ជាតិ
ខេត្តមណ្ឌលគិរីមានសក្ដានុពលទេសចរណ៍ តែគ្មានកន្លែងកែច្នៃសំរាម
× ខេត្តមណ្ឌលគិរី ស្ថិតនៅភូមិភាគឦសាន ជាខេត្តមានសក្ដានុពលអេកូទេសចរណ៍ មានតំបន់ទេសចរណ៍ចំនួន៣៦កន្លែង សម្រាប់ទាក់ទាញភ្ញៀវឲ្យកើនឡើងពីមួយឆ្នាំទៅមួយឆ្នាំ។ ទោះបីជា សម្បូរធនធានធម្មជាតិក៏ពិតមែន ប៉ុន្តែខេត្តមួយនេះ នៅមិនទាន់មានកន្លែងសម្រាប់កែច្នៃសំរាមនៅឡើយទេ។ នេះបើតាម លោក កែវ សុភ៌គ ប្រធានមន្ទីរបរិស្ថានខេត្តមណ្ឌលគិរី។
«ខេត្តមណ្ឌលគិរី អត់មានកន្លែងកែច្នៃសំរាមទេ យើងមានតែទីលានទុកដាក់សំរាម ចំនួន២កន្លែងគឺនៅក្នុងក្រុងសែនមនោរម្យ និងស្រុកកែវវសីមា»។ នេះជាការលើកឡើងរបស់លោក កែវ សុភ៌គ ដោយបន្តថា ទោះបីជា គ្មានកន្លែងសម្រាប់កែច្នៃសំរាម តែខេត្តមណ្ឌលគិរី បានទុកដាក់សំរាមបានត្រឹមត្រូវ ដែលមិនបង្កឲ្យមានរាយប៉ាយតាមតំបន់ទេសចរណ៍ឡើយ។ កន្លែងទុកដាក់សំរាមទាំង២កន្លែងនេះ គឺក្រុមហ៊ុនឯកជនចំនួន២ បានដេញថ្លៃ ដើម្បីធ្វើការងារប្រមូលសំរាមនេះ។
រូបភាព លោក កែវ សុភគ៌ ក្នុងពិធីក្រុងពាលីបញ្ចុះបឋមសិលាសាងសង់អគារមជ្ឈមណ្ឌលព័ត៌មានបរិស្ថាន ពីមន្ទីរព័ត៌មានខេត្តមណ្ឌលគិរី
ក្រុងសែនមនោរម្យ ជាតំបន់គោលដៅរបស់ខេត្តមណ្ឌលគិរី មានការយកចិត្តទុកដាក់ខ្លាំងមែនទែន លើបញ្ហាសំរាមនេះ។ ប្រធានមន្ទីរបរិស្ថានរូបនេះ បានរៀបរាប់យ៉ាងដូច្នេះថា ក្រសួងបរិស្ថាន បានផ្ដល់នូវកញ្ចប់ថវិកា ដើម្បីរៀបចំ ផ្សព្វផ្សាយ និងថែទាំក្រុងសែនមនោរម្យទាំងមូល។ លើសពីនោះ ក៏មានក្រុមហ៊ុនឯកមួយ បានដេញថ្លៃលើការងារប្រមូលសំរាមក្នុងក្រុងនេះផងដែរ។
លោកបានបន្តថា ទោះបីជាយ៉ាងណាក៏ដោយ បញ្ហាសំរាមក្នុងខេត្តនៅតែមាន ព្រោះប្រជាពលរដ្ឋនៅមិនទាន់យល់ច្បាស់លើបញ្ហាសំរាមនេះ នៅតាមស្រុកមួយចំនួននៅមានសំរាមរាយប៉ាយ និងត្រូវប្រមូល និងសម្អាតពីមន្ទីរបរិស្ថាន ក្រោយចប់កម្មវិធី។ លោក មិនអាចបញ្ជាក់ពីចំនួនសំរាមសរុបទូទាំងខេត្តបានទេ ដោយលើកហេតុផលថា ស្រុកមួយចំនួនដែលគ្មានការដេញថ្លៃលើការងារប្រមូលសំរាម គឺមិនមានទិន្នន័យឡើយ។ ប៉ុន្តែសម្រាប់ក្រុងសែនមនោរម្យ មានសំរាមយ៉ាងហោចណាស់ពី៥ទៅ៦តោនក្នុងមួយថ្ងៃ ចំណែកស្រុកកែវសីមាវិញ មានត្រឹម២០០ទៅ៣០០គីឡូក្រាមប៉ុណ្ណោះក្នុងមួយថ្ងៃ៕
© រក្សាសិទ្ធិដោយ thmeythmey.com