អាចប្រើជាយន្តហោះស៊ើបការណ៍ និងអាចវាយប្រហារសត្រូវ ពេលហោះក្នុងរយៈកម្ពស់ទាបបានផងដែរ។
យន្តហោះចម្បាំង Rafale របស់បារាំង។ រូបភាព៖ AFP
បន្ថែមពីលើនេះ Rafale អាចហោះហើរបានគ្រប់កាលៈទេសៈ ពោលគឺមិនថាមានអាកាសធាតុអាក្រក់យ៉ាងណាក៏ដោយ។ ម្យ៉ាងវិញទៀត វាអាចហោះហើរបានយ៉ាងល្អ, មានរ៉ាដា និងប្រព័ន្ធគ្រឿងម៉ាស៊ីនដ៏ល្អមួយ បើធៀបនឹងយន្តហោះចម្បាំងផ្សេងទៀត។ កន្លងមក កងទ័ពបារាំង បានប្រតិបត្តិការយន្តហោះប្រភេទនេះ អាហ្វហ្កានីស្ថាន លីប៊ី ម៉ាលី អ៊ីរ៉ាក់ជាដើម។
Rafale អាចហោះបានចម្ងាយ ៣៧០០គីឡូម៉ែត្រ, ហោះបានកម្ពស់ជាង ១៥គីឡូម៉ែត្រ និងអាចផ្ទុកទម្ងន់ ២៤៥០០គីឡូក្រាម។ ចំណែកល្បឿនវិញ Rafale អាចហោះបាន ២២២២គីឡូម៉ែត្រក្នុងមួយម៉ោង។
យន្តហោះចម្បាំង Chengdu J-20
Chengdu J-20 គឺជាយន្តហោះចម្បាំងរបស់ចិន ដែលត្រូវបានផលិតដោយក្រុមហ៊ុន Chengdu Aerospace Corporation។ មានលក្ខណៈស្រដៀងគ្នានឹង Rafale របស់បារាំងដែរ J-20 របស់ចិន បំពាក់ដោយម៉ាស៊ីនពីរ ដែលមានកម្លាំងខ្លាំង អាចហោះហើរបានគ្រប់អាកាសធាតុ និងអាចយកការណ៍បាន។ ប៉ុន្តែយន្តហោះចម្បាំងប្រភេទនេះ គឺស្ថិតនៅក្នុងជំនាន់ទី៥ ខណៈយន្តហោះចម្បាំងជំនាន់ទី៦ កំពុងស្ថិតក្នុងការអភិវឌ្ឍ។
ខុសពីRafale របស់បារាំង J-20 របស់ចិនមានតែកៅអីមួយប៉ុណ្ណោះ និងអាចហោះបាន ២១០០គីឡូម៉ែត្រក្នុងមួយម៉ោង។ យន្តហោះចម្បាំង J-20 អាចបាញ់មីស៊ីលលើអាកាស បានចម្ងាយរហូតដល់ ៣០០គីឡូម៉ែត្រ និង ៤០០គីឡូម៉ែត្រពីអាកាសទៅដី។ J-20 អាចផ្ទុកទម្ងន់បាន ៣៧០០០គីឡូក្រាម, ហោះបានរយៈកម្ពស់ជិត ២០គីឡូម៉ែត្រ និងហោះបានចម្ងាយ ៣៤០០គីឡូម៉ែត្រ។
យន្តហោះចម្បាំង Chengdu J-20 របស់ចិន។ រូបភាព៖ Reuters
J-20 បានហោះលើកដំបូងនៅក្នុងឆ្នាំ២០១១ ហើយនៅក្នុងឆ្នាំ២០១៧ រដ្ឋាភិបាលចិន បានដាក់យន្តហោះចម្បាំងប្រភេទនេះ ចូលទៅក្នុងកងកម្លាំងទ័ពអាកាសរបស់ចិន។ នៅក្នុងឆ្នាំ ២០១៩ J-20 ត្រូវបានគេផលិតចំនួន ៥០គ្រឿង ដោយក្នុង ១គ្រឿងៗ មានតម្លៃចាប់ពី ១០០លានដុល្លារ ដល់ ១១០លានដុល្លារ។ យន្តចម្បាំងមួយនេះ អាចបំពាក់មីស៊ីលចម្ងាយឆ្ងាយ និងមធ្យមចំនួន ៤គ្រាប់ និងចម្ងាយខ្លីបានពីរគ្រាប់៕
Tag:
ឥណ្ឌា
ចិន
© រក្សាសិទ្ធិដោយ thmeythmey.com
